“ଆମେ ଆତଙ୍କରେ ଅଛୁ, ଆମକୁ ସାହାଯ୍ୟ କର” ମୋଦୀଙ୍କ ହସ୍ତକ୍ଷେପ ଲୋଡ଼ିଲେ ଢାକା ଇସ୍କନ ମନ୍ଦିର କର୍ମଚାରୀ
ଢାକା : ବାଂଲାଦେଶରେ ସଂଖ୍ୟାଲଘୁ ହିନ୍ଦୁମାନଙ୍କ ଉପରେ ବାରମ୍ବାର ଆକ୍ରମଣ ପରେ ହିନ୍ଦୁମାନେ ଆତଙ୍କିତ ହୋଇଯାଇଛନ୍ତି । ଗତ ଗୁରୁବାର ହୋଇଥିବା ଇସ୍କନ ମନ୍ଦିର ଆକ୍ରମଣ ପରେ ମନ୍ଦିର କର୍ମଚାରୀ ଓ ପୂଜାରୀମାନେ ଆତଙ୍କିତ ହୋଇ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସହାୟତା ଲୋଡ଼ିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ମନ୍ଦିରର ମେଡିକାଲ ଅଫିସର ତଥା ଆକ୍ରମଣର ଜଣେ ପ୍ରତ୍ୟକ୍ଷଦର୍ଶୀ ରାସମଣି କେଶବଦାସ କହିଛନ୍ତି ଯେ ଢାକା ପୁଲିସ ପକ୍ଷରୁ ସୁରକ୍ଷା ଦିଆଯାଇଥିଲେ ବି ତାହା ପ୍ରଯ୍ୟାପ୍ତ ନୁହେଁ । ୧୦ ଜଣ ପୁଲିସ କର୍ମୀ ମନ୍ଦିରକୁ ଜଗି ରହିଛନ୍ତି । ତଥାପି ସେମାନେ ଆତଙ୍କିତ ଅବସ୍ଥାରେ ରହିଛନ୍ତି । ବାଂଲାଦେଶ ପ୍ରଧାନମନ୍ତ୍ରୀ ଶେଖ ହସିନା ସେମାନଙ୍କୁ ସହାୟତା ପାଇଁ ଉଦ୍ୟମ କରୁଥିଲେ ବି ମୋଦୀ ଏଥିରେ ହସ୍ତକ୍ଷେପ କରନ୍ତୁ ବୋଲି ସେ ନିବେଦନ କରିଛନ୍ତି ।
ସୂଚନାଯୋଗ୍ୟ ଯେ, ଗତ ଗୁରୁବାର ଦିନ ଢାକାର ୱାରିସ୍ଥିତ ୨୨୨ ଲାଲ୍ମୋହନ ଶାହା ଷ୍ଟ୍ରିଟ୍ରେ ଥିବା ‘ଇସ୍କନ ରାଧାକାନ୍ତ ମନ୍ଦିରକୁ ୨୦୦ରୁ ଅଧିକ ଉତ୍ତ୍ୟକ୍ତ ବ୍ୟକ୍ତି ଆକ୍ରମଣ କରି, ଭଙ୍ଗାରୁଜା କରିବା ସହିତ ଲୁଟତରାଜ କରିଥିଲେ । ଏହି ଆକ୍ରମଣରେ ସୁମନ୍ତ୍ର ଚନ୍ଦ୍ର ଶ୍ରବଣ, ନିହାର ହଲ୍ଦାର୍, ରାଜୀବ ଭଦ୍ରାଙ୍କ ସମେତ ଅନେକ ବ୍ୟକ୍ତି ଆହତ ହୋଇଛନ୍ତି । ଏହି ଆକ୍ରମଣକାରୀ ଜନତାଙ୍କର ନେତୃତ୍ବ ନେଇଥିଲେ ହାଜି ଶଫିଉଲ୍ଲା । ସେ ପୂର୍ବରୁ ମଧ୍ୟ ଅନେକ ଥର ଧମକ ଦେଉଥିଲା ବୋଲି କେଶବଦାସ କହିଛନ୍ତି ।