ପାଟନା : ବିହାରର ପଶ୍ଚିମ ଚମ୍ପାରଣ ଜିଲ୍ଲାରେ ଜମି ବିବାଦକୁ କେନ୍ଦ୍ର କରି ଆଜି ଗୁଳିକାଣ୍ଡ ଘଟିଛି। ଏକ ବିବାଦୀୟ ଜମିକୁ ଯାଇ ପ୍ରତିବାଦ କରୁଥିବା ମହିଳାଙ୍କ ଉପରେ ଆଖିବୁଜା ଗୁଳିମାଡ଼ ହେବାରୁ ୫ଜଣ ଗୁରୁତର ଆହତ ହୋଇଛନ୍ତି। ସେମାନଙ୍କ ମଧ୍ୟରୁ ୨ ଜଣଙ୍କ ଅବସ୍ଥା ସଙ୍କଟାପନ୍ନ ରହିଛି । ନାକଟି ପଟୱାଡ଼ା ଗ୍ରାମରେ ୧୯୮୫ ମସିହାରୁ ଏକ ଜମିକୁ ନେଇ ବଡ଼ ଧରଣର ବିବାଦ ଲାଗି ରହିଥିଲା ଏବଂ ୨୦୦୪ ମସିହାରେ ଅଦାଲତ ଉକ୍ତ ଜମିର ମାଲିକାନାକୁ ଅଚଳ କରିଦେଇଥିଲେ। ଆଜି ସକାଳେ ଜମିର ପୂର୍ବ ମାଲିକ ଶିଶିର ଦୁବେ ଟ୍ରାକ୍ଟର ସହ ଜମିରେ ପହଞ୍ଚି କାମ ଆରମ୍ଭ କରିବାରୁ ଏହାକୁ ବିରୋଧ କରି କେତେକ ମହିଳା ସେଠାରେ ପହଞ୍ଚିଥିଲେ। ଏହାପରେ ଶିଶିର ଅଚାନକ ଉକ୍ତ ମହିଳାଙ୍କ ଉପରେ ଗୁଳିମାଡ଼ କରିଥିଲେ। ବରିଷ୍ଠ ପୁଲିସ ଅଧିକାରୀମାନେ ଘଟଣାସ୍ଥଳରେ ପହଞ୍ଚି ତଦନ୍ତ କରୁଛନ୍ତି।