‘ବେଟା, ଦୋଷୀଙ୍କୁ ଦଣ୍ଡ ମିଳିବ’: କ୍ରିକେଟର ସୁରେଶ ରାଇନାଙ୍କୁ ଟ୍ଵିଟ୍‌ କରି କହିଲେ ମୁଖ୍ୟମନ୍ତ୍ରୀ ଅମରିନ୍ଦର ସିଂ

ଚଣ୍ଡିଗଡ଼: ପଞ୍ଜାବର ପଠାନକୋଟରେ କ୍ରିକେଟର ସୁରେଶ ରାଇନାଙ୍କ ପରିବାର ସଦସ୍ୟଙ୍କ ଉପରେ ହୋଇଥିବା ନିର୍ମମ ଆକ୍ରମଣ ଘଟଣାକୁ ଏକ ସ୍ୱତନ୍ତ୍ର ଅନୁସନ୍ଧାନକାରୀ ଦଳ (ଏସ୍‌ଆଇଟି) ତଦନ୍ତ କରିବ। ମୁଖ୍ୟମନ୍ତ୍ରୀ କ୍ୟାପଟେନ ଅମରିନ୍ଦର ସିଂ ଶ୍ରୀ ରାଇନାଙ୍କୁ ଆଜି ସମବେଦନା ଜଣାଇବା ସହ କରିଥିବା ଟୁଇଟ୍‌ରେ ଏହି ଘୋଷଣା କରିଛନ୍ତି। ସେ କହିଛନ୍ତି ଯେ ଏହି ଘଟଣାରେ ସଂପୃକ୍ତ ସମସ୍ତ ଦୋଷୀଙ୍କୁ ଉପଯୁକ୍ତ ଦଣ୍ଡ ଦିଆଯିବ।

Condole the brutal attack on kin of @ImRaina in Pathankot. Have ordered SIT probe into the case and have asked @DGPPunjabPolice to identify & arrest the culprits at the earliest. Beta, my DC & SSP have met the family and we will make sure that the guilty are brought to justice.

— Capt.Amarinder Singh (@capt_amarinder) September 1, 2020

ପ୍ରସଙ୍ଗକ୍ରମେ ଉଲ୍ଲେଖଯୋଗ୍ୟ, ଗତ ଅଗଷ୍ଟ ୨୦ ତାରିଖରେ ପଠାନକୋଟ୍‌ରେ ରହୁଥିବା କ୍ରିକେଟର ସୁରେଶ ରାଇନାଙ୍କ ପିଉସୀ ଘର ଉପରେ କିଛି ଅଜଣା ଯୁବକ ଆକ୍ରମଣ କରିଥିଲେ। ଏହି ଆକ୍ରମଣରେ ସୁରେଶ ରାଇନାଙ୍କ ପିଉସାଙ୍କର ମୃତ୍ୟୁ ହୋଇଥିବାବେଳେ ପରିବାରର ଅନ୍ୟ ସଦସ୍ୟମାନେ ଗୁରୁତର ଆହତ ହୋଇଥିଲେ। ରାଇନାଙ୍କ ପିଉସୀଙ୍କ ଅବସ୍ଥା ଅତ୍ୟନ୍ତ ଗୁରୁତର ରହିଛି ଏବଂ ସେ ଡାକ୍ତରଖାନାରେ ଭର୍ତ୍ତି ହୋଇଛନ୍ତି।

