ବଡ଼ୋଦରା: ଗୁଜରାଟର ବଡ଼ୋଦରା ଜିଲ୍ଲାରେ ଏକ ନଦୀପୋଲ ଭୁଶୁଡ଼ି ପଡ଼ିବା ଘଟଣାରେ ଆଉ ୪ଟି ମୃତଦେହ ଉଦ୍ଧାର ହେବା ପରେ ମୃତକଙ୍କ ସଂଖ୍ୟା ୧୫କୁ ବୃଦ୍ଧି ପାଇଛି। ବୁଧବାର ସକାଳେ ପଦରା ସହର ନିକଟସ୍ଥ ଗମ୍ଭୀରା ଗ୍ରାମ ନିକଟରେ ୪ ଦଶନ୍ଧି ପୁରୁଣା ପୋଲର କିଛି ଅଂଶ ଭୁଶୁଡ଼ି ପଡ଼ିବା ପରେ ମହୀସାଗର ନଦୀରେ ୫ଟି ଗାଡ଼ି ଖସି ପଡ଼ିଥିଲା। ବୁଧବାର ରାତିରେ ନଦୀରୁ ଆଉ ୪ଟି ମୃତଦେହ ଉଦ୍ଧାର ହେବା ପରେ ପୋଲ ଭୁଶୁଡ଼ିବା ଘଟଣାରେ ମୃତ୍ୟୁ ସଂଖ୍ୟା ୧୫ରେ ପହଞ୍ଚିଛି। 

Advertisment

ବଡ଼ୋଦରା ଜିଲ୍ଲାପାଳ ଅନିଲ ଧମେଲିଆଙ୍କ କହିବା ଅନୁସାରେ, ଅତି କମ୍‌ରେ ୩ ଜଣ ଏବେ ବି ନିଖୋଜ ଅଛନ୍ତି। ଜାତୀୟ ବିପର୍ଯ୍ୟୟ ମୁକାବିଲା ବାହିନୀ (ଏନ୍‌ଡିଆର୍‌ଏଫ୍‌) ଏବଂ ରାଜ୍ୟ ବିପର୍ଯ୍ୟୟ ପ୍ରଶମନ ବାହିନୀ (ଏସ୍‌ଡିଆର୍‌ଏଫ୍‌)ର ଟିମ୍ ନଦୀରେ ଖୋଜାଖୋଜି ଜାରି ରଖିଛନ୍ତି। ଉଭୟ ଟିମ୍ ନଦୀର ତଳମୁଣ୍ଡରେ ୪ କିଲୋମିଟର ପର୍ଯ୍ୟନ୍ତ ଖୋଜାଖୋଜି ଜାରି ରଖିଛନ୍ତି। ଲୋକମାନେ ଆମ କଣ୍ଟ୍ରୋଲ ରୁମ୍‌କୁ ଫୋନ୍ କରି ଅନ୍ୟ ନିଖୋଜ ବ୍ୟକ୍ତିଙ୍କ ବିଷୟରେ ଜଣାଇପାରିବେ ବୋଲି ଧମେଲିଆ କହିଛନ୍ତି।