ବ୍ୟାନର-ପୋଷ୍ଟର ୱାର୍: ଫଡନାଭିସଙ୍କୁ ଚିଠି ଲେଖିଲେ ଆଦିତ୍ୟ

ମୁମ୍ବାଇ: ଗତ ପାଞ୍ଚ ବର୍ଷ ମଧ୍ୟରେ ମହାରାଷ୍ଟ୍ର ରାଜନୀତିରେ ରାଜନୈତିକ ଅସ୍ଥିରତା ପରେ ରାଜନୈତିକ ଦଳମାନଙ୍କ ମଧ୍ୟରେ 'ପୋଷ୍ଟର ୱାର'ର ଧାରା ଦ୍ରୁତ ଗତିରେ ବୃଦ୍ଧି ପାଇଛି। ରାଜ୍ୟର ପ୍ରତ୍ୟେକ କୋଣ ଅନୁକୋଣରେ ହଜାର ହଜାର ରାଜନୈତିକ ପୋଷ୍ଟର ଦେଖିବାକୁ ମିଳୁଛି। ବିଶେଷ କରି ମୁମ୍ବାଇ ଏମଏମଆରରେ ଏହାର ସଂଖ୍ୟା ବହୁ ଅଧିକ ରହିଛି।

ସହରର ସୌନ୍ଦର୍ଯ୍ୟକୁ ନଷ୍ଟ କରୁଥିବା ଏହି ପୋଷ୍ଟରଗୁଡିକ ମଧ୍ୟରୁ କେତେକ ଆଇନଗତ ହୋଇଥିବାବେଳେ ଅଧିକାଂଶ ବେଆଇନ। ଶିବସେନା ଉଦ୍ଧବ ବାଲାସାହେବ ଠାକରେ (ୟୁବିଟି) ନେତା ତଥା ବିଧାୟକ ଆଦିତ୍ୟ ଠାକରେ ସହରକୁ ଅସୁନ୍ଦର କରୁଥିବା ଏହି ପୋଷ୍ଟର ଉପରେ କଟକଣା ଲଗାଇବାକୁ ଦାବି କରି ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ୍‌ଙ୍କୁ ଚିଠି ଲେଖିଛନ୍ତି।

ବେଆଇନ ପୋଷ୍ଟର, ବ୍ୟାନର ଏବଂ ହୋର୍ଡିଂ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଆଦିତ୍ୟ ଚିଠି ଲେଖିଛନ୍ତି। ଚିଠିରେ ଆଦିତ୍ୟ ଲେଖିଛନ୍ତି ଯେ, ଜଣେ ନାଗରିକ ଭାବରେ ମୁଁ ସହରକୁ ଅସୁନ୍ଦର କରୁଥିବା ଏଭଳି ପୋଷ୍ଟର ନେଇ ଦୁଃଖ ଅନୁଭବ କରୁଛି। 

ବେଆଇନ ପୋଷ୍ଟର ଏବଂ ହୋର୍ଡିଂକୁ ନିୟନ୍ତ୍ରଣ କରି ସହରକୁ ବହୁ ପରିମାଣରେ ଅପରିଷ୍କାରରୁ ରକ୍ଷା କରାଯାଇପାରିବ। ଏହି ଦିଗରେ ପଦକ୍ଷେପ ନେବାକୁ ଆଦିତ୍ୟ ମୁଖ୍ୟମନ୍ତ୍ରୀଙ୍କୁ କହିଛନ୍ତି।  ଏହି କାର୍ଯ୍ୟରେ ଆମ ଦଳ ଆପଣଙ୍କ ସହ ମିଳିତ ଭାବେ ଛିଡ଼ା ହୋଇଥିବା ଆଦିତ୍ୟ ସୂଚିତ କରିଛନ୍ତି।

ଅଧିକ ପଢ଼ନ୍ତୁ: ରୁଷିଆରେ ୟୁନିଫର୍ମ ସିଭିଲ୍ କୋଡ୍: ଏକାଧିକ ବିବାହକୁ ମନା

ଆଦିତ୍ୟ ଚିଠିରେ ଲେଖିଛନ୍ତି ଯେ ଯଦିଓ ଆପଣ ସରକାରରେ ଅଛନ୍ତି ଏବଂ ମୁଖ୍ୟମନ୍ତ୍ରୀ ଅଟନ୍ତି ଏବଂ ଆମେ ବିରୋଧୀ ଅଟୁ, ତେବେ ଏହି କାର୍ଯ୍ୟଗୁଡ଼ିକ ଉପରେ ଆମେ ଏକାଠି କାମ କରିବା ଉଚିତ୍। ମୁଁ ଆପଣଙ୍କୁ ଏହି ଦିଗରେ ପଦକ୍ଷେପ ନେବାକୁ ଅନୁରୋଧ କରୁଛି। ଏହି ଦିଗରେ ସ୍ୱେଚ୍ଛାକୃତ ଭାବେ ସହଯୋଗ କରିବାକୁ ସେ ସମସ୍ତ ରାଜନୈତିକ ଦଳକୁ ନିବେଦନ କରିଛନ୍ତି। 

ସେ  ଲେଖିଛନ୍ତି, ଯଦି ସମସ୍ତ ରାଜନୈତିକ ଦଳ ବେଆଇନ ପୋଷ୍ଟର, ବ୍ୟାନର ଏବଂ ହୋର୍ଡିଂ ନ ଲଗାଇବାକୁ ନିଷ୍ପତ୍ତି ନେବେ, ତେବେ ଏହା ନାଗରିକମାନଙ୍କ ପାଇଁ ଏକ ବଡ଼ ଆଶ୍ବସ୍ତି ହେବ। ଆଦିତ୍ୟ ଆହୁରି ମଧ୍ୟ ପ୍ରତିଶ୍ରୁତି ଦେଇଛନ୍ତି, ଯଦି ମୁଖ୍ୟମନ୍ତ୍ରୀ ସମସ୍ତ ଦଳର ବୈଠକ ଡାକନ୍ତି, ତେବେ ମୁଁ ଏବଂ ମୋର ଦଳ ଆପଣଙ୍କୁ ସମର୍ଥନ କରିବାକୁ ପ୍ରସ୍ତୁତ।

ଅଧିକ ପଢ଼ନ୍ତୁ: ଭାରତ ପାଇଁ ବିପଜ୍ଜନକ ବ୍ୟକ୍ତି ବାଂଲାଦେଶ ଜେଲରୁ ମୁକ୍ତ