ନୂଆଦିଲ୍ଲୀ : ବାଂଲାଦେଶରେ ଥିବା ଇସ୍କନ ମନ୍ଦିର ଉପରେ ହୋଇଥିବା ଆକ୍ରମଣକୁ ନିନ୍ଦା କରିଛି ରାଷ୍ଟ୍ରୀୟ ସ୍ବୟଂ ସେବକ ସଂଘ (ଆରଏସଏସ) । ବାଂଲାଦେଶ ସରକାର ହିନ୍ଦୁମାନଙ୍କ ସୁରକ୍ଷା କରିବାରେ ବିଫଳ ହୋଇଛନ୍ତି ବୋଲି ଆରଏସଏସ୍ ଅଭିଯୋଗ କରିଛି ।
Sambad is now on WhatsApp
Join and get latest news updates delivered to you via WhatsApp
ଆରଏସଏସ ଜାତୀୟ କାର୍ଯ୍ୟକାରିଣୀ ସଦସ୍ୟ ଇନ୍ଦ୍ରେଶ କୁମାର କହିଛନ୍ତି ଯେ, ବାଂଲାଦେଶର ସଂଖ୍ୟାଲଘୁ ହିନ୍ଦୁମାନଙ୍କୁ ରକ୍ଷା କରିବାରେ ସେଠାକାର ସରକାର ସଂପୂର୍ଣ୍ଣ ବିଫଳ ହୋଇଛନ୍ତି । ଢାକା ସରକାରଙ୍କ ଉପରେ ଚାପ ସୃଷ୍ଟି କରିବାକୁ କଂଗ୍ରେସ ପ୍ରଭୃତି ବିରୋଧୀ ଦଳମାନେ ରାଜନୈତିକ ସଂକୀର୍ଣ୍ଣତାରୁ ଉପରକୁ ଉଠି ଭାରତ ସରକାରଙ୍କ ଉପରେ ଛିଡ଼ା ହୁଅନ୍ତୁ ବୋଲି ସେ ନିବେଦନ କରିଛନ୍ତି ।
ଆରଏସଏସ ଅଧିନସ୍ଥ ମୁସଲିମ ରାଷ୍ଟ୍ରୀୟ ମଂଚର ପ୍ରତିଷ୍ଠାତା ଥିବା ଇନ୍ଦ୍ରେଶ କହିଛନ୍ତି ଯେ ଭାରତର ମୁସଲିମ ସମାଜ ମଧ୍ୟ ଏହାକୁ ବିରୋଧ କରିବା ଉଚିତ ।
ସୂଚନାଯୋଗ୍ୟ ଯେ, ଗତ ଗୁରୁବାର ଦିନ ଢାକାର ୱାରିସ୍ଥିତ ୨୨୨ ଲାଲ୍ମୋହନ ଶାହା ଷ୍ଟ୍ରିଟ୍ରେ ଥିବା ‘ଇସ୍କନ ରାଧାକାନ୍ତ ମନ୍ଦିରକୁ ୨୦୦ରୁ ଅଧିକ ଉତ୍ତ୍ୟକ୍ତ ବ୍ୟକ୍ତି ଆକ୍ରମଣ କରି, ଭଙ୍ଗାରୁଜା କରିବା ସହିତ ଲୁଟତରାଜ କରିଥିଲେ । ଏହି ଆକ୍ରମଣରେ ସୁମନ୍ତ୍ର ଚନ୍ଦ୍ର ଶ୍ରବଣ, ନିହାର ହଲ୍ଦାର୍, ରାଜୀବ ଭଦ୍ରାଙ୍କ ସମେତ ଅନେକ ବ୍ୟକ୍ତି ଆହତ ହୋଇଛନ୍ତି । ଏହି ଆକ୍ରମଣକାରୀ ଜନତାଙ୍କର ନେତୃତ୍ବ ନେଇଥିଲେ ହାଜି ଶଫିଉଲ୍ଲା । ସେମାନେ ମନ୍ଦିର ଓ ଶ୍ରୀବିଗ୍ରହ ଭଙ୍ଗାରୁଜା କରିବା ସହ ଟଙ୍କା ଏବଂ ଅନ୍ୟାନ୍ୟ ମୂଲ୍ୟବାନ ସାମଗ୍ରୀ ଲୁଟ୍ କରି ନେଇଛନ୍ତି ।