ସୁନୀତା ୱିଲିୟମ୍ସଙ୍କ ପାଇଁ ମହାକାଶରେ ବଡ଼ ବିପଦ! ଚୀନ୍‌ ରକେଟ୍ ବିସ୍ଫୋରଣ ହୋଇ ୭୦୦ ଖଣ୍ଡ ହେଲା, ସ୍ପେସ୍ ଷ୍ଟେସନ ଆଡକୁ ମାଡି ଆସୁଛି ଆବର୍ଜନା

ୱାଶିଂଟନ୍: ନାସାର ମହାକାଶଚାରୀ ସୁନୀତା ୱିଲିୟମ୍ସ ଏବଂ ବରୀ ୱିଲମୋର ଦୁଇ ମାସରୁ ଅଧିକ ସମୟ ଧରି ଅନ୍ତର୍ଜାତୀୟ ସ୍ପେସ୍ ଷ୍ଟେସନ୍ (ଆଇଏସ୍ଏସ୍)ରେ ଫସି ରହିଛନ୍ତି। ବର୍ତ୍ତମାନ ସେମାନଙ୍କ ପ୍ରତ୍ୟାବର୍ତ୍ତନ କରିବାର କୌଣସି ସମ୍ଭାବନା ନାହିଁ, ବରଂ ଏକ ଭୟ ଅଛି ଯେ ଉଭୟଙ୍କୁ ୬ ମାସ ପର୍ଯ୍ୟନ୍ତ ମହାକାଶରେ ରହିବାକୁ ପଡିପାରେ।

ଏହି ସମୟରେ, ଏକ ନୂତନ ରିପୋର୍ଟରୁ ଜଣାପଡିଛି ଏହି ମହାକାଶଚାରୀମାନଙ୍କ ପାଇଁ ମହାକାଶରେ ଚୀନ୍‌ର ବିପଦ ଆସୁଛି। ବିଜନେସ୍ ଟୁଡେ ରିପୋର୍ଟ ଅନୁଯାୟୀ, ନିକଟରେ ବିସ୍ଫୋରଣ ହୋଇଥିବା ଚାଇନିଜ୍ ରକେଟର ଆବର୍ଜନା ଏହି ମହାକାଶଚାରୀଙ୍କ ଆଡକୁ ମାଡି ଆସୁଛି। ଫଳରେ ସ୍ପେସ୍ ଷ୍ଟେସନରେ ଥିବା ମହାକାଶଚାରୀଙ୍କ ପାଇଁ ବଡ଼ ବିପଦ ରହିଛି।

ତାଇୟୁଆନ୍ ସାଟେଲାଇଟ୍ ଲଞ୍ଚ ସେଣ୍ଟରରୁ ଚାଇନାର ଲଙ୍ଗ ମାର୍ଚ୍ଚ ୬-ଏ ରକେଟ୍ ୧୮ ଜି୬୦ ଉପଗ୍ରହ ଉପସ୍ଥାପିତ କରିବା ପରେ ବିସ୍ଫୋରଣ ହୋଇଥିଲା। ଏହି ରକେଟର ୭୦୦ ରୁ ଅଧିକ ଖଣ୍ଡ ମହାକାଶରେ ବୁଲୁଛି। ଏହି ଆବର୍ଜନା ଏତେ ବଡ ଯେ ଏହା ୧୦୦୦ରୁ ଅଧିକ ଉପଗ୍ରହ ଉପରେ ପ୍ରଭାବ ପକାଇବାର ଆଶଙ୍କା ରହିଛି। ତେବେ ଆମେରିକାର ସ୍ପେସ୍ କମାଣ୍ଡରଙ୍କ ରିପୋର୍ଟରେ କୁହାଯାଇଛି ଯେ ଅନ୍ତର୍ଜାତୀୟ ସ୍ପେସ୍ ଷ୍ଟେସନ୍ ପାଇଁ କୌଣସି ବିପଦ ନାହିଁ।

ଲଙ୍ଗ ମାର୍ଚ୍ଚ ୬-ଏ ରକେଟ୍ ପୃଥିବୀ ପୃଷ୍ଠରୁ ୮୧୦ କିଲୋମିଟର ଉପରେ ବିସ୍ଫୋରଣ ହୋଇଥିଲା। ପୃଥିବୀଠାରୁ ୪୦୮ କିଲୋମିଟର ଉଚ୍ଚରେ ଥିବା ଆଇଏସଏସର ଉଚ୍ଚତାଠାରୁ ଏହା ବହୁତ ଅଧିକ। ଚାଇନାର ରକେଟ ବିସ୍ଫୋରଣ କେଉଁ କାରଣରୁ ହୋଇଛି ତାହା ଏପର୍ଯ୍ୟନ୍ତ ଜଣା ପଡିନାହିଁ। ବ୍ଲୁମବର୍ଗ ରିପୋର୍ଟ ଅନୁଯାୟୀ ଚୀନ୍ ଏହି ଆବର୍ଜନା ଉପରେ ନଜର ରଖିଛି।

ଚୀନ୍ ବୈଦେଶିକ ମନ୍ତ୍ରଣାଳୟ କହିଛି ଆମେ ଆବଶ୍ୟକୀୟ ପଦକ୍ଷେପ ନେଇଛୁ ଏବଂ କକ୍ଷପଥ ଉପରେ ତୀକ୍ଷଣ ନଜର ରଖାଯାଇଛି ଏବଂ ତଥ୍ୟ ବିଶ୍ଳେଷଣ ହେଉଛି। ଚୀନ୍ ବାହ୍ୟ ମହାକାଶ ପରିବେଶର ସୁରକ୍ଷାକୁ ପ୍ରୋତ୍ସାହିତ କରେ ଏବଂ ବାହ୍ୟ ମହାକାଶ କାର୍ଯ୍ୟକଳାପର ଦୀର୍ଘମିଆଦି ସ୍ଥିରତା ବଜାୟ ରଖେ ବୋଲି ବୈଦେଶିକ ମନ୍ତ୍ରଣାଳୟ କହିଛି।

ଚୀନ୍‌ର ରକେଟରେ ବିସ୍ଫୋରଣର ଏହା ପ୍ରଥମ ଘଟଣା ନୁହେଁ। ଏହାପୂର୍ବରୁ, ୨୦୨୨ମସିହାରେ ଏକ ସମାନ ଘଟଣା ଘଟିଥଲା। ଯେତେବେଳେ ଅନ୍ୟ ଏକ ଲଙ୍ଗ ମାର୍ଚ୍ଚ ୬-ଏ ରକେଟ୍ ବିସ୍ଫୋରଣ ହୋଇ ୫୦୦ରୁ ଅଧିକ ଖଣ୍ଡରେ ପରିଣତ ହୋଇଥିଲା। ଫଳରେ ଉପଗ୍ରହ ଏବଂ ଅନ୍ୟାନ୍ୟ ମହାକାଶ ବସ୍ତୁ ସହିତ ଏହି ଖଣ୍ଡଗୁଡ଼ିକର ଧକ୍କା ହେବାର ଆଶଙ୍କା ବଢ଼ିଯାଇଥିଲା।