ଉତ୍ତରପ୍ରଦେଶରେ କରୋନା ବାଣ୍ଟୁଛି ବିଜେପି : ଅଖିଳେଶଙ୍କ ଅଭିଯୋଗ
ନୂଆଦିଲ୍ଲୀ: ଉତ୍ତର ପ୍ରଦେଶରେ ନିର୍ବାଚନ ଯେତିକି ପାଖେଇ ଆସୁଛି, ଦୁଇ ପ୍ରମୁଖ ପ୍ରତିଦ୍ବନ୍ଦୀ ବିଜେପି ଓ ସମାଜବାଦୀ ପାର୍ଟି (ସପା) ମଧ୍ୟରେ ଆରୋପ ପ୍ରତ୍ୟାରୋପ ବଢିଚାଲିଛି । ଆଜି ସପା ମୁଖ୍ୟ ଅଖିଳେଶ ଯାଦବ ବିଜେପି ଉପରେ କେତେକ ନୂଆ ଆରୋପ ଲଗାଇଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଏକ ସାମ୍ବାଦିକ ସମ୍ମିଳନୀରେ ସେ ଅଭିଯୋଗ କରିଛନ୍ତି ବିଜେପି କର୍ମୀମାନେ ପ୍ରାଚୀରପତ୍ର ବାଣ୍ଟୁଥିବାରୁ ତାହା ମାଧ୍ୟମରେ କରୋନା ସଂକ୍ରମଣ ବ୍ୟାପୁଛି । ଅନ୍ୟପ୍ରକାରେ କହିଲେ ବିଜେପି ସଂକ୍ରମଣ ବାଣ୍ଟୁଛି । ନିର୍ବାଚନ ଆୟୋଗ ତୁରନ୍ତ ଏଥିରେ ହସ୍ତକ୍ଷେପ କରି ଏହାକୁ ବନ୍ଦ କରିବାକୁ ସେ ନିବେଦନ କରିଛନ୍ତି ।
ଏହା ପୂର୍ବରୁ ସେ ଅଭିଯୋଗ କରିଥିଲେ ଯେ ଦିଲ୍ଲୀରୁ ମୁଜାଫରପୁରକୁ ତାଙ୍କ ହେଲିକପ୍ଟରକୁ ଉଡ଼ିବାକୁ ଦିଆଗଲା ନାହିଁ । କେନ୍ଦ୍ର ସରକାରଙ୍କ ଇଂଗିତରେ ଏପରି କରାଯାଇଥିବା ସେ କହିଥିଲେ । ବିଜେପି ନେତାଙ୍କ ହେଲିକପ୍ଟରକୁ ଅନୁମତି ଦିଆଯାଇଥିବାବେଳେ ତାଙ୍କ ହେଲିକପ୍ଟରକୁ ଅଟକାଇବାର କାରଣ କଣ ବୋଲି ସେ ପ୍ରଶ୍ନ କରିଥିଲେ । କିନ୍ତୁ ଅଖିଳେଶଙ୍କ ହେଲିକପ୍ଟରରେ ଇନ୍ଧନ ଭର୍ତ୍ତି କରିବା ଓ ଅତ୍ୟଧିକ ଏୟାର ଟ୍ରାଫିକ ଯୋଗୁଁ ତାଙ୍କ ହେଲିକପ୍ଟର ଅଟକି ରହିଥିଲା ବୋଲି ସରକାରୀ ସୁତ୍ରରୁ ପରେ ଜଣାପଡ଼ିଥିଲା ।