ଟ୍ରମ୍ପଙ୍କୁ ହ୍ୱାଇଟ୍ ହାଉସକୁ ନିମନ୍ତ୍ରଣ କଲେ ବାଇଡେନ

ୱାସିଂଟନ: ଉପରାଷ୍ଟ୍ରପତି କମଳା ହାରିସ ଶାନ୍ତିପୂର୍ଣ୍ଣ ଭାବେ କ୍ଷମତା ପରିବର୍ତ୍ତନକୁ ସମର୍ଥନ କରିବେ ବୋଲି ପ୍ରତିଶ୍ରୁତି ଦେବା ପରେ ରାଷ୍ଟ୍ରପତି ଜୋ ବାଇଡେନ୍ ନବନିର୍ବାଚିତ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ଏ ବାବଦ ଆଲୋଚନା କରିବାକୁ ହ୍ବାଇଟ୍‌ ହାଉସ୍‌କୁ ନିମନ୍ତ୍ରଣ କରିଛନ୍ତି। ଉପରାଷ୍ଟ୍ରପତି କମଳା ହାରିସ ଗତ ରାତିରେ ଏକ ଉତ୍ସାହଜନକ ଭାଷଣ ଦେଇ ଟ୍ରମ୍ପଙ୍କୁ ବିଜୟ ପାଇଁ ଅଭିନନ୍ଦନ ଜଣାଇବା ସହ ଶୃଙ୍ଖଳିତ ଭାବେ କ୍ଷମତା ହସ୍ତାନ୍ତର  ପ୍ରତିଶ୍ରୁତି ଦେଇଥିଲେ। ସେ ସମର୍ଥକଙ୍କୁ କହିଥିଲେ ଯେ, ଏହି ନିର୍ବାଚନ ଫଳାଫଳକୁ ଆମେ ଗ୍ରହଣ କରିବା ଉଚିତ। ଆମେ କୌଣସି ରାଷ୍ଟ୍ରପତି କିମ୍ବା ଦଳ ପ୍ରତି ନୁହେଁ, ବରଂ ସମ୍ବିଧାନ ପ୍ରତି ଆନୁଗତ୍ୟ ରଖୁଛୁ।

ରିପୋର୍ଟ ଅନୁଯାୟୀ, ନବନିର୍ବାଚିତ ରାଷ୍ଟ୍ରପତି ଟ୍ରମ୍ପ୍ ତାଙ୍କ ପ୍ରଶାସନକୁ ପ୍ରସ୍ତୁତ କରିବା ଆରମ୍ଭ କରିସାରିଛନ୍ତି। ତାଙ୍କ ପରାମର୍ଶଦାତାମାନେ ପ୍ରମୁଖ କ୍ୟାବିନେଟ୍ ଭୂମିକା ପାଇଁ ପ୍ରାର୍ଥୀ ତାଲିକା ପ୍ରସ୍ତୁତ କରିଥିବା ଜଣାଯାଇଛି। ଟ୍ରେଜେରି ସେକ୍ରେଟାରୀ (ଅର୍ଥମନ୍ତ୍ରୀ) ପଦ ପାଇଁ କୋଟିପତି ହେଜ୍ ଫଣ୍ଡ ନିବେଶକ ଜନ୍ ପଲ୍ସନ୍ ଓ ଅର୍ଥନୈତିକ ପରାମର୍ଶଦାତା ସ୍କଟ୍ ବେସେଣ୍ଟ ମୁଖ୍ୟ ଦାବିଦାର ରହିଛନ୍ତି। ବୈଦେଶିକ ସଚିବ (ବିଦେଶ ମନ୍ତ୍ରୀ) ପଦ ପାଇଁ ଟ୍ରମ୍ପଙ୍କ ଟିମ୍ ସିନେଟର ମାର୍କୋ ରୁବିଓ ଓ ନ୍ୟାସନାଲ ଇଣ୍ଟେଲିଜେନ୍ସର ପୂର୍ବତନ କାର୍ଯ୍ୟକାରୀ ନିର୍ଦ୍ଦେଶକ ରିଚାର୍ଡ ଗ୍ରେନେଲଙ୍କ ନାମ ଉପରେ ବିଚାର କରୁଛନ୍ତି। ଅନ୍ୟାନ୍ୟ ଉଲ୍ଲେଖନୀୟ ସମ୍ଭାବ୍ୟ ନିଯୁକ୍ତି ମଧ୍ୟରେ ଉତ୍ତର ଡାକୋଟା ଗଭର୍ଣ୍ଣର ଡଗ୍ ବର୍ଗମ୍ ଓ ପ୍ରାଥମିକ ପ୍ରତିଦ୍ୱନ୍ଦ୍ୱୀରୁ ସହଯୋଗୀ ପାଲଟିଥିବା ବିବେକ ରାମସ୍ୱାମୀଙ୍କୁ କ୍ୟାବିନେଟରେ ସ୍ଥାନ ମିଳିପାରେ ଏବଂ ପ୍ରତିରକ୍ଷା ସଚିବ ଭାବେ ସିନେଟର ଟମ୍ କଟନଙ୍କ ନାମ ବିଚାରାଧୀନ ରହିଛି।

