ବିହାରରେ ଏକାଠି ଲଢ଼ିବେ ବିଜେପି-ଜେଡିୟୁ ଓ ଏଲଜେପି: ନଡ୍ଡା
ନୂଆଦିଲ୍ଲୀ: ବିହାରରେ ବିଧାନସଭା ନିର୍ବାଚନ ପାଇଁ ରାଜନୈତିକ ଦଳ ପ୍ରସ୍ତୁତି ଆରମ୍ଭ କରିଛନ୍ତି। ଆଜି ବିହାର ବିଜେପି ରାଜ୍ୟ କାର୍ଯ୍ୟକାରିଣୀ କମିଟିର ବୈଠକ ଅନୁଷ୍ଠିତ ହୋଇଥିଲା | ଏହି ଭର୍ଚୁଆଲ୍ ବୈଠକରେ ଭାରତୀୟ ଜନତା ପାର୍ଟି (ବିଜେପି) ର ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା ମଧ୍ୟ ଯୋଗ ଦେଇଥିଲେ। ଜେପି ନଡ୍ଡା କହିଛନ୍ତି ଯେ ବିହାର ନିର୍ବାଚନରେ ବିଜେପି, ଜେଡିୟୁ ଏବଂ ଏଲଜେପି ଏକାଠି ଲଢ଼ିବେ । ଏଥିସହ ନୀତୀଶ କୁମାରଙ୍କ ନେତୃତ୍ୱରେ ବିହାର ବିଧାନସଭା ନିର୍ବାଚନରେ ପ୍ରତିଦ୍ବନ୍ଦିତା କରାଯିବ ବୋଲି ସେ କହିଛନ୍ତି।
Sambad is now on WhatsApp
Join and get latest news updates delivered to you via WhatsApp
ବିହାର ପ୍ରଦେଶ କାର୍ଯ୍ୟକାରିଣୀ କମିଟିର ବୈଠକରେ ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା କହିଛନ୍ତି ଯେ ଯେତେବେଳେ ବି ବିଜେପି, ନୀତୀଶ କୁମାର ଏବଂ ଲୋକ ଜନତା ପାର୍ଟି (ଏଲଜେପି) ଏକାଠି ହୁଅନ୍ତି, ସେତେବେଳେ ଜିତିଥାନ୍ତି । ତେଣୁ ବିଜେପି, ଜେଡିୟୁ, ଏଲଜେପି ଏକାଠି ଲଢ଼ି ନିର୍ବାଚନରେ ଜିତିବେ। ଏହା ସହ ସେ କହିଛନ୍ତି ଯେ ବିହାର ଏବଂ ଦେଶରେ ବିରୋଧୀ ଦଳ ସମ୍ପୂର୍ଣ୍ଣ ସମାପ୍ତ ହୋଇଛି।
ବିରୋଧୀ କେବଳ ଶସ୍ତା ରାଜନୀତି କରନ୍ତି। ଏଥିସହ ଜେପି ନଡ୍ଡା ଦଳୀୟ କର୍ମୀଙ୍କୁ ଘର ଘର ବୁଲି ପ୍ରଚାର କରିବା ପାଇଁ ଅନୁରୋଧ କରିଥିଲେ। ସେ କର୍ମୀଙ୍କୁ ପରାମର୍ଶ ଦେଇଥିଲେ ଯେ ବିଜେପି ଏବଂ ନୀତୀଶ କୁମାରଙ୍କ ମାଧ୍ୟମରେ କରାଯାଇଥିବା କାର୍ଯ୍ୟ ବିହାରର ଲୋକଙ୍କ ନିକଟରେ ପହଞ୍ଚାଇବାକୁ ପଡିବ। ସେପ୍ଟେମ୍ବର ୬ ପରେ ସେ ନିଶ୍ଚିତ ଭାବରେ ବିହାର ଯିବେ ବୋଲି ପ୍ରତିଶୃତି ଦେଇଥିଲେ | କରୋନା ସଂକ୍ରମଣ ଅବଧିରେ ନିର୍ବାଚନ ହେବାକୁ ଯାଉଛି ଏବଂ ଏହା ଏକ ବଡ ଆହ୍ୱାନ ବୋଲି ସେ କହିଥିଲେ |