ଜେଲରେ ମୋ ସ୍ୱାମୀଙ୍କୁ ହତ୍ୟା କରିବାକୁ ଚାହୁଁଛନ୍ତି ବିଜେପି ସରକାର: ସୁନୀତା
ନୂଆଦିଲ୍ଲୀ: ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ପତ୍ନୀ ସୁନୀତା କେଜ୍ରିଓ୍ଵାଲ ରବିବାର ଅଭିଯୋଗ କରିଛନ୍ତି ଯେ ଭାରତୀୟ ଜନତା ପାର୍ଟି (ବିଜେପି) ନେତୃତ୍ୱାଧୀନ କେନ୍ଦ୍ର ସରକାର ତାଙ୍କ ସ୍ୱାମୀଙ୍କୁ ହତ୍ୟା କରିବାକୁ ଚାହୁଁଛନ୍ତି।
ସେ ଦୃଢ଼ୋକ୍ତି ପ୍ରକାଶ କରିଛନ୍ତି ଯେ ବିରୋଧୀ ଇଣ୍ଡିଆନ୍ ନ୍ୟାସନାଲ ଡେଭଲପମେଣ୍ଟାଲ ଇନକ୍ଲୁସିଭ୍ ଆଲାଏନ୍ସ (ଇଣ୍ଡିଆ) ବିଜେପିର ଏକଛତ୍ରବାଦ ବିରୋଧରେ ଲଢ଼େଇ କରିବ ଏବଂ ଜିତିବ।
Sambad is now on WhatsApp
Join and get latest news updates delivered to you via WhatsApp
‘ସେମାନେ ମୋ ସ୍ୱାମୀ ଅରବିନ୍ଦ କେଜ୍ରିୱାଲଙ୍କୁ ହତ୍ୟା କରିବାକୁ ଚାହୁଁଛନ୍ତି। ତାଙ୍କ ଖାଦ୍ୟ କ୍ୟାମେରା ନିରୀକ୍ଷଣରେ ଅଛି। ତାଙ୍କୁ ମିଠା ଜିନିଷ ଖାଇବାକୁ ମନା କରାଯାଏ। ମୋ ସ୍ୱାମୀ ଜଣେ ‘ସୁଗାର୍’ ରୋଗୀ ଯିଏ କି ୧୨ ବର୍ଷ ଧରି ଇନସୁଲିନ ନେଉଛନ୍ତି। ତାଙ୍କୁ ଦୈନିକ ୫୦ ୟୁନିଟ୍ ଇନସୁଲିନ ଦରକାର’ ବୋଲି ରାଞ୍ଚିର ଉଲଗୁଲାନ୍ ନ୍ୟାୟ ରାଲିରେ ସୁନୀତା କହିଛନ୍ତି।
ସେ ଦାବି କରିଛନ୍ତି ଯେ ତାଙ୍କ ସ୍ୱାମୀ ‘ଜନସେବା’ କରିବା ପାଇଁ ଯାଇଥିଲେ ଏବଂ ତାଙ୍କ ବିରୋଧରେ କୌଣସି ଅଭିଯୋଗ ପ୍ରମାଣିତ ହୋଇପାରିବ ନାହିଁ। ଆମେ ଏକଛତ୍ରବାଦ ବିରୋଧରେ ଲଢ଼ିବୁ ଏବଂ ଜିତିବୁ। ଜେଲର ଦ୍ୱାର ଭାଙ୍ଗିଯିବ ଏବଂ ଅରବିନ୍ଦ କେଜ୍ରିୱାଲ ଓ ହେମନ୍ତ ସୋରେନ ବାହାରକୁ ଆସିବେ।
ବର୍ତ୍ତମାନ ରଦ୍ଦ ହୋଇଥିବା ଦିଲ୍ଲୀ ଅବକାରୀ ନୀତି ସହ ଜଡିତ ମନି ଲଣ୍ଡରିଂ ମାମଲାରେ କେଜ୍ରିୱାଲଙ୍କୁ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ମାର୍ଚ୍ଚ ୨୧ରେ ଗିରଫ କରିଥିଲା। ତାଙ୍କୁ ତିହାର ଜେଲରେ ରଖାଯାଇଛି। ଜାନୁଆରି ୩୧ ତାରିଖ ରାତିରେ ଇଡି ସୋରେନଙ୍କୁ ଜମି ଠକେଇ ମାମଲାରେ ଗିରଫ କରିଥିଲା।