ନୂଆଦିଲ୍ଲୀ: ଝାଡ଼ଖଣ୍ଡରେ ଆଦିବାସୀ ଭୋଟର୍‌ଙ୍କୁ ନିଜ ପଟକୁ ଆଣିବାରେ ବିଜେପିର ରଣନୀତି ବିଫଳ ହେବାରୁ ଏନ୍‌ଡିଏକୁ ବହୁତ ବଡ଼ ଝଟ୍‌କା  ମିଳିଛି।   ଅନୁପ୍ରବେଶ ଭଳି ପ୍ରସଙ୍ଗ ଜୋରଦାର ଢଙ୍ଗରେ ଉଠାଇଥିବା ବିଜେପି ଚଳିତ ନିର୍ବାଚନରେ ନିରାଶ ହୋଇଛି।  ଝାଡ଼ଖଣ୍ଡରେ କ୍ଷମତା ଫେରାଇ ଆଣିବା ପାଇଁ ବିଜେପି ବାବୁଲାଲ ମାରାଣ୍ଡି, ଅର୍ଜୁନ ମୁଣ୍ଡାଙ୍କ ଭଳି ପୁରୁଣା ଚେହେରାଙ୍କୁ ନେଇ ନିର୍ବାଚନ ଲଢ଼ିଥିଲା ଏବଂ ଏହି ପ୍ରୟାସ ଦଳକୁ ପରାଜୟ ଭିତରକୁ ଠେଲି ଦେଇଛି। କିଛି ବିଜେପି ନେତାଙ୍କ କହିବାନୁସାରେ ହେମନ୍ତ ସୋରେନ ସରକାର  ନୂତନ ଆର୍ଥିକ ସହାୟତା ଯୋଜନାଗୁଡ଼ିକ ‘ଗେମ୍‌ ଚେଂଜର୍‌’ ସାବ୍ୟସ୍ତ ହୋଇଛି। ଏହି ଯୋଜନା ଶାସକ ମେଣ୍ଟ ସପକ୍ଷରେ ଯାଇଛି ଏବଂ ମହିଳା ଭୋଟର୍‌ମାନେ ବହୁ ସଂଖ୍ୟାରେ ସରକାରକୁ ସମର୍ଥନ କରିଛନ୍ତି।  

Advertisment

ନୂଆ ଆଦିବାସୀ ନେତୃତ୍ୱ ପାଇଁ ଦାବି
ପୁରୁଣା ଚେହେରାଙ୍କୁ ଭୋଟର୍‌ ଗ୍ରହଣ କଲେନି
ଚମ୍ପାଇ ସୋରେନଙ୍କ ରଣନୀତି କାମ ଦେଲାନି

ଝାଡ଼ଖଣ୍ଡ ବିଜେପିର ଜଣେ ବରିଷ୍ଠ ନେତା କହିଛନ୍ତି ଯେ ଦଳର ପରାଜୟର ବିସ୍ତୃତ ସମୀକ୍ଷା କରାଯିବ ।  ପ୍ରାଥମିକ ଦୃଷ୍ଟିରୁ ଏହା ଜଣାପଡୁଛି ଯେ ଏହାର ଆଦିବାସୀ ଚେହେରା ସମ୍ପ୍ରଦାୟର ଭୋଟ୍ ନେବାରେ ବିଫଳ ହୋଇଛନ୍ତି। ବାବୁଲାଲ ମାରାଣ୍ଡି ଓ ଅର୍ଜୁନ ମୁଣ୍ଡାଙ୍କ ଭଳି ପୁରୁଣା ଚେହେରାଙ୍କୁ ଦଳ ଏବେ ବି ଉପସ୍ଥାପିତ କରୁଛି, ଯେଉଁମାନେ ଜନସାଧାରଣଙ୍କ ମଧ୍ୟରେ ଗ୍ରହଣୀୟତା ହରାଇଛନ୍ତି। ସାଧାରଣ ଜନତା ନେତୃତ୍ୱ ପରିବର୍ତ୍ତନ ଚାହୁଥିବା ବେଳେ ଦଳ କିନ୍ତୁ ପୁରୁଣା ନୀତିରେ କାଏମ ରହିବା ମହଙ୍ଗା ସାବ୍ୟସ୍ତ ହୋଇଛି ବୋଲି ସେ କହିଛନ୍ତି। ନିଜର ଆଦିବାସୀ ନେତୃତ୍ୱକୁ ସୁଦୃଢ଼ କରିବା ପାଇଁ ବିଜେପି ଜେଏମଏମର ପୂର୍ବତନ ମୁଖ୍ୟମନ୍ତ୍ରୀ ଚମ୍ପାଇ ସୋରେନ ଏବଂ ହେମନ୍ତ ସୋରେନଙ୍କ ଭାଉଜ ସୀତା ସୋରେନଙ୍କୁ ମଧ୍ୟ ଦଳରେ ସାମିଲ କରିଥିଲା। ତେବେ ସେମାନେ ଆଦିବାସୀ ଭୋଟର୍‌ଙ୍କୁ ବିଶେଷ ପ୍ରଭାବିତ କରିପାରି ନାହାନ୍ତି ବୋଲି ଅନ୍ୟ ଜଣେ ବିଜେପି ନେତା କହିଛନ୍ତି।  ଆଦିବାସୀ ଅଂଚଳରେ ଅନୁପ୍ରବେଶ ଏବଂ ଆଦିବାସୀ ଜନସଂଖ୍ୟା ହ୍ରାସ ପାଉଥିବା ନେଇ ବିଜେପିର ବୟାନକୁ ମଧ୍ୟ ଅନେକ ଭୋଟର୍‌ ଗ୍ରହଣ କରିନାହାନ୍ତି। ଆସାମ ମୁଖ୍ୟମନ୍ତ୍ରୀ ହେମନ୍ତ ବିଶ୍ୱ ଶର୍ମା  (ଝାଡ଼ଖଣ୍ଡ ନିର୍ବାଚନ ସହ-ପ୍ରଭାରୀ) ବିଭିନ୍ନ ସମୟରେ ଉତ୍ତେଜନକ ବୟାନ ଦେଇଥିଲେ ଏବଂ ଏହା ଦ୍ବାରା ବିଜେପି ବିରୋଧରେ ଭିନ୍ନ ବାତାବରଣ ସୃଷ୍ଟି ହୋଇଥିଲା ବୋଲି କେତେକ ସ୍ଥାନୀୟ ନେତା କହିଛନ୍ତି।