ରାଷ୍ଟ୍ରପତି ନିର୍ବାଚନରେ ଲଢ଼ିବା ପାଇଁ ସୁପ୍ରିମକୋର୍ଟରେ ପହଞ୍ଚିଲେ ବମ୍ ବମ୍ ମହାରାଜ
ନୂଆଦିଲ୍ଲୀ: ରାଷ୍ଟ୍ରପତି ନିର୍ବାଚନରେ ନାମାଙ୍କନ ସମ୍ବନ୍ଧୀୟ ନିୟମକୁ ଚ୍ୟାଲେଞ୍ଜ କରି ଦାଖଲ ହୋଇଥିବା ଯାଚିକା ଉପରେ କୌଣସି ଆଦେଶ ଦେବାକୁ ସୁପ୍ରିମକୋର୍ଟ ମନା କରି ଦେଇଛନ୍ତି। ବମ୍ ବମ୍ ମହାରାଜ ନୋହାଟିଆ ନାମକ ଆବେଦନକାରୀ ୫୦ ଜଣ ସାଂସଦ କିମ୍ବା ବିଧାୟକଙ୍କୁ ନାମାଙ୍କନପତ୍ର ଦାଖଲ ପାଇଁ ପ୍ରସ୍ତାବକ ନିୟମକୁ ବିରୋଧ କରି ଯାଚିକା ଦାଖଲ କରିଥିଲେ | ଯାଚିକା ଦାଖଲ ସମୟରେ ସେ କହିଥିଲେ ଯେ ୨୦୦୭ ମସିହାରୁ ସେ ରାଷ୍ଟ୍ରପତି ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବାକୁ ଚେଷ୍ଟା କରୁଛନ୍ତି, କିନ୍ତୁ ଏହି ନିୟମ ତାଙ୍କ ପାଇଁ ବାଧକ ସାଜିଛି | ତେବେ ଆବେଦନକାରୀଙ୍କ ଓକିଲଙ୍କ ଯୁକ୍ତି ଶୁଣିବା ପରେ ଜଷ୍ଟିସ ସୂର୍ଯ୍ୟ କାନ୍ତ କୋର୍ଟରେ ଉପସ୍ଥିତ ଥିବା ବମ୍ ବମ୍ ମହାରାଜଙ୍କୁ କହିଥିଲେ ଯେ “ଆପଣ କହୁଛନ୍ତି ଯେ ୨୦୦୭ ମସିହାରୁ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବାକୁ ଚେଷ୍ଟା କରୁଛନ୍ତି। ଆପଣ ନିଜକୁ ଜଣେ ସାମାଜିକ କର୍ମୀ ବୋଲି ମଧ୍ୟ କହୁଛନ୍ତି | କିନ୍ତୁ ଏହା ଲାଗୁଛି ଯେ ଆପଣ ଜଣେ ଋତୁକାଳୀନ କର୍ମୀ। ଯେତେବେଳେ ରାଷ୍ଟ୍ରପତି ନିର୍ବାଚନ ଆସେ, ଆପଣ ସକ୍ରିୟ ହୁଅନ୍ତି।” ବିଚାରପତି କହିଛନ୍ତି ଯେ ସେ ଏହି ପ୍ରସଙ୍ଗରେ କୌଣସି ଆଦେଶ ଦେବାକୁ ଚାହୁଁନାହାଁନ୍ତି।
ଏହା ସତ୍ତ୍ୱେ ବମ୍ ବମ୍ ମହାରାଜଙ୍କ ଓକିଲ ବାରମ୍ବାର ଯୁକ୍ତି ଉପସ୍ଥାପନ କରିଥିଲେ । ଏଥିରେ କ୍ଷୁବ୍ଧ ହୋଇ ବିଚାରପତି କୋର୍ଟର ସମୟ ନଷ୍ଟ କରିଥିବାରୁ ଜରିମାନା ଆଦାୟ କରିବାକୁ ଚେତାବନୀ ଦେଇଥିଲେ। ବିଚାରପତି ଆବେଦନକାରୀଙ୍କୁ କହିଛନ୍ତି, “ରାଷ୍ଟ୍ରପତି ନିର୍ବାଚନ ପ୍ରକ୍ରିୟା ଆରମ୍ଭ ହେବା ପରେ ଆପଣ ପ୍ରତ୍ୟେକ ଥର ଏହି ପ୍ରସଙ୍ଗ ଉଠାନ୍ତି। ଯେତେବେଳେ କୌଣସି ନିର୍ବାଚନ ନଥାଏ, ସେତେବେଳେ ଏକ ପିଟିସନ ଦାଖଲ କରନ୍ତୁ। ଯାହାର ଶୁଣାଣି ହୋଇପାରେ। ” ଏହା ପରେ କୋର୍ଟ ମଧ୍ୟ ସେହି ପ୍ରସଙ୍ଗରେ ଅନ୍ୟ ଜଣେ ଆବେଦନକାରୀ ତିରୁପତି ରେଡ୍ଡୀଙ୍କ ଆବେଦନକୁ ଖାରଜ କରିଦେଇଛନ୍ତି।
ରେଡ୍ଡୀ ‘ରାଷ୍ଟ୍ରପତି ଏବଂ ଉପରାଷ୍ଟ୍ରପତି ନିର୍ବାଚନ ଅଧିନିୟମ, ୧୯୫୨’ ର ବ୍ୟବସ୍ଥାକୁ ମଧ୍ୟ ଚ୍ୟାଲେଞ୍ଜ କରିଥିଲେ। ତାଙ୍କ ନାମାଙ୍କନପତ୍ର ଗ୍ରହଣ କରିବାକୁ ଲୋକସଭା ସଚିବଙ୍କୁ ନିର୍ଦ୍ଦେଶ ଦେବାକୁ ସେ ଦାବି କରିଥିଲେ । ସୂଚନା ଥାଉ କି ଦେଶର ୧୬ତମ ରାଷ୍ଟ୍ରପତି ନିର୍ବାଚନ ଜୁଲାଇ ୧୮ରେ ହେବାକୁ ଯାଉଛି। ଏହି ନିର୍ବାଚନରେ ବିଜେପି ନେତୃତ୍ୱାଧୀନ ଶାସକ ଏନଡିଏ ଦ୍ରୌପଦୀ ମୁର୍ମୁଙ୍କୁ ପ୍ରାର୍ଥୀ କରିଛି। ଆଉ ବିରୋଧୀ ଦଳ ଯଶବନ୍ତ ସିହ୍ନାଙ୍କୁ ପ୍ରାର୍ଥୀ କରିଛନ୍ତି |
