ବିହାର ଭୋଟର ତାଲିକା ବିବାଦ: ସଂଶୋଧନ ଉପରେ ରହିତାଦେଶ ଲାଗିବନି

ନୂଆଦିଲ୍ଲୀ: ବିହାରରେ ଭୋଟର ତାଲିକାର ସ୍ୱତନ୍ତ୍ର ସଂଶୋଧନ (ଏସ୍ଆଇଆର୍) ପାଇଁ ଲୋକଙ୍କ ଆଧାର କାର୍ଡ, ଭୋଟର ପରିଚୟପତ୍ର ଓ ରାସନ କାର୍ଡ ଉପରେ ବିଚାର କରିବାକୁ ସୁପ୍ରିମ୍‌କୋର୍ଟ ଗୁରୁବାର ନିର୍ବାଚନ ଆୟୋଗଙ୍କୁ ନିର୍ଦ୍ଦେଶ ଦେଇଛନ୍ତି। ତେବେ ନିର୍ବାଚନ ହେବାକୁ ଥିବା ରାଜ୍ୟରେ ଏହି ପ୍ରକ୍ରିୟାର ସମୟକୁ ନେଇ ପ୍ରଶ୍ନ ଉଠିଛି। ଜଷ୍ଟିସ ସୁଧାଂଶୁ ଧୁଲିଆ ଓ ଜଷ୍ଟିସ ଜୟମାଲ୍ୟା ବାଗଚୀଙ୍କୁ ନେଇ ଗଠିତ ଆଂଶିକ କାର୍ଯ୍ୟ ଦିବସ  ଖଣ୍ଡପୀଠ ନିର୍ବାଚନ କମିସନଙ୍କର ଭୋଟର ତାଲିକା ସଂଶୋଧନ କରିବାର କ୍ଷମତା ଅଛି କି ନାହିଁ, ଏଥିରେ ଗ୍ରହଣ କରାଯାଇଥିବା ପ୍ରକ୍ରିୟା ଓ ଏହାର ସମୟ ସମ୍ପର୍କରେ ଜବାବ ରଖିବାକୁ କହିଛନ୍ତି। ତେବେ ସର୍ବୋଚ୍ଚ ନ୍ୟାୟାଳୟ ଆବେଦନକାରୀଙ୍କୁ ଏହି ପ୍ରକ୍ରିୟାକୁ କୃତ୍ରିମ କିମ୍ବା କାଳ୍ପନିକ କହିବାରୁ ଦୂରେଇ ରହିବାକୁ କହିଛନ୍ତି। ସୁପ୍ରିମ୍‌କୋର୍ଟ ପରବର୍ତ୍ତୀ ଶୁଣାଣି ଜୁଲାଇ ୨୮ତାରିଖକୁ ଧାର୍ଯ୍ୟ କରିବା ସହ ଏକ ସପ୍ତାହ ମଧ୍ୟରେ ସତ୍ୟପାଠ ଦାଖଲ କରିବାକୁ ନିର୍ବାଚନ କମିସନଙ୍କୁ ନିର୍ଦ୍ଦେଶ ଦେଇଛନ୍ତି।

