ଆମେରିକାକୁ ବଡ଼ ଝଟକା: ୧୦୦ତୁର୍କୀ ଯୁଦ୍ଧବିମାନ କିଣିବାକୁ ସାଉଦି ଆରବର ଯୋଜନା

ରିୟାଦ: ସାଉଦି ଆରବ ଏହାର ପୁରୁଣା ବନ୍ଧୁ ଆମେରିକାକୁ ଏକ ବଡ଼ ଝଟକା ଦେବାକୁ ଯାଉଛି। ସାଉଦି  ଏହାର ବାୟୁସେନା ପାଇଁ ତୁର୍କୀରେ ବିକଶିତ ହେଉଥିବା ପଞ୍ଚମ ପିଢ଼ିର ଯୁଦ୍ଧ ବିମାନ 'କାନ୍' କିଣିବାକୁ ଯୋଜନା କରୁଛି। ସାଉଦି ଆରବ ଏକ ବଡ଼ କାରବାର ପାଇଁ ପ୍ରସ୍ତୁତ ହେଉଛି। ଯେଉଁଥି ପାଇଁ ୧୦୦ ଯୁଦ୍ଧ ବିମାନ ଅଧିଗ୍ରହଣ କରିବାକୁ ବିଚାର କରାଯାଉଛି।

ନିକଟରେ ରୟାଲ ସାଉଦି ବାୟୁସେନାର କମାଣ୍ଡର ପ୍ରିନ୍ସ ତୁର୍କି ବିନ୍ ବାନ୍ଦର ଅଲ ସଉଦ ତୁର୍କୀ ଗସ୍ତରେ ଯାଇଥିଲେ, ଯେଉଁଠାରେ କାନ୍ ଯୁଦ୍ଧ ବିମାନ କ୍ରୟ ପ୍ରସ୍ତାବ ଉପରେ ଆଲୋଚନା କରାଯାଇଥିଲା। ଏହି ଚୁକ୍ତିକୁ ତୁର୍କୀ ରାଷ୍ଟ୍ରପତି ରିସେପ୍ ତାଇପ ଏର୍ଦୋଗନଙ୍କ ଏହି ଅଞ୍ଚଳରେ ବୃଦ୍ଧି ପାଉଥିବା ପ୍ରଭାବର ଆଉ ଏକ ପ୍ରମାଣ ଭାବେ ଦେଖାଯାଉଛି।

ଏହି ଗସ୍ତ ସମୟରେ ପ୍ରିନ୍ସ କାନ୍ ଯୁଦ୍ଧ ବିମାନର ନିର୍ମାତା ରୋକେଟସନ, ଆସେଲସାନ ଏବଂ ତୁର୍କୀ ଏରୋସ୍ପେସ ଇଣ୍ଡଷ୍ଟ୍ରିଜ (ଟିଏଆଇ) ସମେତ ଅନେକ ତୁର୍କୀ ପ୍ରତିରକ୍ଷା କମ୍ପାନି ସହ ଆଲୋଚନା କରିଥିଲେ। ପ୍ରତିରକ୍ଷା ରିପୋର୍ଟରେ କୁହାଯାଇଛି ଯେ, ଏହି ଗସ୍ତ ସମୟରେ ପ୍ରିନ୍ସଙ୍କୁ ତୁର୍କୀ ଏବଂ ସାଉଦି ପ୍ରତିନିଧୀଙ୍କୁ କାନ୍ ଯୁଦ୍ଧ ବିମାନର ସାମର୍ଥ୍ୟ ବିଷୟରେ ସର୍ବଶେଷ ସୂଚନା ଦିଆଯାଇଥିଲା ଏବଂ ବିମାନ ସମ୍ବନ୍ଧରେ ଦୁଇ ଦେଶ ମଧ୍ୟରେ ସମ୍ଭାବ୍ୟ ରଣନୈତିକ ସହଯୋଗର ଅନୁସନ୍ଧାନ କରାଯାଇଥିଲା।

