ଜମ୍ମୁ : ଜମ୍ମୁ ରେଳ ଷ୍ଟେସନରୁ ଆଜି ଏକ ସଂଦିଗ୍ଧ ବ୍ୟାଗ୍ ମିଳିଛି । ସେଥିରୁ କିଛି ବିସ୍ଫୋରକ ଓ ୧୮ଟି ଡିଟୋନେଟର ଜବତ ହୋଇଛି ବୋଲି ସ୍ଥାନୀୟ ପୁଲିସ ପକ୍ଷରୁ କୁହାଯାଇଛି ।
Sambad is now on WhatsApp
Join and get latest news updates delivered to you via WhatsApp
ରେଳବାଇ ପୁଲିସର ଏସଏସପି ଆରିଫ ରିସୁ କହିଛନ୍ତି ଯେ ଜମ୍ମୁ ରେଳ ଷ୍ଟେସନର ଟାକ୍ସି ଷ୍ଟାଣ୍ଡରେ ଏକ ସଂଦିଗ୍ଧ ବ୍ୟାଗ ରଖାଯାଇଥିବା ଖବର ମିଳିବା ପରେ ପୁଲିସ ସେଠାରେ ପହଞ୍ଚିଥିଲା । ବୋମା ନିରୋଧୀ ସ୍କ୍ବାର୍ଡ ପକ୍ଷରୁ ବ୍ୟାଗକୁ ଖୋଲାଯିବା ପରେ ସେଥିରୁ ୨ଟି ବାକ୍ସରେ କେତେକ ବିସ୍ଫୋରକ ମିଳିଥିଲା । ବିସ୍ଫୋରକ ଗୁଡ଼ିକର ଓଜନ ପ୍ରାୟ ୫୦୦ ଗ୍ରାମ ହେବ । ଏହା ଛଡ଼ା ସେହି ବ୍ୟାଗରୁ ୧୮ଟି ଡିଟୋନେଟର ଓ କିଛି ତାର ମିଳିଥିଲା । ଏସବୁ ସାମଗ୍ରୀକୁ ଜବତ କରାଯିବା ସହ ତଦନ୍ତ କରାଯାଉଥିବା ସେ କହିଛନ୍ତି ।
ଏସବୁ ବିସ୍ଫୋରକ ଜମ୍ମୁ ଷ୍ଟେସନକୁ ବିସ୍ଫୋରଣରେ ଉଡ଼ାଇଦେବାକୁ ଅଣାଯାଇଥିବା ପୁଲିସ ସଂଦେହ କରୁଛି । ବୈଷ୍ଣୋଦେବୀ ଯାତ୍ରୀମାନେ ଏହି ଷ୍ଟେସନରେ ଓହ୍ଲାଉଥିବାରୁ ବର୍ଷର ସବୁ ସମୟରେ ଏହି ଷ୍ଟେସନରେ ଭିଡ଼ ଥାଏ । ଏଣୁ ସମୟ ପୂର୍ବରୁ ଏହି ବ୍ୟାଗକୁ ଜବତ କରାଯିବା ଦ୍ବାରା ଏକ ବଡ଼ ଧରଣର ଅଘଟଣକୁ ଏଡ଼ାଇ ଦିଆଯାଇଥିବା କୁହାଯାଉଛି ।
ବିସ୍ଫୋରକ ମିଳିବା ପରେ ଜମ୍ମୁ ରେଳ ଷ୍ଟେସନର ସୁରକ୍ଷାକୁ ବଢାଇ ଦିଆଯାଇଛି । ଷ୍ଟେସନରେ ଅତିରିକ୍ତ ସୁରକ୍ଷାବଳ ମୁତୟନ କରାଯାଇଛି ଓ ଯାତ୍ରୀଙ୍କ ବ୍ୟାଗଗୁଡ଼ିକୁ ଯାଞ୍ଚ କରାଯାଉଛି ।