ଭଗବାନ ରାମଙ୍କ ଅସ୍ତିତ୍ୱରେ ବିଶ୍ୱାସ କରୁନଥିବା ଦଳ ନିଜକୁ ପାଣ୍ଡବ କହୁଛି : ବିଜେପି

ନୂଆଦିଲ୍ଲୀ: କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧିଙ୍କ ବିଜେପି ବିରୋଧୀ ବକ୍ତବ୍ୟକୁ ନେଇ କଡା ପ୍ରତିକ୍ରିୟା ରଖିଛି ବିଜେପି । ଭଗବାନ ରାମଙ୍କ ଅସ୍ତିତ୍ୱରେ ବିଶ୍ୱାସ କରୁନଥିବା ଦଳ ଏବେ ନିଜକୁ ପାଣ୍ଡବ ବୋଲି କହୁଛନ୍ତି । ହିନ୍ଦୁ ସଂସ୍କୃତିକୁ ବିଦ୍ରୁପ କରୁଥିବା ଦଳ ନିଜକୁ ପାଣ୍ଡବ କହୁଛି ।  କହିଛନ୍ତି କେନ୍ଦ୍ର ପ୍ରତିରକ୍ଷା ମନ୍ତ୍ରୀ ନିର୍ମଳା ସୀତାରମଣ ।

ରାହୁଲ ଗାନ୍ଧିଙ୍କୁ କଡା ଜବାବ ଦେଇ ସେ କହିଛନ୍ତି ଯେ ରାହୁଲ ଜଣେ ପରାଜିତ ପରି ପ୍ରଳାପ କରୁଛନ୍ତି । ରାହୁଲ ନିଜେ ନ୍ୟାସନାଲ ହେରାଲ୍ଡ ମାମଲାରେ ଅଭିଯୁକ୍ତ ରହି ଜାମିନରେ ଅଛନ୍ତି, କିନ୍ତୁ ସେ ବିଜେପି ଅଧ୍ୟକ୍ଷ ଅମିତ ଶାହାକୁ ହତ୍ୟା ଅଭିଯୁକ୍ତ ବୋଲି କହୁଛନ୍ତି । ଅମିତ ଶାହାଙ୍କୁ କୋର୍ଟ ଏହି ଅଭିଯୋଗରୁ ମୁକ୍ତ କରିଥିବାବେଳେ ରାହୁଲ ଏବେ ବି ଅଭିଯୁକ୍ତ ଅଛନ୍ତି ।

Congress Party wants to identify itself with the Pandavas, The same party which questioned the fundamental existence of Lord Ram. It is the party which chooses to mock Hindus and Hindu rituals : BJP leader Nirmala Sitharaman on Rahul Gandhi's speech at #CongressPlenarySession pic.twitter.com/4fGszVj9h0

— ANI (@ANI) March 18, 2018

ବୀର ସଭରକର ଜଣେ ସ୍ୱାଧୀନତା ସଂଗ୍ରାମୀ ଥିବାବେଳେ ତାଙ୍କୁ ରାହୁଲ ନିନ୍ଦା କରିବା ଦୁର୍ଭାଗ୍ୟଜନକ ବୋଲି ସେ କହିଛନ୍ତି । ସେ ଆହୁରି ମଧ୍ୟ କହିଛନ୍ତି ଯେ କଂଗ୍ରେସ ନିର୍ବାଚନରେ ସ୍ୱଚ୍ଛତା ଚାହୁଁନି ସେଥିପାଇଁ ଇଭିଏମ ବଦଳରେ ବାଲଟ ବ୍ୟବସ୍ଥାକୁ ଫେରିବାକୁ କହୁଛି । ସେ ଆହୁରି ମଧ୍ୟ କହିଛନ୍ତି ଯେ ୧୯୮୪ର ଶିଖ ବିରୋଧୀ ଦଙ୍ଗା ପାଇଁ  କଂଗ୍ରେସ ଦାୟୀ । କଂଗ୍ରେସ ହେଉଛି ଏପରି ଏକ ଦଳ ଯାହାକି ଆତଙ୍କବାଦୀଙ୍କ ଶବ ଉପରେ ଲୁହ ବୁହାଏ ।

ଅନ୍ୟପକ୍ଷରେ କେନ୍ଦ୍ର ଆଇନ ମନ୍ତ୍ରୀ ରବି ଶଙ୍କର ପ୍ରସାଦ କହିଛନ୍ତି ଯେ ରାହୁଲ ଗାନ୍ଧୀ ଯେପରି ଭାବେ ଅମିତ ଶାହାଙ୍କୁ ଅଭିଯୁକ୍ତ ବୋଲି କହିଲେ ତାହା  ପରୋକ୍ଷରେ ନ୍ୟାୟାଳୟର ସାଧୁତା ଉପରେ ପ୍ରଶ୍ନବାଚୀ ସୃଷ୍ଟି କରୁଛି ।