ହାତଯୋଡ଼ି କ୍ଷମା ମାଗିଲେ ବାଂଲାଦେଶ ସରକାର: ହିନ୍ଦୁମାନଙ୍କୁ ସୁରକ୍ଷା ଦେବାରେ ଆମେ ବିଫଳ, ସଂଖ୍ୟାଗରିଷ୍ଠ ମୁସଲମାନ ଦେବେ ଏହାର ଉତ୍ତର

ଢାକା: ବାଂଲାଦେଶର ମଧ୍ୟବର୍ତ୍ତୀକାଳୀନ ସରକାର ହିନ୍ଦୁମାନଙ୍କ ଉପରେ ହୋଇଥିବା ଅତ୍ୟାଚାର ପାଇଁ ହାତଯୋଡ଼ି କ୍ଷମା ମାଗିଛନ୍ତି। ବ୍ରିଗେଡିୟର୍ ସଖାୱତ୍ ହୁସେନ୍ କହିଛନ୍ତି ଆମେ ହିନ୍ଦୁମାନଙ୍କୁ ସୁରକ୍ଷା ଦେବାରେ ବିଫଳ ହୋଇଛୁ। ଏନେଇ ମୁଁ ହାତଯୋଡ଼ି କ୍ଷମା ମାଗୁଛି।

ସେ କହିଛନ୍ତି ଯେ ଆମର ସଂଖ୍ୟାଲଘୁ ଭାଇମାନଙ୍କୁ ସୁରକ୍ଷା ଦେବା ସଂଖ୍ୟାଗରିଷ୍ଠ ସମାଜର କର୍ତ୍ତବ୍ୟ। ଯଦି ସେମାନେ ଏହା କରିବାକୁ ସକ୍ଷମ ହୋଇ ନାହାନ୍ତି। ତେବେ ସେମାନେ କାହିଁକି ଏପରି କରି ପାରିଲେ ନାହିଁ ସେମାନଙ୍କୁ ତାହାର ଉତ୍ତର ଦେବାକୁ ପଡିବ। ମୁଁ ମୋର ସଂଖ୍ୟାଲଘୁ ଭାଇମାନଙ୍କୁ କ୍ଷମା ମାଗୁଛି।

ସେ ଆହୁରି ମଧ୍ୟ କହିଛନ୍ତି ଯେ ଦେଶ ଅରାଜକତାର ସମୟ ଦେଇ ଗତି କରୁଛି। ପୁଲିସ୍‌ର ଅବସ୍ଥା ଭଲ ନାହିଁ। ସଂଖ୍ୟାଲଘୁ ସମ୍ପ୍ରଦାୟର ସୁରକ୍ଷା ପାଇଁ ମୁଁ ବାଂଲାଦେଶର ସମାଜକୁ ଅନୁରୋଧ କରୁଛି। ହିନ୍ଦୁମାନେ ଆମର ଭାଇ ଏବଂ ଆମେ ସମସ୍ତେ ଏକାଠି ଦେଶରେ ରହିଛେ।

ସୂଚନାଯୋଗ୍ୟ, ସୋମବାର ଦିନ ବାଂଲାଦେଶର ଗୋପାଳଗଞ୍ଜ ସହରରେ ହୋଇଥିବା ଆକ୍ରମଣ ବିରୋଧରେ ହଜାର ହଜାର ହିନ୍ଦୁ ପ୍ରଦର୍ଶନ କରିଥିଲେ। ଏହି ସମୟ ମଧ୍ୟରେ ସମସ୍ତେ ଏକ ମାନବ ଶୃଙ୍ଖଳା ମଧ୍ୟ ଗଠନ କରିଥିଲେ। ଏଥିରେ ବହୁ ମୁସଲମାନ ମଧ୍ୟ ଯୋଗଦେଇଥିଲେ। ଖବର ଅନୁଯାୟୀ, ପ୍ରେସ କ୍ଲବ ସମ୍ମୁଖ ବଙ୍ଗଳାଖଣ୍ଡ ରାସ୍ତାରେ ଧାର୍ମିକ ସଂଖ୍ୟାଲଘୁ ସମ୍ପ୍ରଦାୟର ବ୍ୟାନରରେ ଏକ ରାଲିର ଆୟୋଜନ କରାଯାଇଥିଲା।

ବାଂଲାଦେଶରେ ହିନ୍ଦୁମାନଙ୍କ ଉପରେ ହୋଇଥିବା ଆକ୍ରମଣର ପ୍ରଭାବ ଅନ୍ୟ ଦେଶରେ ମଧ୍ୟ ଦେଖାଯାଉଛି। ଆମେରିକାରେ ରହୁଥିବା ହିନ୍ଦୁ ପ୍ରବାସୀମାନେ ରବିବାର ଦିନ ପ୍ରଦର୍ଶନ କରିଥିଲେ। ବାଂଲାଦେଶରେ ହିନ୍ଦୁମାନଙ୍କ ପ୍ରତି ହେଉଥିବା ଅତ୍ୟାଚାର ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସମସ୍ତେ ରାଷ୍ଟ୍ରପତି ଜୋ ବାଇଡେନଙ୍କୁ ନିବେଦନ କରିଥିଲେ।