ଭାରତ ବାୟୋଟେକର କୋଭାକ୍ସିନ ଟିକା ମାରାତ୍ମକ କରୋନା ଭୂତାଣୁର ‘୬୧୭’ ପ୍ରକାରକୁ ନିଷ୍କ୍ରିୟ କରିବାରେ ସଫଳ: ଆନ୍ଥୋନି ଫାଉଚି

ନୂଆଦିଲ୍ଲୀ: ଭାରତ ବାୟୋଟେକ ଦ୍ବାରା ପ୍ରସ୍ତୁତ ସ୍ବଦେଶୀ ଟିକା କୋଭାକ୍ସିନକୁ ନେଇ ବଡ଼ ଖବର ସାମ୍ନାକୁ ଆସିଛି। ମାରାତ୍ମକ କରୋନା ଭୂତାଣୁର ‘୬୧୭’ ପ୍ରକାରକୁ ନିଷ୍କ୍ରିୟ କରିବାରେ କୋଭାକ୍ସିନ ସଫଳ ବୋଲି କହିଛନ୍ତି ହ୍ବାଇଟ ହାଉସର ମୁଖ୍ୟ ଚିକିତ୍ସା ପରାମର୍ଶଦାତା ତଥା ଯୁକ୍ତରାଷ୍ଟ୍ର ଆମେରିକାର ମୁଖ୍ୟ ଡାକ୍ତରୀ ପରାମର୍ଶଦାତା ଡାକ୍ତର ଆନ୍ଥୋନି ଫାଉଚି।

ସେ କହିଛନ୍ତି ଯେ, କରୋନା ଭୂତାଣୁ ଏପରି ଏକ ଭୂତାଣୁ ଯାହାକୁ ନେଇ ଆମେ ପ୍ରତିଦିନ ତଥ୍ୟ ହାସଲ କରୁଛୁ। କିନ୍ତୁ ସଦ୍ୟତମ ତଥ୍ୟ ଅନୁଯାୟୀ, କୋଭିଡ-୧୯ ରୋଗୀଙ୍କୁ ଦିଆଯାଉଥିବା କୋଭାକ୍ସିନ କରୋନା ଭୂତାଣୁର ‘୬୧୭’ ପ୍ରକାରକୁ ନିଷ୍କ୍ରିୟ କରିବାରେ ସଫଳ। ତେଣୁ, ଆମେ ଭାରତରେ ଦେଖୁଥିବା ପ୍ରକୃତ ଅସୁବିଧା ସତ୍ତ୍ବେ ଟିକାକରଣ ଏହା ବିରୋଧରେ ଏକ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ପ୍ରତିକାର ହୋଇପାରେ।

ତେବେ କୋଭାକ୍ସିନ ଟିକା ବିଷୟରେ ଜଣାଇବା ସହ ଡାକ୍ତର ଆନ୍ଥୋନି ଫାଉଚି କରୋନା ଲଢ଼େଇରେ ଭାରତକୁ ବିଶ୍ୱ ଏବଂ ବିଶେଷକରି ଧନିକ ରାଷ୍ଟ୍ରମାନେ ବିଫଳ କରାଇଛନ୍ତି ବୋଲି କହିଥିଲେ। ଡାକ୍ତର ଫାଉଚି କହିଛନ୍ତି ଯେ, ଭାରତରେ ବ୍ୟାପିଚାଲିଥିବା ଏହି ଦୁଃଖଦାୟକ ଘଟଣାକୁ ପ୍ରତିରୋଧ କରିବା ଲାଗି ମିଳିତ ଉଦ୍ୟମ ସକାଶ ସମଗ୍ର ବିଶ୍ୱ ଏକଜୁଟ ହେବା ଉଚିତ ଥିଲା। ସମଗ୍ର ବିଶ୍ୱରେ ସମାନ ଭାବରେ ସ୍ୱାସ୍ଥ୍ୟ ସେବା ବ୍ୟବସ୍ଥା ଯୋଗାଇବାରେ ବିଫଳ ହୋଇଥିବା ବିଶ୍ୱର ଧନିକ ରାଷ୍ଟ୍ରମାନଙ୍କୁ ମଧ୍ୟ ସେ ତୀବ୍ର ସମାଲୋଚନା କରିଛନ୍ତି।

ସେ ଆହୁରି ମଧ୍ୟ କହିଛନ୍ତି, ଭାରତ ପରିସ୍ଥିତି ହେଉଛି ବୈଶ୍ୱିକ ଅସମାନତାର ଦୃଷ୍ଟାନ୍ତ। ଏହି ବୈଶ୍ୱିକ ମହାମାରୀକୁ ଠିକଣା ଭାବେ ମୁକାବିଲା କରିବାର ଏକମାତ୍ର ଉପାୟ ହେଉଛି ବୈଶ୍ୱିକ ମୁକାବିଲା। ବୈଶ୍ୱିକ ମୁକାବିଲାର ଅର୍ଥ ହେଉଛି ସମଗ୍ର ବିଶ୍ୱରେ ସମାନ ଭାବରେ ମୁକାବିଲା କରାଯିବା। ଦୁର୍ଯ୍ୟୋଗକୁ ତାହା ହୋଇ ପାରିନାହିଁ।