ଅନ୍ୟପକ୍ଷରେ ଘଟଣାକୁ ଏତେ ଦିନ ବିତିଯାଇଥିଲେ ମଧ୍ୟ ପୁଲିସ ହତ୍ୟାକାରୀଙ୍କୁ ଗିରଫ କରିବାରେ ସକ୍ଷମ ହୋଇ ନାହିଁ। ଏ ନେଇ ତୁରନ୍ତ ଅଭିଯୁକ୍ତଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ପଞ୍ଜାବ ସରକାରଙ୍କୁ ଆଜି ଏକ ଟୁଇଟ କରି ଗୁହାରି କରିଥିଲେ ରାଇନା। ସୁରେଶ ରାଇନା ଟୁଇଟ୍‌୍‌ କରି କହଥିଲେ, ପଞ୍ଜାବରେ ମୋ ପରିବାର ସହିତ ଯାହା ଘଟିଲା ତାହା ଅତ୍ୟନ୍ତ ଭୟଙ୍କର ଥିଲା। ମୋର ପିଉସାଙ୍କୁ ହତ୍ୟା କରାଯାଇଥିବା ବେଳେ ପିଉସୀ ଏବଂ ମୋର ଦୁଇ ସମ୍ପର୍କୀୟ ଭଉଣୀ ଗୁରୁତର ଆହତ ହୋଇଥିଲେ। ଦୁର୍ଭାଗ୍ୟବଶତଃ ଗତ ରାତିରେ ମୃତ୍ୟୁ ସହ ସଂଗ୍ରାମ କରୁଥିବା ମୋର ସମ୍ପର୍କୀୟ ଭଉଣୀଙ୍କର ମୃତ୍ୟୁ ଘଟିଛି। ମୋର ପିଉସୀ ଏବେ ବି ମୃତ୍ୟୁ ସହ ସଂଗ୍ରାମ କରୁଛନ୍ତି। ଆଜି ପର୍ଯ୍ୟନ୍ତ ଆମେ ଜାଣିପାରି ନାହୁଁ ଯେ, ସେହି ରାତିରେ କ’ଣ ଘଟିଥିଲା ଏବଂ କିଏ ଏହି ନୃଶଂସ କାମ କରିଛି। ମୁଁ ପଞ୍ଜାବ ପୁଲିସକୁ ଏହି ଘଟଣାର ଦୃଷ୍ଟି ଦେବାକୁ ଅନୁରୋଧ କରୁଛି। ଏଭଳି ନୃଶଂସ କାମ କିଏ କରିଛି, ତାହା ଜାଣିବା ଆମର ଅଧିକାର। ସେମାନଙ୍କୁ ଏଭଳି ଅପରାଧ କରିବା ପାଇଁ ଛଡ଼ା ନଯାଇ ତୁରନ୍ତ ଗିରଫ କରାଯିବା ଆବଶ୍ୟକ ବୋଲି ଲେଖି ମୁଖ୍ୟମନ୍ତ୍ରୀ କ୍ୟାପଟେନ ଅମରିନ୍ଦର ସିଂ ଏବଂ ପଞ୍ଜାବ ପୁଲିସକୁ ଟ୍ୟାଗ କରିଥିଲେ ରାଇନା।

What happened to my family is Punjab was beyond horrible. My uncle was slaughtered to death, my bua & both my cousins had sever injuries. Unfortunately my cousin also passed away last night after battling for life for days. My bua is still very very critical & is on life support.

— Suresh Raina🇮🇳 (@ImRaina) September 1, 2020

ଏହାପରେ ମୁଖ୍ୟମନ୍ତ୍ରୀ କ୍ୟାପଟେନ୍‌ ଅମରିନ୍ଦର ସିଂ ଏହି ଘଟଣାରେ ଏସଆଇଟି ଯାଞ୍ଚ କରିବାକୁ ନିର୍ଦ୍ଦେଶ ଦେଇଛନ୍ତି ଏବଂ ଶୀଘ୍ର ଦୋଷୀଙ୍କୁ ଚିହ୍ନଟ କରି ଗିରଫ କରିବା ପାଇଁ ପଞ୍ଜାବ ପୁଲିସ୍‌କୁ କହିଛନ୍ତି। ଏହାପରେ ରାଇନାଙ୍କୁ ଟୁଇଟ କରି ମୁଖ୍ୟମନ୍ତ୍ରୀ ଅମରିନ୍ଦର ଲେଖିଛନ୍ତି, ‘ବେଟା, ମୋର ଡିସି ଏବଂ ଏସଏସପି ତୁମ ପରିବାରକୁ ଯାଇ ଭେଟିଛନ୍ତି ଏବଂ ଆମେ ନିଶ୍ଚିତ କରିବୁ ଦୋଷୀଙ୍କୁ ଯେପରି ଉପଯୁକ୍ତ ଦଣ୍ଡ ମିଳିବ’।