ଦୁଇ ଦିନିଆ ଭାରତ ଗସ୍ତରେ ଆସୁଛନ୍ତି ଅଷ୍ଟ୍ରେଲିଆ ବିଦେଶ ମନ୍ତ୍ରୀ

ନୂଆଦିଲ୍ଲୀ : ଚଳିତ ସପ୍ତାହରେ ଦୁଇ ଦିନିଆ ଭାରତ ଗସ୍ତରେ ଆସୁଛନ୍ତି ଅଷ୍ଟ୍ରେଲିଆର ବିଦେଶ ମନ୍ତ୍ରୀ ପେନି ୱଙ୍ଗ। ଦ୍ୱିପାକ୍ଷିକ ସମ୍ପର୍କକୁ ଆଗେଇ ନେବା ଏବଂ ଦୁଇ ଦେଶ ମଧ୍ୟରେ ଅଧିକ ଉଚ୍ଚ ସ୍ତରୀୟ ଯୋଗାଯୋଗ ପୂର୍ବରୁ ଶାନ୍ତିପୂର୍ଣ୍ଣ ତଥା ସ୍ଥିର ଭାରତ-ପ୍ରଶାନ୍ତ ମହାସାଗରୀୟ ଅଞ୍ଚଳକୁ ସୁନିଶ୍ଚିତ କରିବା ପାଇଁ ପେନି ୱଙ୍ଗଙ୍କ ଏହି ଗସ୍ତର ମୁଖ୍ୟ ଉଦ୍ଦେଶ୍ୟ।

ମାର୍ଚ୍ଚ ୧-୨ରେ ନୂଆଦିଲ୍ଲୀରେ ଅନୁଷ୍ଠିତ ହେବାକୁ ଥିବା ଜି -୨୦ ବୈଠକରେ ଅଂଶଗ୍ରହଣ କରିବା ବ୍ୟତୀତ ୱଙ୍ଗ ବୈଦେଶିକ ବ୍ୟାପାର ମନ୍ତ୍ରଣାଳୟ ଦ୍ୱାରା ଆୟୋଜିତ ଭୌଗୋଳିକ ରାଜନୀତି ଉପରେ ବାର୍ଷିକ ସମ୍ମିଳନୀ ‘ରାଇସିନା ଡାଇଲଗ୍‌’ରେ ଅଂଶଗ୍ରହଣ କରିବେ। ଗତ ବର୍ଷ ବିଦେଶ ମନ୍ତ୍ରୀ ହେବା ପରଠାରୁ ଏହା ୱଙ୍ଗଙ୍କ ପ୍ରଥମ ଭାରତ ଗସ୍ତ। ୱଙ୍ଗ ଆଜି ତାଙ୍କ ଗସ୍ତ ଘୋଷଣା କରିବା ସମୟରେ ଏକ ବିବୃତ୍ତିରେ କହିଛନ୍ତି ଯେ ଅଷ୍ଟ୍ରେଲିଆ ଭାରତର ଜି-୨୦ ପ୍ରତିନିଧିତ୍ବକୁ ଦୃଢ଼ ସମର୍ଥନ କରେ ଏବଂ ଭାରତର ଉଚ୍ଚାଭିଳାଷୀ, କାର୍ଯ୍ୟଭିତ୍ତିକ ଜି -୨୦ ଏଜେଣ୍ଡାକୁ ସ୍ୱାଗତ କରେ।