କର୍ଣ୍ଣାଟକରେ ଅଭାବନୀୟ ଘଟଣା: ଦଳିତ ବିଜେପି ସାଂସଦଙ୍କୁ ମନ୍ଦିରରେ ପୂରାଇ ଦେଲେନି
ବେଙ୍ଗାଲୁରୁ: କର୍ଣ୍ଣାଟକରେ ଆଜି ଏକ ଅଭାବନୀୟ ଘଟଣା ଘଟିଛି। ଚିତ୍ରଦୁର୍ଗର ବିଜେପି ସାଂସଦ ଜଣେ ଦଳିତ ହୋଇଥିବାରୁ ଆଜି ତାଙ୍କ ନିଜ ନିର୍ବାଚନ ମଣ୍ଡଳୀରେ ଥିବା ଏକ ମନ୍ଦିରରେ ତାଙ୍କୁ ପୂରାଇ ଦିଆଯାଇ ନାହିଁ। ଏହି ମାମଲା ସ୍ଥାନୀୟ ଅଂଚଳରେ ଆଲୋଡ଼ନ ସୃଷ୍ଟି କରିଛି। ନାରାୟଣସ୍ବାମୀ ଆଜି ତୁମାକୁରୁ ଅଂଚଳକୁ ପ୍ରଶାସନିକ ଅଧିକାରୀଙ୍କ ସହ ଗସ୍ତ କରିଥିଲେ। ଏହି ଅବସରରେ ନିକଟସ୍ଥ ପାୱାଗଡ଼ା ଗ୍ରାମର ଏକ ମନ୍ଦିରକୁ ଦର୍ଶନ ପାଇଁ ଯିବାକୁ ସାଂସଦ ବାହାରିଥିଲେ। ତେବେ ସ୍ଥାନୀୟ ଯାଦବ ସମ୍ପ୍ରଦାୟର ଲୋକମାନେ ତାଙ୍କୁ ଗ୍ରାମ ନିକଟରେ ଘେରିଯିବା ସହ ସେ ‘ଅଛୁଆଁ’ ହୋଇଥିବାରୁ ତାଙ୍କୁ ମନ୍ଦିରରେ ପଶିବାକୁ ଦିଆଯିବ ନାହିଁ ବୋଲି କହିଥିଲେ। ଯାଦବ ସମ୍ପ୍ରଦାୟର ଲୋକଙ୍କ ତୀବ୍ର ବିରୋଧ ଯୋଗୁଁ ସାଂସଦ ମନ୍ଦିରକୁ ଯାଇନପାରି ଫେରି ଆସିଥିଲେ। ପରମ୍ପରା ଅନୁଯାୟୀ ତାଙ୍କୁ ମନ୍ଦିର ଭିତରକୁ ପୂରାଇ ଦିଆଯିବ ନାହିଁ ବୋଲି ସବର୍ଣ୍ଣମାନେ ଜିଦ୍ ଧରିଥିଲେ।
Sambad is now on WhatsApp
Join and get latest news updates delivered to you via WhatsApp
ଏହି ଘଟଣାକୁ ନେଇ ଦଳିତ ସଂପ୍ରଦାୟରେ ଉତ୍ତେଜନା ଦେଖିବାକୁ ମିଳିଛି। ନାରାୟଣସ୍ବାମୀ ଆଜି ତାଙ୍କ ନିର୍ବାଚନମଣ୍ଡଳୀ ଅଧୀନସ୍ଥ ବିଭିନ୍ନ ଗ୍ରାମରେ ଲୋକମାନଙ୍କ ସମସ୍ୟା ବୁଝିବା ସହ ବିଭିନ୍ନ ବିକାଶମୂଳକ କାର୍ଯ୍ୟ ତଦାରଖ ପାଇଁ ଯାଇଥିଲେ। ତେବେ ଯେଉଁ ଗ୍ରାମରେ ଘଟଣାଟି ଘଟିଛି ସେଠାକୁ ସେ ଏକ ରାସ୍ତା ନର୍ମାଣ ଯୋଜନା ଏବଂ ସ୍ବଚ୍ଛ ପାନୀୟ ଜଳ ପ୍ଲାଣ୍ଟ୍ ପ୍ରତିଷ୍ଠା ପାଇଁ ଯାଇଥିଲେ। ଏହି ସମୟରେ ସେ ଗ୍ରାମର ଏକ ମନ୍ଦିରକୁ ପ୍ରବେଶ କରିବାକୁ ଚେଷ୍ଟା କରିଥିବା ବେଳେ ତାଙ୍କୁ ବିରୋଧର ସମ୍ମୁଖୀନ ହେବାକୁ ପଡ଼ିଥିଲା।