ନିରବଙ୍କ କମ୍ପାନିରେ କଂଗ୍ରେସ ନେତା ଅଭିଷେକ ମନୁ ସିଂଗଭିଙ୍କ ପତ୍ନୀଙ୍କ ଅଂଶଧନ ରହିଛି, ଅଭିଯୋଗ ଆଣିଲା ବିଜେପି
ନୂଆଦିଲ୍ଲୀ : ନିରବ ମୋଦି ଠକେଇ ମାମଲାରେ ପୁଣି ଥରେ ମୁହାଁ ମୁହିଁ ହୋଇଛନ୍ତି ଦେଶର ଦୁଇ ପ୍ରମୁଖ ରାଜନୈତିକ ଦଳ ବିଜେପି ଓ କଂଗ୍ରେସ । ନିରବ ମୋଦିଙ୍କ କମ୍ପାନି ଫାୟାରଷ୍ଟାର ଇଣ୍ଟରନାସନାଲରେ କଂଗ୍ରେସ ନେତା ଅଭିଷେକ ମନୁ ସିଂଗଭିଙ୍କ ପତ୍ନୀ ଅନିତା ସିଂଗଭି ଓ ପୁତ୍ରଙ୍କ ଅଂଶଧନ ଥିବା ବିଜେପି ଅଭିଯୋଗ କରିଛି ।
Sambad is now on WhatsApp
Join and get latest news updates delivered to you via WhatsApp
ପ୍ରତିରକ୍ଷା ମନ୍ତ୍ରୀ ତଥା ବିଜେପି ନେତା ନିର୍ମଳା ସୀତାରମଣ କହିଛନ୍ତି ଯେ ମୁମ୍ବଇର ଲୋୟର ପରେଲରେ ସ୍ଥିତ ଟ୍ରେଡ ପଏଣ୍ଟ ବିଲଡିଂରେ ସିଂଗଭି ପରିବାର ମାଲିକାନାରେ ଥିବା ଅଦ୍ୱୈତ ହୋଲଡିଂସର ଏକ କମର୍ସିଆଲ ଫ୍ଲାଟ୍ ରହିଛି । ଏହି ଫ୍ଲାଟରେ ହିଁ ନିରବଙ୍କ କମ୍ପାନି ଫାୟାରଷ୍ଟାର ଇଣ୍ଟରନାସନାଲର ଅଫିସ ରହିଛି । ଅନିତା ସିଂଗଭି ଓ ତାଙ୍କ ପୁତ୍ର ଗତ ୨୦୦୨ରୁ ନିରବଙ୍କ କମ୍ପାନିରେ ସେୟାରଧାରୀ ଅଛନ୍ତି ବୋଲି ସେ ଅଭିଯୋଗ କରିଛନ୍ତି ।
ତେବେ ଏହି ଅଭିଯୋଗକୁ ଦୃଢଭାବେ ଖଣ୍ଡନ କରିଛନ୍ତିି କଂଗ୍ରେସ ନେତା ମନୁ ସିଂଗଭି । ସେ କହିଛନ୍ତି ଯେ ନିରବଙ୍କ କମ୍ପାନି ସହ ତାଙ୍କର ବା ତାଙ୍କ ପରିବାରର କୌଣସି ସଂପର୍କ ନାହିଁ । କେବଳ ତାଙ୍କ ମାଲିକାନାରେ ଥିବା କୋଠାରେ ଫାୟାରଷ୍ଟାର ଇଣ୍ଟରନାସନାଲର ଅଫିସ ଭଡ଼ାରେ ଚାଲିଥିଲା । କିନ୍ତୁ ଗତ ଡିସେମ୍ବର ମାସରୁ ଏହି ଭଡ଼ା ଚୁକ୍ତିର ମିଆଦ ସମାପ୍ତ ହୋଇଯାଇଛି । ଏଭଳି ମିଥ୍ୟା ଅଭିଯୋଗ ପାଇଁ ସେ ନିର୍ମଳା ଓ ତାଙ୍କ ଟିମ ବିରୋଧରେ ମାନହାନୀ ମକଦ୍ଦମା କରିବେ ବୋଲି ଧମକ ଦେଇଛନ୍ତି ।