ବନାରସ ହିନ୍ଦୁ ବିଶ୍ୱବିଦ୍ୟାଳୟ ବିବାଦ : ଧର୍ମଘଟ ସ୍ଥଗିତ ରଖିଲା ଛାତ୍ର ସଂଗଠନ
ବାରାଣାସୀ : ମୁସଲିମ ସଂସ୍କୃତ ପ୍ରଫେସରଙ୍କ ନିଯୁକ୍ତି ପ୍ରତିବାଦରେ ବିଗତ ୧୫ ଦିନ ଧରି ଧର୍ମଘଟ କରୁଥିବା ବନାରସ ହିନ୍ଦୁ ବିଶ୍ୱବିଦ୍ୟାଳୟର ଛାତ୍ରଛାତ୍ରୀମାନେ ଶୁକ୍ରବାରଦିନ ନିଜର ଧର୍ମଘଟକୁ ସାମୟିକ ଭାବେ ସ୍ଥଗିତ ରହିଛନ୍ତି । ସେମାନଙ୍କ ଦାବି ମାନିବା ପାଇଁ ବିଶ୍ୱବିଦ୍ୟାଳୟ ପ୍ରଶାସନ ଓ ସରକାରଙ୍କୁ ୧୦ ଦିନ ସମୟ ଦିଆଯାଇଛି । ପ୍ରଫେସର ଫରୋଜ ଖାଁଙ୍କ ନିଯୁକ୍ତି ସବୁ ନିୟମ ଅନୁସାରେ ହୋଇଛି କି ନା ତାହା ଦର୍ଶାଇବାକୁ ବିଶ୍ୱବିଦ୍ୟାଳୟ କୁଳପତିଙ୍କ ଅଫିସକୁ ୧୦ ଦିନ ସମୟ ଦିଆଯାଇଛି ।
Sambad is now on WhatsApp
Join and get latest news updates delivered to you via WhatsApp
ପ୍ରଧାନମନ୍ତ୍ରୀ କାର୍ଯ୍ୟାଳୟ ପକ୍ଷରୁ ଏହି ଘଟଣା ସଂପର୍କରେ ରିପୋର୍ଟ ମଗାଯିବା ପରେ ଛାତ୍ରଛାତ୍ରୀମାନେ ଧର୍ମଘଟ ସ୍ଥଗିତ ରଖିବାକୁ ନିଷ୍ପତ୍ତି ନେଇଛନ୍ତି । ତେବେ ଦାବି ପୂରଣ ନହେବା ପର୍ଯ୍ୟନ୍ତ ସେମାନେ କ୍ଲାସକୁ ଫେରିବେ ନାହିଁ ବୋଲି କହିଛନ୍ତି । ଅନ୍ୟପକ୍ଷରେ ଆସନ୍ତା କାଲି ଛାତ୍ରସଂଗଠନର ଏକ ପ୍ରତିନିଧିମଣ୍ଡଳ ପ୍ରଧାନମନ୍ତ୍ରୀ କାର୍ଯ୍ୟାଳୟକୁ ଏକ ଦାବିପତ୍ର ପ୍ରଦାନ କରିବ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ବନାରସର ସାଂସଦ ହୋଇଥିବାରୁ ତାଙ୍କର ଏକ କାର୍ଯ୍ୟାଳୟ ବନାରସରେ ରହିଛି । ଏହି ଅଫିସ ମାଧ୍ୟମରେ ସେମାନେ ନିଜର ଦାବି ପତ୍ର ପ୍ରଦାନ କରିବେ ।
ଏହି ଛାତ୍ରଛାତ୍ରୀମାନେ ବିଶ୍ୱବିଦ୍ୟାଳୟର ସଂସ୍କୃତ ବିଦ୍ୟାଧର୍ମ ବିଭାଗରେ ମୁସଲିମ ପ୍ରଫେସର ଫିରୋଜ ଖାଁଙ୍କ ନିଯୁକ୍ତିକୁ ବିରୋଧ କରୁଛନ୍ତି ।