ମେ ୪ ତାରିଖରେ ପୁଣି ଥରେ ଇନ୍‌ଷ୍ଟାଗ୍ରାମ୍‌କୁ ଫେରିଲେ ବାବିଲ୍‌ ଖାନ୍‌

ମୁମ୍ବାଇ: ଦିବଗଂତ ଅଭିନେତା ଇରଫାନ ଖାନ୍‌ଙ୍କ ପୁଅ ବାବିଲ ଖାନ ମେ ୪ ତାରିଖରେ ପୁଣି ଥରେ ଇନ୍‌ଷ୍ଟାଗ୍ରାମ୍‌କୁ ଫେରିଛନ୍ତି। ସେ ଇନ୍‌ଷ୍ଟାକୁ ଫେରିବା ପରେ ତାଙ୍କ ବନ୍ଧୁ ସିଦ୍ଧାନ୍ତ ଚତୁର୍ବେଦୀ, ଅନନ୍ୟା ପାଣ୍ଡେ, ଶନୟା କପୁର, ଅର୍ଜୁନ କପୁର, ଗୌରବ ଆଦର୍ଶ ଏବଂ ଅରିଜିତ ସିଂହଙ୍କୁ ସମର୍ଥନ ପାଇଁ ଧନ୍ୟବାଦ ଜଣାଇଥିଲେ। ସେ ଉଲ୍ଲେଖ କରିଛନ୍ତି ଯେ ଆକାଉଣ୍ଟ୍‌ ଡିଲିଟ୍‌ କରିବା ପୂର୍ବରୁ ସେ ‌ଯେଉଁ ଭିଡିଓ ପୋଷ୍ଟ୍‌ କରିଥିଲେ ତାହାକୁ ଭୁଲ୍‌ ଭାବେ ବ୍ୟାଖ୍ୟା କରାଯାଇଛି।

ଇନଷ୍ଟାଗ୍ରାମ ଫେରିବା ପରେ ତାଙ୍କର ପ୍ରଥମ ପୋଷ୍ଟରେ ସେ ଅଭିନେତା କୁବ୍ରା ସୈତଙ୍କ ଷ୍ଟୋରିକୁ ପୁନଃ ପୋଷ୍ଟ କରି ଏକ ଧନ୍ୟବାଦ ନୋଟ୍ ଲେଖିଥିଲେ। କାରଣ କୁବ୍ରା ତାଙ୍କ ସ୍ୱାସ୍ଥ୍ୟାବସ୍ଥା ସମ୍ପର୍କରେ ବାବିଲଙ୍କ ପରିବାର ପକ୍ଷରୁ ଏକ ବିବୃତି ସେୟାର କରିଥିଲେ।

ବାବିଲଙ୍କ ପୋଷ୍ଟରେ ଲେଖାଥିଲା, ‘‘ତୁମକୁ ବହୁତ ଧନ୍ୟବାଦ। ଏହି ଭିଡିଓକୁ ଅତ୍ୟନ୍ତ ଭୁଲ ବ୍ୟାଖ୍ୟା କରାଯାଇଥିଲା। ମୁଁ ଅନନ୍ୟା ପାଣ୍ଡେ, ଶନୟା କପୁର, ଗୌରବ ଆଦର୍ଶ, ଅର୍ଜୁନ କପୁର, ରାଘବ ଜୁୟାଲ ଏବଂ ଅରିଜିତ ସିଂହଙ୍କୁ ସେମାନଙ୍କ ସମର୍ଥନ ପାଇଁ ଧନ୍ୟବାଦ ଜଣାଉଛି।"

ତା’ପରେ ସେ ରାଘବ ଜୁୟାଲଙ୍କ ଇନଷ୍ଟାଗ୍ରାମ ଷ୍ଟୋରିକୁ ପୁନଃ ସେୟାର କରି ଲେଖିଲେ, "ରାଘବ ଜୁୟାଲ, ଭାଇ ତୁମେ ମୋର ଆଇକନ୍, ମୋର ଆଦର୍ଶ ଏବଂ ମୋର ବଡ଼ ଭାଇ ଯାହା ମୁଁ କେବେ ପାଇ ନଥିଲି।"