ବଦଲାପୁର ଯୌନ ନିର୍ଯାତନା ମାମଲା: ପୁଲିସ ଗୁଳିରେ ଅଭିଯୁକ୍ତର ମୃତ୍ୟୁ

ମୁମ୍ବାଇ: ମହାରାଷ୍ଟ୍ରର ବଦଲାପୁରରେ ଏକ ଘରୋଇ ସ୍କୁଲ୍‌‌ରେ ୨ ଶିଶୁଙ୍କୁ  ଯୌନ ନିର୍ଯାତନା ଦେଇଥିବା ଅଭିଯୋଗରେ ଗିରଫ ହୋଇଥିବା ଅଭିଯୁକ୍ତ ଅକ୍ଷୟ ସିନ୍ଦେ ଆଜି ପୁଲିସ ଗୁଳି‌ରେ ପ୍ରାଣ ହରାଇଛି। ପୁଲିସ ଅନୁଯାୟୀ ଅଭିଯୁକ୍ତ ଅକ୍ଷୟ ସିନ୍ଦେକୁ ଆଜି ସନ୍ଧ୍ୟା ୫ଟା ୩୦ ସମୟରେ ତଦନ୍ତ ପାଇଁ ତାଲୋଜା ଜେଲ୍‌ରୁ ବଦଲାପୁରକୁ ଏକ ପୁଲିସ ଗାଡ଼ିରେ ନିଆଯାଉଥିବାବେଳେ ସେ ଜଣେ ଅଫିସରଙ୍କ ବନ୍ଧୁକ ଛଡ଼ାଇ ପୁଲିସ ଉପରକୁ ଗୁଳି ଚଳାଇଥିଲା।

ପୁଲିସ ଏହାର ପାଲଟା ଜବାବ ଦେଇ ତା ଉପରକୁ ଗୁଳିମାଡ଼ କରିବା ଦ୍ବାରା ତା’ର ମୃତ୍ୟୁ ହୋଇଯାଇଛି। ଅଭିଯୁକ୍ତ ଅକ୍ଷୟର ଗୁଳିମାଡ଼ରେ ୨ ଜଣ ଅଭିଯୁକ୍ତ ମଧ୍ୟ ଆହତ ହୋଇଛନ୍ତି।  ସିନ୍ଦେ ଅଗଷ୍ଟ ୧୭ ତାରିଖରେ ଗିରଫ ହୋଇଥିଲା। ୪ ଏବଂ ୫ ବର୍ଷର ୨ ଶିଶୁଙ୍କୁ ସ୍କୁଲ୍‌ ପାଇଖାନାରେ ଯୌନ ନିର୍ଯାତନା ଦେଇଥିବା ଅଭିଯୋଗରେ ସେ ଗିରଫ ହୋଇଥିଲା। ସ୍ଥାନୀୟ ପୁଲିସ ଏହି ଘଟଣାର ପ୍ରଥମେ ତଦନ୍ତ କରିଥିଲା। କିନ୍ତୁ ପରେ ଏହି ଘଟଣାକୁ ନେଇ ତୀବ୍ର ଉତ୍ତେଜନା ଦେଖାଦେବାରୁ ଉକ୍ତ ଘଟଣାର ତଦନ୍ତ ପାଇଁ ମହାରାଷ୍ଟ୍ର ସରକାର ଏସ୍‌ଆଇଟି ଗଠନ କରିଥିଲେ।