ପଞ୍ଚମ ପିଢ଼ିର ଯୁଦ୍ଧ ବିମାନ ଯୋଗାଇବା ପାଇଁ ସାଉଦି ଆରବ ଦ୍ରୁତ ଗତିରେ କାର୍ଯ୍ୟ କରୁଛି। ଦୁଇ ଦେଶ ମଧ୍ୟରେ ସମ୍ଭାବ୍ୟ ଚୁକ୍ତିରେ ସାଉଦି ଆରବରେ ଟେକ୍ନୋଲୋଜି ସ୍ଥାନାନ୍ତର ଏବଂ ପଞ୍ଚମ ପିଢ଼ିର ଯୁଦ୍ଧ ବିମାନର ସ୍ଥାନୀୟ ଉତ୍ପାଦନ ଅନ୍ତର୍ଭୁକ୍ତ ହେବ ବୋଲି ଆଶା କରାଯାଉଛି। ପ୍ରସ୍ତାବିତ ଅଧିଗ୍ରହଣ ଏହି ଅଞ୍ଚଳର ଦୁଇଟି ପ୍ରମୁଖ ଶକ୍ତି ଭାବରେ ସାଉଦି ଆରବ ଏବଂ ତୁର୍କୀର ପ୍ରତିରକ୍ଷା ସମ୍ପର୍କକୁ ମଜବୁତ କରିବ ବୋଲି କୁହାଯାଉଛି।

ଏହା ପୂର୍ବରୁ ମଧ୍ୟ  ତୁର୍କୀ ଏବଂ ସାଉଦି ଆରବ ମଧ୍ୟରେ ପ୍ରତିରକ୍ଷା ସମ୍ପର୍କ ମଜବୁତ ହୋଇସାରିଛି। ଗତ ବର୍ଷ ଜୁଲାଇ ୧୮ରେ, ସାଉଦି ଆରବ ତୁର୍କୀର ବେକର୍ ଟେକ୍ନୋଲୋଜି ଦ୍ୱାରା ନିର୍ମିତ ଆକିନି ଡ୍ରୋନ୍ କିଣିବା ପାଇଁ ୩ ବିଲିୟନ ଆମେରିକୀୟ ଡଲାର ବିନିଯୋଗ କରିବାକୁ ଯୋଜନା ଘୋଷଣା କରିଥିଲା।

ଅଧିକ ପଢ଼ନ୍ତୁ: ଅବତରଣ କରିବା ସମୟରେ ବିମାନ ଜଳିଗଲା: ଉଦ୍ଧାର କାର୍ଯ୍ୟ ଜାରି

ଏହି କ୍ରୟକୁ ତୁର୍କୀର ଆଜି ପର୍ଯ୍ୟନ୍ତ ସବୁଠାରୁ ବଡ ପ୍ରତିରକ୍ଷା ଚୁକ୍ତି ବୋଲି ସେତେବେ‌ଳେ କୁହାଯାଇଥିଲା। ଅଗଷ୍ଟ ୬ରେ ସାଉଦି ଆରବ ମିଲିଟାରୀ ଇଣ୍ଡଷ୍ଟ୍ରିଜ୍ ଘୋଷଣା କରିଥିଲା ​​ଯେ, ରାଜ୍ୟ ପାଇଁ କିଣାଯିବାକୁ ଥିବା ଆକିନି ଡ୍ରୋନ୍‌ର ୭୦ପ୍ରତିଶତ ଅଂଶ ଘରୋଇ ଉତ୍ପାଦନରେ ବିକଶିତ ହେବ।

ଅଧିକ ପଢ଼ନ୍ତୁ: କେବେ ଫେରାର ଜୁନାଗଡ଼ ଥାନା ଏ ଏସ ଆଇ ମୁକୁନ୍ଦ ଖେମୁଣ୍ଡୁଙ୍କୁ ଧରିବ ଭିଜିଲାନ୍ସ!