ନୂଆଦିଲ୍ଲୀ: ସିଡିଏସ୍ ଜେନେରାଲ ବିପିନ ରାୱତ୍ । ସେନାରେ ଦୀର୍ଘ ୪୦ ବର୍ଷର କ୍ୟାରିଅର । ଗୁର୍ଖା ରାଇଫଲ୍ସରୁ ଦେଶର ପ୍ରଥମ ଚିଫ୍ ଅଫ୍ ଡିଫେନ୍ସ ଷ୍ଟାଫ୍ । ବୁଧବାର ତାମିଲନାଡୁର କୁନୁର ଜଙ୍ଗଲରେ ସେନା ହେଲିକପ୍ଟର ଦୁର୍ଘଟଣାରେ ପ୍ରାଣ ହରାଇଛନ୍ତି ରାୱତ୍ । ଦୁର୍ଘଟଣାଗ୍ରସ୍ତ ହେଲିକପ୍ଟରରେ ରାୱତଙ୍କ ସହିତ ତାଙ୍କ ପତ୍ନୀ ମଧୁଲିକା ଏବଂ ସେନାର ୧୧ ଜଣ ଅଫିସର ଥିଲେ । ଜେନେରାଲ ବିପିନ ରାୱତ୍ ୨୦୧୬ ଡିସେମ୍ବର ୩୧ ତାରିଖରୁ ୨୦୧୯ ଡିସେମ୍ବର ୩୧ ଯାଏ ସ୍ଥଳସେନା ମୁଖ୍ୟ ଭାବେ ଦାୟିତ୍ୱ ସମ୍ଭାଳିଥିଲେ । ଏହାପରେ ୨୦୨୦ ଜାନୁଆରୀ ୧ ତାରିଖରୁ ସେ ଦେଶର ପ୍ରଥମ ଚିଫ୍ ଅଫ୍ ଡିଫେନ୍ସ ଷ୍ଟାଫ୍( ସିଡିଏସ୍) ବା ସେନାର ମୁଖ୍ୟ ଭାବେ ନିଯୁକ୍ତ ହୋଇଥିଲେ । ସିଡିଏସ୍ ଦାୟିତ୍ୱ ଗ୍ରହଣ କରିବା ପରେ ସେନାକୁ ଇଂଟିଗ୍ରେଟେଡ୍ ଥିଏଟର କମାଣ୍ଡଠାରୁ ଆଧୁନିକୀକରଣ କରିବାକୁ ରାୱତ୍ ପ୍ରୟାସ ଚଳାଇଥିଲେ ।
Sambad is now on WhatsApp
Join and get latest news updates delivered to you via WhatsApp
୧୯୫୮ ମସିହା ମାର୍ଚ୍ଚ ୧୬ ତାରିଖରେ ଜେନେରାଲ ବିପିନ ଲକ୍ଷ୍ମଣ ସିଂହ ରାୱତ ଉତ୍ତରାଖଣ୍ଡର ପୌରିରେ ଏକ ରାଜପୁତ ପରିବାରରେ ଜନ୍ମଗ୍ରହଣ କରିଥିଲେ। ବାପା ଲେଫ୍ଟନାଂଟ୍ ଜେନେରାଲ ଲକ୍ଷ୍ମଣ ସିଂହ ରାୱତ୍ ଥିଲେ ଜଣେ ସେନା ଅଫିସର । ୱେଲିଙ୍ଗଟନସ୍ଥିତ ଡିଫେନ୍ସ ସର୍ଭିସେସ୍ ଷ୍ଟାଫ୍ କଲେଜରୁ ଗ୍ରାଜୁଏସନ ପରେ ୧୯୭୮ ମସିହାରେ ୧୧-ଗୋର୍ଖା ରାଇଫଲ୍ସର ପଂଚମ ବାଟାଲିଅନରେ ଯୋଗ ଦେଇଥିଲେ ରାୱତ୍ । ପରବର୍ତୀ ସମୟରେ ସେ ଏହି ବାଟାଲିୟନର ନେତୃତ୍ୱ ନେଇଥିଲେ । ପରେ ବ୍ରିଗେଡିୟର, ମେଜର ଜେନେରାଲ, ଲେଫ୍ଟନାଂଟ୍ ଜେନେରାଲ ଭାବେ ନିଜର ଦକ୍ଷତା ପ୍ରଦର୍ଶନ କରିଥିଲେ ।
୨୦୧୬ ସେପ୍ଟେମ୍ବର ୧ ତାରିଖରେ ଭାଇସ୍ ଚିଫ୍ ଅଫ୍ ଆର୍ମି ଷ୍ଟାଫ୍ ଏବଂ ସେହିବର୍ଷ ଡିସେମ୍ବର ୩୧ ତାରିଖରେ ୨୬ ତମ ସ୍ଥଳସେନା ମୁଖ୍ୟ ଭାବେ ନିଯୁକ୍ତ ହୋଇଥିଲେ ରାୱତ୍ । ଏହି ଦାୟିତ୍ବକୁ ସଫଳତାର ସହିତ ୩ ବର୍ଷ ଦାୟିତ୍ୱ ତୁଲାଇବା ପରେ ୨୦୨୦ ଜାନୁଆରୀ ୧ ତାରିଖରେ ଜେନେରାଲ ବିପିନ ରାୱତଙ୍କୁ ସରକାର ପ୍ରଥମ ସିଡିଏସ୍ ଭାବେ ନିଯୁକ୍ତ କରିଥିଲେ । ସେନାରେ ଉଲ୍ଲେଖନୀୟ ଅବଦାନ ପାଇଁ ତାଙ୍କୁ ପରମ ବିଶିଷ୍ଟ ସେବା ମେଡାଲ, ଉତ୍ତମ ଯୁଦ୍ଧ ସେବା ମେଡାଲ, ଅତି ବିଶିଷ୍ଟ ସେବା ମେଡାଲ, ଯୁଦ୍ଧ ସେବା ମେଡାଲ ଆଦି ପ୍ରଦାନ କରାଯାଇଥିଲା ।