ଆଧାର, ଭୋଟର କାର୍ଡ ଓ ରାସନ କାର୍ଡ ବ୍ୟବହାର କରିବାକୁ କହିଲେ ସୁପ୍ରିମ୍‌କୋର୍ଟ

ରାଜ୍ୟରେ ନାଗରିକତା ପ୍ରମାଣ ପାଇଁ ଆବଶ୍ୟକ ୧୧ଟି ତାଲିକାଭୁକ୍ତ ଦସ୍ତାବିଜରେ ଆଧାରକୁ ବାଦ୍ ଦିଆଯାଇଥିବା ନେଇ ସର୍ବୋଚ୍ଚ ନ୍ୟାୟାଳୟ ଚିନ୍ତା ପ୍ରକଟ କରିଛନ୍ତି। ବିହାରରେ ଭୋଟର ତାଲିକାର ସ୍ୱତନ୍ତ୍ର ସଂଶୋଧନରେ ଆପଣ ନାଗରିକତା ପ୍ରସଙ୍ଗ ଆଡ଼କୁ କାହିଁକି ଯାଉଛନ୍ତି? ଏହା ଗୃହ ମନ୍ତ୍ରଣାଳୟର ଅଧୀନରେ ଅଛି ବୋଲି ଖଣ୍ଡପୀଠ ନିର୍ବାଚନ କମିସନଙ୍କୁ କହିଛନ୍ତି। ଯଦି ଆପଣ ବିହାରରେ ଭୋଟର ତାଲିକାର ଏସ୍‌ଆଇଆର୍‌ ଅଧୀନରେ ନାଗରିକତା ଯାଞ୍ଚ କରିବାକୁ ଚାହୁଛନ୍ତି, ତେବେ ଏହା ଆଗରୁ କରିବାର ଥିଲା। ଅଦାଲତ କହିଛନ୍ତି ଯେ ଏସ୍‌ଆଇଆର୍‌ ପ୍ରକ୍ରିୟାରେ କିଛି ଭୁଲ ନାହିଁ ଏବଂ ଏହା ସାମ୍ବିଧାନିକ ଦୃଷ୍ଟିରୁ ବୈଧ।   ବର୍ଷ ଶେଷରେ ଆଗାମୀ ରାଜ୍ୟ କାର୍ଯ୍ୟସୂଚୀରେ ହେବାକୁ ଥିବା ନିର୍ବାଚନ ପ୍ରକ୍ରିୟାରୁ ଏହାକୁ ପୃଥକ କରି ସ୍ୱାଧୀନ ଭାବରେ କରାଯିବା ଉଚିତ ଥିଲା ବୋଲି ଖଣ୍ଡପୀଠ କହିଛନ୍ତି। ସୁପ୍ରିମ୍‌କୋର୍ଟ ଏହା ମଧ୍ୟ ସ୍ପଷ୍ଟ କରିଛନ୍ତି  ଯେ ଏହା ବିହାରରେ ଭୋଟର ତାଲିକା ସଂଶୋଧନ ଉପରେ ରୋକ୍ ଲଗାଇବା ସପକ୍ଷରେ ନାହାନ୍ତି କିନ୍ତୁ ଡ୍ରାଫ୍ଟ ତାଲିକା ପ୍ରକାଶ ପାଇବା ପୂର୍ବରୁ ଅଗଷ୍ଟ ୧ ସୁଦ୍ଧା ମାମଲା ତାଲିକାଭୁକ୍ତ କରିବାକୁ ରାଜି ହୋଇଛନ୍ତି।

ନୋଟିସ୍ ଓ ଶୁଣାଣିର ସୁଯୋଗ ନ ଦେଇ ବିହାରରେ କୌଣସି ବ୍ୟକ୍ତିଙ୍କୁ ଭୋଟର ତାଲିକାରୁ ହଟାଯିବ ନାହିଁ ବୋଲି ନିର୍ବାଚନ କମିସନ ସର୍ବୋଚ୍ଚ ନ୍ୟାୟାଳୟଙ୍କୁ କହିଛନ୍ତି। ନିର୍ବାଚନ ଆୟୋଗ କହିଛନ୍ତି ଯେ ସମୟକ୍ରମେ ଭୋଟରଙ୍କ ନାମ ଅନ୍ତର୍ଭୁକ୍ତ କରିବା କିମ୍ବା ବାଦ୍ ଦେବା ପାଇଁ ଭୋଟର ତାଲିକାରେ ସଂଶୋଧନ କରାଯିବାର ଆବଶ୍ୟକତା ରହିଛି। ନାଗରିକତା ଉପରେ ସୁପ୍ରିମ୍‌କୋର୍ଟଙ୍କ ମନ୍ତବ୍ୟ ଉପରେ ନିର୍ବାଚନ ଆୟୋଗ କହିଛନ୍ତି ଯେ ସମ୍ବିଧାନର ଧାରା ୩୨୬ ଅନୁଯାୟୀ ଭାରତରେ ଭୋଟର ହେବା ପାଇଁ ନାଗରିକତା ଯାଞ୍ଚ କରାଯିବା ଆବଶ୍ୟକ। ନେପାଳ, ବାଂଲାଦେଶ ଓ ମ୍ୟାମାର ଭଳି ଦେଶରୁ ଆସିଥିବା ବେଆଇନ ପ୍ରବାସୀଙ୍କ ବିରୋଧରେ କାର୍ଯ୍ୟାନୁଷ୍ଠାନର ଏକ ଅଂଶ ଭାବେ ଏହି ପ୍ରକ୍ରିୟା କରାଯାଇଛି ବୋଲି  ଦର୍ଶାଇ ନିର୍ବାଚନ କମିସନ ସାମ୍ବିଧାନିକ ବ୍ୟବସ୍ଥାକୁ ମନେ ପକାଇ ଦେଇଛନ୍ତି। ଭାରତର ସମ୍ବିଧାନ ସର୍ବୋଚ୍ଚ। ସମସ୍ତ ନାଗରିକ, ରାଜନୈତିକ ଦଳ ଓ ନିର୍ବାଚନ ଆୟୋଗ ସମ୍ବିଧାନକୁ ଅନୁସରଣ କରୁଛନ୍ତି ବୋଲି ନିର୍ବାଚନ କମିସନ ଏକ ବିବୃତିରେ କହିଛନ୍ତି।