ଜଳ ନିଗମରେ ନିଯୁକ୍ତି ଦୁର୍ନୀତି ମାମଲାରେ ସମାଜବାଦୀ ପାର୍ଟି ନେତା ଆଜମ ଖାଁଙ୍କ ଉପରେ ହୋଇପାରେ କଠୋର କାର୍ଯ୍ୟାନୁଷ୍ଠାନ!

ନୂଆଦିଲ୍ଲୀ: ସମାଜବାଦୀ ପାର୍ଟି ନେତା ଆଜମ ଖାଁଙ୍କ ଉପରେ ଆଗାମୀ ଦିନରେ ଆହୁରି କଠୋର କାର୍ଯ୍ୟାନୁଷ୍ଠାନ ନିଆଯାଇପାରେ ବୋଲି କୁହାଯାଉଛି । ଏସଆଇଟି ଜଳ ନିଗମରେ ନିଯୁକ୍ତି ଦୁର୍ନୀତି ମାମଲାରେ ପୂର୍ବତନ ମନ୍ତ୍ରୀ ଆଜମ ଖାଁ ଏବଂ ତାଙ୍କ ଓଏସଡି ଥିବା ଆଫାକଙ୍କ ବିରୋଧରେ ଅଭିଯୋଗ ପତ୍ର ଦାଖଲ କରିବାକୁ ଅନୁମତି ମାଗିଛନ୍ତି । ଏହି ମାମଲାରେ ମାର୍ଚ୍ଚ ପ୍ରଥମ ସପ୍ତାହରେ କାର୍ଯ୍ୟାନୁଷ୍ଠାନ ହୋଇପାରେ।

ଆଜି ସମାଜବାଦୀ ପାର୍ଟି ନେତା  ଅଖିଳେଶ ଯାଦବ ଆଜମ ଖାଁଙ୍କୁ ଜେଲରେ ଭେଟିବେ ବୋଲି ସୂଚନା ମିଳିଛି।

ସୂଚନାଯୋଗ୍ୟ, ଗତକାଲି ଆଜମ ଖାଁ, ତାଙ୍କ ପତ୍ନୀ ତନଜିନ ଫାତିମା ଓ ପୁଅ ଅବଦୁଲ୍ଲା ଆଜମ ଜେଲ ଯାଇଛନ୍ତି । ସେମାନେ ବୁଧବାରଦିନ ରାମପୁର ଜିଲ୍ଲା କୋର୍ଟରେ ଆତ୍ମସମର୍ପଣ କରିବା ପରେ ତାଙ୍କୁ ୭ ଦିନିଆ ବିଚାରବିଭାଗୀୟ ହାଜତକୁ ପଠାଇଦେଇଥିଲେ କୋର୍ଟ ।

ବିଭିନ୍ନ ମାମଲାରେ ଏହି ତିନି ଜଣଙ୍କୁ ବାରମ୍ବାର ସମନ ପଠାଯାଉଥିବାବେଳେ ସେମାନେ ତାହାକୁ ଏଡ଼ାଇଯାଉଥିଲେ । ଏହା ପରେ ସେମାନଙ୍କୁ ଗିରଫ କରିବାକୁ କୋର୍ଟ ଓ୍ଵାରେଣ୍ଟ ଜାରି କରିଥିଲେ । ତେବେ ବାରମ୍ବାର ଆଗୁଆ ଜାମିନ ପାଇଁ ଆବେଦନ କରି ବିଫଳ ହେବା ପରେ ସେମାନେ ବୁଧବାରଦିନ କୋର୍ଟରେ ଆତ୍ମସମର୍ପଣ କରିଥିଲେ । ମଙ୍ଗଳବାରଦିନ ରାମପୁରର ଏକ ଏମପି-ଏମଏଲଏ କୋର୍ଟ ଆଜମ ପରିବାରର ସବୁ ସମ୍ପତ୍ତି ଜବତ କରିବାକୁ ନିର୍ଦେଶ ଦେଇଥିଲେ ଓ ଜାମିନ ବିହୀନ ପରଓ୍ଵାନା ଜାରି କରିଥିଲେ ।
ଆଜମ ଖାଁଙ୍କ ବିରୁଦ୍ଧରେ ଉତ୍ତରପ୍ରଦେଶର ବିଭିନ୍ନ କୋର୍ଟରେ ମାମଲା ଚାଲିଛି । ତାଙ୍କ ବିରୁଦ୍ଧରେ ଜମି ଠକେଇ, ଜବରଦଖଲ, ବିଦ୍ୟୁତ ଚୋରି, ଛେଳି ଚୋରି, ମଇଁଷି ଚୋରି, ମୂର୍ତ୍ତି ଚୋରୀ ଆଦି ମାମଲା ଚାଲିଛି । ସେହିପରି ତାଙ୍କ ପୁଅଙ୍କ ବିରୁଦ୍ଧରେ ଜନ୍ମ ପ୍ରମାଣପତ୍ର, ପାସପୋର୍ଟ, ପ୍ୟାନକାର୍ଡ ଜାତିଆତି ମାମଲା ଚାଲିଛି ।