କ୍ୟୁଆର କୋଡ୍ ରେ ଭିକ ମାଗୁଛନ୍ତି ଭିକାରୀ: 'ଡିଜିଟାଲ୍ ଇଣ୍ଡିଆ'ର ଭିଡିଓ ଭାଇରାଲ୍

ନୂଆଦିଲ୍ଲୀ: ଆମେ ସାଧରଣତଃ ଡିଜିଟାଲ୍ ଇଣ୍ଡିଆର ଅନେକ ଉଦାହରଣ ଦେଖିଥାଉ। କିନ୍ତୁ ବର୍ତ୍ତମାନ ଏକ ଭିଡିଓ ସୋସିଆଲ୍ ମିଡିଆରେ ଭାଇରାଲ୍ ହେବାରେ ଲାଗିଛି। ଭିଡ଼ିଓରେ ଜଣେ ଭିକାରୀ ଏକ କ୍ୟୁଆର କୋଡ୍ ହାତରେ ଧରି ଭିକ ମାଗୁଛନ୍ତି। ଭିକାରୀ ଜଣେ ଦୃ‌ଷ୍ଟିବାଧିତ। ତେଣୁ ଭିକ ମାଗିବା ସମୟରେ କେହି ଯେପରି ତାଙ୍କୁ ପ୍ରତାରଣା ନ କରିବେ ସେଥିପାଇଁ ସେ ଏହି ବ୍ୟବସ୍ଥା କରିଛନ୍ତି।

ସୋସିଆଲ ମିଡିଆରେ ଭାଇରାଲ ହେଉଥିବା ଭିଡିଓରେ ଦେଖିବାକୁ ମିଳୁଛି ଯେ ଜଣେ ଦୃଷ୍ଟିବାଧିତ କାରରେ ବସିଥିବା ବ୍ୟକ୍ତିଙ୍କ ନିକଟକୁ ଯାଇ ଭିକ ମାଗିବା ଆରମ୍ଭ କରୁଛନ୍ତି। ଏହି ବ୍ୟକ୍ତିଙ୍କ ବେକରେ ଏକ କ୍ୟୁଆର କୋଡ୍ ରହିଛି। କାରରେ ବସିଥିବା ବ୍ୟକ୍ତି ପଚାରୁଛନ୍ତି ଯେ ଆପଣ ଅନଲାଇନରେ ଭିକ ମଧ୍ୟ ନେଉଛନ୍ତି କି? ବ୍ୟକ୍ତି ଉତ୍ତର ଦିଅନ୍ତି ହଁ

ଏହା ପରେ କାରରେ ବସିଥିବା ବ୍ୟକ୍ତି କ୍ୟୁଆର କୋଡ୍ ସ୍କାନ୍ କରି ଟଙ୍କା ଟ୍ରାନ୍ସଫର କରୁଛନ୍ତି । ଏହା ପରେ ଭିକାରୀ ତାଙ୍କ ଫୋନ ବାହାର କରି ନିଶ୍ଚିତ କରୁଛନ୍ତି ଯେ ଟଙ୍କା ତାଙ୍କ ଆକାଉଣ୍ଟରେ ପହଞ୍ଚିଛି କି ନାହିଁ। ଯେତେବେଳେ ସେ ତାଙ୍କ ଫୋନରେ ଆପ୍ ମାଧ୍ୟମରେ ସୂଚନା ପାଉଛନ୍ତି ସେତେବେଳେ ସେ ସନ୍ତୁଷ୍ଟ ହୋଇ ସେଠାରୁ ଚାଲି ଯାଉଛନ୍ତି।। ଯେତେବେଳେ କାରରେ ଥିବା ବ୍ୟକ୍ତି ପଚାରୁଛନ୍ତି ଟଙ୍କା ପାଇଲେ କି? ଭିକାରୀ ଉତ୍ତର ଦେଉଛନ୍ତି ଯେ ହଁ, ଟଙ୍କା ତାଙ୍କ ଆକାଉଣ୍ଟରେ ପହଞ୍ଚିଛି।

Stumbled upon a remarkable scene in bustling #Guwahati – a beggar seamlessly integrating digital transactions into his plea for help, using PhonePe! Technology truly knows no bounds.
It's a testament to the power of technology to transcend barriers, even those of socio-economic… pic.twitter.com/7s5h5zFM5i

— Gauravv Somani (Modi Ka Parivar) (@somanigaurav) March 24, 2024

ଭିଡିଓଟି @somanigaurav ନାମକ ଏକ ଏକ୍ସ ଆକାଉଣ୍ଟରେ ସେୟାର କରାଯାଇଛି । ଭିଡିଓ ସେୟାର କରାଯାଇ ଲେଖାଯାଇଛି ଗୁଆହାଟୀରେ ଏହି ଦୃଶ୍ୟ ଦେଖିବାକୁ ମିଳିଥିଲା ​। ଜଣେ ଭିକାରୀ ଫୋନ୍ ପେ ବ୍ୟବହାର କରି ଲୋକଙ୍କଠାରୁ ଭିକ ମାଗୁଛନ୍ତି । ଭିକାରୀଙ୍କ ନାମ ଦଶରଥ ବୋଲି କୁହାଯାଇଛି।

ଦଶରଥ କେବଳ ଜଣେ ନୁହଁନ୍ତି ଯିଏ ଡିଜିଟାଲ୍ ପେମେଣ୍ଟ ମାଧ୍ୟମରେ ଭିକ ମାଗନ୍ତି, ଦିଲ୍ଲୀ, ବିହାର, ମୁମ୍ବାଇ ସମେତ ଅନେକ ସହରରୁ ଏଭଳି ଘଟଣା ସାମ୍ନାକୁ ଆସିଛି। ଦିଲ୍ଲୀର କିନ୍ନର ଆୟେଶା ଶର୍ମାଙ୍କ ଭିଡିଓ ମଧ୍ୟ ସୋସିଆଲ ମିଡିଆରେ ଭାଇରାଲ ହୋଇଛି, ଯେଉଁଥିରେ ସେ ଲୋକଙ୍କଠାରୁ ଭିକ ନେବା ପାଇଁ ଏକ କ୍ୟୁଆର କୋଡ୍ ବ୍ୟବହାର କରୁଛନ୍ତି।