ବିଜେପି ଆୟରେ ୧୩୪%, କଂଗ୍ରେସର ୩୬୧% ବୃଦ୍ଧି
ନୂଆଦିଲ୍ଲୀ: ବିଜେପିର ଆୟ ୨୦୧୮-୧୯ରେ ଦୁଇଗୁଣ ହୋଇଛି। ନିର୍ବାଚନ କମିସନ୍ରେ ବିଜେପି ଦ୍ବାରା ଦାଖଲ କରାଯାଇଥିବା ୨୦୧୮-୧୯ ଅଡିଟ୍ ରିପୋର୍ଟରୁ ଜଣାପଡ଼ିଛି ଯେ ବିଜେପିର ରୋଜଗାର ୨୦୧୮-୧୯ରେ ୨,୪୧୦ କୋଟିରୁ ଅଧିକ ଥିଲା। ୨୦୧୭-୧୮ ଅଡିଟ୍ ରିପୋର୍ଟରେ ବିଜେପିର ଆୟ ୧୦୨୭ କୋଟି ଥିଲା ବୋଲି ଦର୍ଶାଯାଇଥିଲା। ତେବେ ୨୦୧୮-୧୯ରେ ଏହା ୧୩୪ ପ୍ରତିଶତ ବୃଦ୍ଧି ପାଇଛି। ଅଡିଟ୍ ରିପୋର୍ଟ ଅନୁଯାୟୀ ୧୪୫୦ କୋଟିରୁ ଅଧିକ ଟଙ୍କା କେବଳ ନିର୍ବାଚନୀ ବଣ୍ଡ୍ରୁ ଆସିଛି। ୨୦୧୮-୧୯ରେ ବିଜେପି ଦ୍ବାରା ୨୦୧୮-୧୯ରେ ୧୦୦୫ କୋଟିରୁ ଅଧିକ ଖର୍ଚ୍ଚ ହୋଇଥିବା ଘୋଷଣା କରାଯାଇଛି। ଦଳର ବାର୍ଷିକ ରିପୋର୍ଟରେ ଦର୍ଶାଯାଇଛି ଯେ ବିତ୍ତିୟ ବର୍ଷ ପାଇଁ ୭୯୧.୪ କୋଟିରୁ ଅଧିକ ଟଙ୍କା ନିର୍ବାଚନ ଏବଂ ସାଧାରଣ ପ୍ରଚାରରେ ଖର୍ଚ୍ଚ କରାଯାଇଛି। ୨୦୧୭-୧୮ର ଖର୍ଚ୍ଚ ତୁଳନାରେ ଏହା ୩୨ ପ୍ରତିଶତ ବୃଦ୍ଧି ପାଇଛି। ୨୦୧୭-୧୮ରେ ଏହି ଖର୍ଚ୍ଚ ୭୫୮ କୋଟି ଥିଲା।
Sambad is now on WhatsApp
Join and get latest news updates delivered to you via WhatsApp
ଅନ୍ୟପକ୍ଷେ କଂଗ୍ରେସ ଦ୍ବାରା ନିର୍ବାଚନ କମିସନ୍ଙ୍କ ନିକଟରେ ଦାଖଲ ହୋଇଥିବା ଅଡିଟ୍ ରିପୋର୍ଟରେ କୁହାଯାଇଛି ଯେ, ଦଳର ରୋଜଗାର ୩୬୧ ପ୍ରତିଶତ ବୃଦ୍ଧି ପାଇଛି। ଦଳ ୨୦୧୮-୧୯ରେ ୯୧୮ କୋଟି ଟଙ୍କା ଆୟ କରିଛି। ୨୦୧୭-୧୮ରେ ଏହାର ଆୟ ୧୯୯ କୋଟି ଟଙ୍କା ଥିଲା। ୨୦୧୮-୧୯ ଆୟରୁ ୩୮୩ କୋଟି ନିର୍ବାଚନୀ ବଣ୍ଡ୍ରୁ ଆସିଛି ବୋଲି କୁହାଯାଇଛି। ତେବେ ୨୦୧୭-୧୮ ତୁଳନାରେ ଏହା ଯଥେଷ୍ଟ ବୃଦ୍ଧି ପାଇଛି। ୨୦୧୭ -୧୮ରେ ନିର୍ବାଚନୀ ବଣ୍ଡ୍ରୁ ଦଳ ୫ ଲକ୍ଷ ରୋଜଗାର କରିଥିବା କୁହାଯାଇଥିଲା। କଂଗ୍ରେସ ୨୦୧୮-୧୯ରେ ୩୦୯ କୋଟି ନିର୍ବାଚନୀ ଖର୍ଚ୍ଚ କରିଥିବା ଘୋଷଣା କରିଛି। ଦଳ ପ୍ରଚାର ପାଇଁ ୭୮ କୋଟି ଟଙ୍କା ଖର୍ଚ୍ଚ କରିଥିବା ଉଲ୍ଲେଖ କରିଛି।