ଟ୍ରମ୍ପଙ୍କ ଟ୍ରାଞ୍ଜିସନ୍ ଟିମ୍ ପାଇଁ ସର୍ବୋଚ୍ଚ ପ୍ରାଥମିକତା ହେଉଛି ଜଣେ ଚିଫ୍ ଅଫ୍ ଷ୍ଟାଫ୍ ଚୟନ କରିବା, ଯେଉଁଥିରେ ବ୍ରୁକ୍ ରୋଲିନ୍ସଙ୍କ ସହ ତାଙ୍କ କ୍ୟାମ୍ପେନ୍ ପରାମର୍ଶଦାତା ସୁସି ୱାଇଲ୍ସ ପ୍ରମୁଖ ଦାବିଦାର ଅଛନ୍ତି। ୱାସିଂଟନ ପୋଷ୍ଟର ଏକ ରିପୋର୍ଟ ଅନୁଯାୟୀ, ଟ୍ରମ୍ପଙ୍କ ପରାମର୍ଶଦାତାମାନେ ହଜାର ହଜାର ପ୍ରାର୍ଥୀଙ୍କୁ ଯାଞ୍ଚ କରି କେବଳ ବିଶ୍ୱସ୍ତଙ୍କୁ ଚୟନ କରିବାକୁ ଚେଷ୍ଟା କରିଛନ୍ତି, କାରଣ ଟ୍ରମ୍ପ ତାଙ୍କ କାର୍ଯ୍ୟସୂଚୀରେ ବାଧା ସୃଷ୍ଟି କରିବାର ସମ୍ଭାବନା ଥିବା ଅବିଶ୍ୱାସଜନକ ବ୍ୟକ୍ତିତ୍ୱଙ୍କୁ ଏଡ଼ାଇବାକୁ ଚାହାନ୍ତି। ଟ୍ରମ୍ପଙ୍କ ପ୍ରଚାର ଅଭିଯାନର ମୁଖପାତ୍ର କାରୋଲିନ୍ ଲିଭିଟ୍ ଏକ ବିବୃତିରେ କହିଛନ୍ତି ଯେ ଖୁବ୍ ଶୀଘ୍ର କ୍ୟାବିନେଟ୍ ତାଲିକା ଚୂଡ଼ାନ୍ତ କରାଯିବ। ଟ୍ରମ୍ପଙ୍କ ମୁଖପାତ୍ର ଷ୍ଟିଭେନ୍ ଚେଉଙ୍ଗ୍ ହ୍ୱାଇଟ୍ ହାଉସ୍‌ରେ ହେବାକୁ ଥିବା ଆଗାମୀ ବୈଠକକୁ ନିଶ୍ଚିତ କରିଛନ୍ତି। ଟିକାକୁ ବିରୋଧ କରୁଥିବା ରବର୍ଟ ଏଫ୍ କେନେଡି ଜୁନିୟର ସ୍ୱାସ୍ଥ୍ୟ ଓ ଖାଦ୍ୟ ନିରାପତ୍ତା ଏଜେନ୍ସିଗୁଡ଼ିକରେ ପରିବର୍ତ୍ତନର ନେତୃତ୍ୱ ନେଇପାରନ୍ତି ବୋଲି ଅନେକ ଆମେରିକୀୟ ଗଣମାଧ୍ୟମ ରିପୋର୍ଟରେ ଦାବି କରାଯାଇଛି।