ନିର୍ବାଚନ ଆୟୋଗ ଜାରି କଲେ କଟକଣା : ଜାନୁଆରି ୨୨ ପର୍ଯ୍ୟନ୍ତ ରାଲି ଓ ରୋଡ ସୋ’ ମନା
ନୂଆଦିଲ୍ଲୀ: ଦେଶରେ ୫ଟି ରାଜ୍ୟରେ ବିଧାନସଭା ନିର୍ବାଚନ ଅନୁଷ୍ଠିତ ହେବାକୁ ଯାଉଛି । ଏହା ପୂର୍ବରୁ ବଢୁଥିବା କରୋନା ସ୍ଥିତିକୁ ନଜରରେ ରଖି ନିର୍ବାଚନ ଆୟୋଗ ବଡ ରାଲି ଓ ରୋଡ ସୋ’ ଉପରେ କଟକଣା ଅବଧି ବୃଦ୍ଧି କରିଛନ୍ତି । ନିର୍ବାଚନ ଆୟୋଗଙ୍କ ନିର୍ଦ୍ଦେଶ ମୁତାବକ ଜାନୁଆରୀ ୨୨ ତାରିଖ ପର୍ଯ୍ୟନ୍ତ କୌଣସି ରାଜନୈତିକ ଦଳ ରାଲି ଓ ରୋଡ ସୋ’ କରିପାରିବେ ନାହିଁ । ଆଜି ନିର୍ବାଚନ ଆୟୋଗଙ୍କ ପକ୍ଷରୁ ବସିଥିବା ବୈଠକରେ ଏଭଳି ନିଷ୍ପତ୍ତି ଉପରେ ମୋହର ଲାଗିଛି । ଏହି ବୈଠକରେ ବଢୁଥିବା କରୋନା ସଂକ୍ରମଣ ଓ ବର୍ତମାନର ସ୍ଥିତି ନେଇ ଆଲୋଚନା ହୋଇଥିଲା । ବୈଠକରେ ନିର୍ବାଚନ ହେଉଥିବା ରାଜ୍ୟର ମୁଖ୍ୟଶାସନ ସଚିବ ଯୋଗ ଦେଇଥିଲେ।
Sambad is now on WhatsApp
Join and get latest news updates delivered to you via WhatsApp
ବୈଠକରେ ଯୋଗ ଦେଇଥିବା ସମସ୍ତ ଅଧିକାରୀ ରାଲି ଉପରେ କଟକଣା ଅବଧି ବୃଦ୍ଧି କରିବାକୁ ସହମତି ପ୍ରକାଶ କରିଥିଲେ । ଏ ନେଇ ଆସନ୍ତା ଗୋଟିଏ ସପ୍ତାହ ପର୍ଯ୍ୟନ୍ତ କୌଣସି ରାଜନୈତିକ ଦଳ ବଡ ବଡ ରାଲି, ଜନସଭା କିମ୍ବା ରୋଡ ସୋ କରିପାରିବେ ନାହିଁ । ଅନ୍ୟପଟେ ଗତକାଲି ସମାଜବାଦୀ ପାର୍ଟି ତରଫରୁ ଏକ ବଡ ଜନସଭାର ଆୟୋଜନ କରାଯାଇଥିଲା । ଏନେଇ ଆଜିର ବୈଠକରେ ଏନେଇ କେନ୍ଦ୍ରୀୟ ନିର୍ବାଚନ ଆୟୋଗ ସମସ୍ତ ଅଭିଯୋଗ ଶୁଣିଥିଲେ । ଅନ୍ୟପଟେ ଏହି କଟକଣା ଅବଧି ଭିତରେ ଇନଡୋର ରାଲି ଓ ଛୋଟ ଛୋଟ ଜନସଭାକୁ ଅନୁମତି ମିଳିଛି । ଏଭଳି ରାଲି ଓ ଜନସଭାରେ ସର୍ବାଧିକ ୩୦୦ ଲୋକ ଏକତ୍ରିତ ହୋଇ ପାରିବେ ବୋଲି ନିର୍ବାଚନ ଆୟୋଗ କହିଛନ୍ତି । ଏଥିସହ କୌଣସି ହଲର ୫୦% କ୍ଷମତାରେ ହିଁ ରାଜନୈତିକ ସଭା କରିବାକୁ ଅନୁମତି ଦିଆଯାଇଛି।
ସବୁ ରାଜନୈତିକ ଦଳ ନିର୍ବାଚନ ସମୟରେ ଆଦର୍ଶ ଆଚରଣବିଧି ଏବଂ କୋଭିଡ୍ କଟକଣାକୁ ମାନିବା ଲାଗି ନିର୍ବାଚନ ଆୟୋଗ ନିର୍ଦ୍ଦେଶ ଦେଇଛନ୍ତି। ଏଥିସହ ରାଜ୍ୟ ଓ ଜିଲ୍ଲା ପ୍ରଶାସନ ଆଚରଣବିଧି ଏବଂ କଟକଣା ପାଳନ ହେଉଛି କି ନାହିଁ ତାହା ତଦାରଖ କରିବେ ବୋଲି ଆୟୋଗ କହିଛନ୍ତି।