କଏଦୀ ପିଛା ୫ କୋଟି ଟଙ୍କା ଖର୍ଚ୍ଚ ହେଉଥିବା ବିଶ୍ୱର ସବୁଠାରୁ ଦାମୀ ଜେଲକୁ ବନ୍ଦ କରିବାକୁ ବାଇଡେନଙ୍କ ଯୋଜନା
କାଲିଫର୍ଣ୍ଣିଆ: ବିଶ୍ୱର ସବୁଠାରୁ ଦାମୀ ଜେଲ ଭାବେ ପରିଚିତ ଗ୍ବାନ୍ତାନାମୋ ଜେଲକୁ ବନ୍ଦ କରିବାକୁ ଯୋଜନା କରୁଛନ୍ତି ବାଇଡେନ ସରକାର | ହ୍ୱାଇଟ ହାଉସ ପକ୍ଷରୁ କୁହାଯାଇଛି ଯେ,ଜେଲ ବନ୍ଦ କରିବାକୁ ବାଇଡେନ ପ୍ରଶାସନ ଗମ୍ଭୀରତାର ସହ ବିଚାର କରୁଛନ୍ତି | ତେବେ ବାଇଡେନ ପ୍ରଥମ ରାଷ୍ଟ୍ରପତି ନୁହନ୍ତି, ତାଙ୍କ ପୂର୍ବରୁ ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲଡ ଟ୍ରମ୍ପ ଓ ବାରାକ ଓବାମା ମଧ୍ୟ ଏହି ଜେଲକୁ ବନ୍ଦ କରିବାକୁ ଉଦ୍ୟମ କରିଥିଲେ | କିନ୍ତୁ ଏଥିରେ ଅସଫଳ ହୋଇଥିଲେ | ଏବେ ଆପଣଙ୍କ ମନରେ ପ୍ରଶ୍ନ ଉଠିବା ସ୍ୱାଭାବିକ ଗ୍ବାନ୍ତାନାମୋ ଜେଲ ସବୁଠାରୁ ଦାମୀ କାହିଁକି ଓ କ’ଣ ପାଇଁ ଏହାକୁ ବନ୍ଦ କରିବାକୁ ଆମେରିକା ସରକାର ଚାହୁଛନ୍ତି |
Sambad is now on WhatsApp
Join and get latest news updates delivered to you via WhatsApp
ସୂଚନା ଥାଉ କି ସେପ୍ଟେମ୍ବର ୧୧, ୨୦୦୧ରେ ଆମେରିକାରେ ଆତଙ୍କବାଦୀଙ୍କ ଆକ୍ରମଣ ପରେ ସେତେବେଳର ବୁଶ ସରକାର ଆଫଗାନିସ୍ତାନ, ଇରାକ ସମେତ ଦୁନିଆର ଅନ୍ୟ କିଛି ଦେଶରୁ ଶତାଧିକ ଆତଙ୍କବାଦୀଙ୍କୁ ଆଣି ଏହି ଜେଲରେ ବନ୍ଦୀ କରି ରଖିଥିଲେ | ଏହି ଜେଲକୁ କ୍ୟୁବାରେ ନିର୍ମାଣ କରାଯାଇଥିବା ବେଳେ କଏଦୀଙ୍କୁ ଅକଥନୀୟ ଯନ୍ତ୍ରଣା ଦିଆଯାଉଥିଲା | ୨୦୦୨ ମସିହାରେ ଏହି ଜେଲର କିଛି ଫଟୋ ଦୁନିଆ ନଜରକୁ ଆସିବା ପରେ ମାନବାଧିକାର କର୍ମୀମାନେ ସ୍ୱର ଉଠାଇଥିଲେ | ପରେ ଏହି ଜେଲକୁ ବନ୍ଦ କରିବାକୁ ଉଭୟ ବାରାକ ଓବାମା ଓ ଟ୍ରମ୍ପ ଉଦ୍ୟମ କରିଥିଲେ | କିନ୍ତୁ ଶାସନକାଳ ସରିଯାଇଥିଲେ ବି ବନ୍ଦ କରିପାରିନଥିଲେ | ବର୍ତ୍ତମାନ ଏହି ଜେଲରେ ୭ ଜଣ କଏଦୀ ଥିବାବେଳେ ୫ ଜଣଙ୍କ ନାମରେ ଆତଙ୍କବାଦୀ ଆକ୍ରମଣ କରିଥିବାର ଅଭିଯୋଗ ରହିଛି | ସେହିପରି ୨ ଜଣଙ୍କ ନାମରେ ଆତଙ୍କବାଦୀ ଆକ୍ରମଣ ପାଇଁ ବୋମା ପ୍ରସ୍ତୁତ ଭଳି ସଂଗୀନ ଅଭିଯୋଗ ରହିଛି |
ପ୍ରତି କଏଦୀଙ୍କ ପାଇଁ ଖର୍ଚ୍ଚ ହୁଏ ୫.୬ କୋଟି ଟଙ୍କା
ଏହି ଜେଲରେ ରହୁଥିବା ପ୍ରତିଟି କଏଦୀଙ୍କ ପାଇଁ ୫.୬ କୋଟି ଟଙ୍କା ଲେଖାଏଁ ଖର୍ଚ୍ଚ ହୋଇଥାଏ | ଏହା ଛଡା ଏହି ଜେଲର ରକ୍ଷଣାବେକ୍ଷଣ ପାଇଁ ବାର୍ଷିକ ୯ ଶହ କୋଟି ଟଙ୍କା ଖର୍ଚ୍ଚ କରିବାକୁ ପଡିଥାଏ | ତେଣୁ ମାନବାଧିକାର କର୍ମୀଙ୍କ ବିରୋଧ ସହ ଅତ୍ୟଧିକ ଖର୍ଚ୍ଚକୁ ନଜରରେ ରଖି ଏବେ ଜେଲ ବନ୍ଦ କରିବାକୁ ବାଇଡେନ ପ୍ରଶାସନ ଯୋଜନା କରୁଛି |