କଶ୍ମୀରରେ ଯଦି ସବୁ ଠିକ ତା’ହେଲେ କାହିଁକି ଶାହା ଲାଲ ଚୌକ୍ ପର୍ଯ୍ୟନ୍ତ ଚାଲୁନାହାଁନ୍ତି: ରାହୁଲ ଗାନ୍ଧୀ

ଶ୍ରୀନଗର: ରବିବାର ଦିନ ଜମ୍ମୁ କଶ୍ମୀରର ଶ୍ରୀନଗରରେ କଂଗ୍ରେସର ଭାରତ ଯୋଡୋ ଯାତ୍ରା ଶେଷ ପର୍ଯ୍ୟାୟରେ ପହଞ୍ଚିଛି। ଏହି ଅବସରରେ ରାହୁଲ ଗାନ୍ଧୀ ତ୍ରିରଙ୍ଗା ପତାକା ଉତ୍ତୋଳନ କରି ଏକ ସାମ୍ବାଦିକ ସମ୍ମିଳନୀ କରିଥିଲେ। ଏହି ସାମ୍ବାଦିକ ସମ୍ମିଳନୀରେ ସେ ପୁଣି ଥରେ ବିଜେପି ସରକାରକୁ ଟାର୍ଗେଟ କରିଥିବା ଦେଖାଯାଇଥିଲା। ରାହୁଲ ସିଧାସଳଖ ଗୃହମନ୍ତ୍ରୀ ଅମିତ ଶାହାଙ୍କୁ ଚ୍ୟାଲେଞ୍ଜ କରି କହିଥିଲେ ଯେ ଜମ୍ମୁ କଶ୍ମୀରରେ ଟାର୍ଗେଟ କିଲିଂ ଓ ବିସ୍ଫୋରଣ ଘଟୁଛି। ଯଦି ସୁରକ୍ଷା ବ୍ୟବସ୍ଥା ଏତେ ଭଲ ତେବେ ଲାଲ ଚୌକ୍ ଠାରୁ ଜମ୍ମୁକୁ କାହିଁକି ବିଜେପି ପଦଯାତ୍ରା କରୁନାହିଁ? ଗୃହମନ୍ତ୍ରୀ ଅମିତ ଶାହା ଜମ୍ମୁରୁ କଶ୍ମୀର ପର୍ଯ୍ୟନ୍ତ କାହିଁକି ଯାତ୍ରା କରୁନାହାନ୍ତି? ମୁଁ ଭାବୁନାହିଁ ଏଠାରେ ସୁରକ୍ଷା ବ୍ୟବସ୍ଥା ଭଲ ଅଛି।

ରାହୁଲ ଗାନ୍ଧୀ କହିଛନ୍ତି ଯେ ମୁଁ ଅବସରପ୍ରାପ୍ତ ଯବାନ ଏବଂ ଲଦାଖର ଲୋକଙ୍କୁ ଭେଟିଥିଲି। ସେମାନେ ମୋତେ କହିଲେ ଯେ ଚୀନ୍ ଆମ ଜମିର ୨୦୦୦ବର୍ଗ କିଲୋମିଟର ଜବରଦଖଲ କରିଛି। ଭାରତର ଅନେକ ପେଟ୍ରୋଲିୟମ କେନ୍ଦ୍ର ବର୍ତ୍ତମାନ ଚୀନ୍ ହାତରେ ଅଛି। ଏହିସବୁକୁ ଅସ୍ୱୀକାର କରିବା ସରକାରଙ୍କ ପାଇଁ ଅତ୍ୟନ୍ତ ବିପଜ୍ଜନକ। ଏହାଦ୍ୱାରା ଚୀନ୍‌ର ଆତ୍ମବିଶ୍ୱାସ ଆହୁରି ବଢ଼ିବ।

ରାହୁଲ ବିରୋଧୀ ଏକତା ଉପରେ ମଧ୍ୟ ଏକ ବିବୃତି ଦେଇ କହିଛନ୍ତି- ବିରୋଧୀ ଦଳରେ ଆସୁଥିବା ଏକତା କଥାବାର୍ତ୍ତା ମାଧ୍ୟମରେ ଆସିଥାଏ। ବିରୋଧୀଙ୍କ ମଧ୍ୟରେ ଏକତା ନାହିଁ ବୋଲି କହିବା ଠିକ୍ ନୁହେଁ। ବିରୋଧୀ ଦଳରେ ନିଶ୍ଚିତ ଭାବେ ପାର୍ଥକ୍ୟ ଅଛି, କିନ୍ତୁ ବିରୋଧୀ ଏକତ୍ର ଲଢ଼ିବେ। ଏହା ଏକ ଆଦର୍ଶର ଯୁଦ୍ଧ। ଗୋଟିଏ ପଟେ ଆରଏସଏସ-ବିଜେପି ଲୋକ ଏବଂ ଅନ୍ୟ ପଟେ ଅଣ ଆରଏସଏସ-ବିଜେପି ଲୋକ ଅଛନ୍ତି।