ଅଧ୍ୟାପନା ପାଇଁ ବାଇଡେନ ବର୍ଷକୁ ୧ ନିୟୁତ ଡଲାର ନେଇଛନ୍ତି, କିନ୍ତୁ ଦିନଟିଏ କ୍ଲାସ୍ କରିନାହାନ୍ତି

ୱାସିଂଟନ : ଆମେରିକା ରାଷ୍ଟ୍ରପତି ଜୋ ବାଇଡେନ ଉପରାଷ୍ଟ୍ରପତି ପଦରୁ ବିଦାୟ ନେବା ପରେ ପେନ୍‌ସିଲଭାନିଆ ବିଶ୍ବବିଦ୍ୟାଳୟ ତରଫରୁ ତାଙ୍କୁ ପ୍ରଫେସର ଭାବେ ନିଯୁକ୍ତି ଦିଆଯାଇଥିଲା। ସେଥିପାଇଁ ତାଙ୍କୁ ବର୍ଷକୁ ୧ ନିୟୁତ ଡଲାର ଦିଆଯାଉଥିଲେ ମଧ୍ୟ ସେ ଦିନଟିଏ ମଧ୍ୟ କ୍ଲାସ୍‌ରେ ପଢ଼ାଇ ନାହାନ୍ତି।
ମଙ୍ଗଳବାର ମେକ୍ସିକୋ ସିଟିରେ ଅନୁଷ୍ଠିତ ଉତ୍ତର ଆମେରିକା ନେତାମାନଙ୍କ ଶିଖର ସମ୍ମିଳନୀରେ ଭାଷଣ ଦେଇ ବାଇଡେନ କହିଥିଲେ ଯେ ସେ ଉପରାଷ୍ଟ୍ରପତି ପଦ ଛଡ଼ିବାର ୪ ବର୍ଷ ପରେ ପେନସିଲଭାନିଆ ବିଶ୍ବବିଦ୍ୟାଳୟର ପ୍ରଫେସର ଥିଲେ।

ଉଲ୍ଲେଖନୀୟ ଯେ ପ୍ରାୟ ଦୁଇବର୍ଷ ବିଶ୍ବବିଦ୍ୟାଳୟ ବାଇଡେନଙ୍କୁ ବର୍ଷକୁ ପ୍ରାୟ ୧ ନିୟୁତ ଡଲାର ପ୍ରଦାନ କରିଥିଲେ ହେଁ ସେ ଗୋଟିଏ ବି କ୍ଲାସ୍‌ରେ ପଢ଼ାଇ ନାହାନ୍ତି। ରିପବ୍ଲିକାନ ନ୍ୟାସନାଲ କମିଟିର ଗବେଷଣା ଶାଖା ବା ଆର୍‌ଏନ୍‌ସି ରିସର୍ଚ୍ଚ ପକ୍ଷରୁ ଏହି ତଥ୍ୟ ପ୍ରକାଶ କରାଯାଇଛି। ଆର୍‌ଏନ୍‌ସି ରିସର୍ଚ୍ଚର ରିପୋର୍ଟ ଅନୁସାରେ ପ୍ରଫେସର ଥିବା ନେଇ ବାଇଡେନ ବାରମ୍ବାର ମିଛ କହିଆସୁଛନ୍ତି। ଫିଲାଡେଲ୍‌ଫିଆ ସ୍କୁଲରେ ବାଇଡେନ ୨୦୧୭ରୁ ୨୦୧୯ ପର୍ଯ୍ୟନ୍ତ ସୌଜନ୍ୟମୂଳକ (ଅବୈତନିକ) ପ୍ରଫେସର ଥିଲେ। ଫିଲାଡେଲ୍‌ଫିଆ ଏନ୍‌କ୍ବେୟାରର୍‌ର ଅନୁସନ୍ଧାନମୂଳକ ରିପୋର୍ଟ ଅନୁସାରେ ଅବୈତନିକ ନୁହେଁ, ୨୦୧୭ରେ ବାଇଡେନଙ୍କୁ ୩୭୧,୧୫୯ ଏବଂ ୨୦୧୮ ଓ ୨୦୧୯ରେ ୫୪୦,୪୮୪ ଡଲାର ଦିଆଯାଇଥିଲା।

୨୦୧୭ରେ ବାଇଡେନ ସୌଜନ୍ୟମୂଳକ ପ୍ରଫେସର ପଦବି ଗ୍ରହଣ କରିଥିଲେ, ଯାହାକୁ କୁହାଯାଉଥିଲା ‘ବେଞ୍ଜାମିନ ଫ୍ରାଙ୍କଲିନ ପ୍ରେସିଡେନ୍ସିଆଲ ପ୍ରାକ୍ଟିସ୍ ପ୍ରଫେସର’। ସେ ମଧ୍ୟ ୱାସିଂଟନରେ ପେନ୍ ବାଇଡେନ ସେଣ୍ଟର ଫର୍ ଡିପ୍ଲୋମାସି ଆଣ୍ଡ୍ ଗ୍ଲୋବାଲ୍ ଏନ୍‌ଗେଜ୍‌ମେଣ୍ଟ ଏବଂ ଡେଲାୱେର ବିଶ୍ବବିଦ୍ୟାଳୟରେ ବାଇଡେନ୍ ଇନ୍‌ଷ୍ଟିଚ୍ୟୁଟ୍ ପ୍ରତିଷ୍ଠା କରିଥିଲେ। କିନ୍ତୁ ତାଙ୍କ ଭୂମିକା ଥିଲା ସୌଜନ୍ୟମୂଳକ। ସେ ଛାତ୍ରମାନଙ୍କୁ କ୍ୟାମ୍ପସରେ ଭାଷଣ ଦେଇଥିଲେ କିନ୍ତୁ ପୂରା ସିମେଷ୍ଟାର କୋର୍ସ ପଢ଼ାଇ ନ ଥିଲେ ବୋଲି ଉକ୍ତ ରିପୋର୍ଟରେ କୁହାଯାଇଛି।