ରାହୁଲ ଅସଦାଚରଣ କରିଥିଲେ ! ବିଜେପି ମହିଳା ସାଂସଦଙ୍କ ଅଭିଯୋଗ

ନୂଆଦିଲ୍ଲୀ: ସଂସଦରେ ଧସ୍ତାଧସ୍ତି ପରେ କଂଗ୍ରେସ ଓ ବିଜେପି ମଧ୍ୟରେ ରାଜନୈତିକ ବିବାଦ ତୀବ୍ର ହେବାରେ ଲାଗିଛି।  ଏବେ ନାଗାଲାଣ୍ଡର ବିଜେପି ସାଂସଦ ଫାଙ୍ଗନନ କୋନିଆକ୍ ରାହୁଲ ଗାନ୍ଧିଙ୍କ ଉପରେ ସାଂଘାତିକ ଅଭିଯୋଗ ଆଣିଛନ୍ତି। ନାଗାଲାଣ୍ଡର ବିଜେପି ସାଂସଦ ଏସ୍. ଫାଗ୍ନୋନ୍ କୋନୟାକ୍ ରାହୁଲ ଗାନ୍ଧୀଙ୍କ ବିରୋଧରେ ଅଭିଯୋଗ କରି କହିଛନ୍ତି ଯେ ମୁଁ ପ୍ଲାକାର୍ଡ ଧରି ଛିଡ଼ା ହୋଇଥିଲି । ଏହି ସମୟରେ ରାହୁଲ ଅତି ପାଖକୁ ଆସିଲେ, ଯେ ମୁଁ ଅସହଜ ମନେ କଲି ।

ସଂସଦ ପରିସରରେ ଗୁରୁବାର ହୋଇଥିବା ବିକ୍ଷୋଭ ବେଳେ ବିଜେପି ଓ କଂଗ୍ରେସ ସାଂସଦଙ୍କ ମଧ୍ୟରେ ଧସ୍ତାଧସ୍ତି ହୋଇଥିଲା। ଏଥିରେ ବିଜେପିର ଦୁଇ ଜଣ ସାଂସଦ- ପ୍ରତାପ ଷଡ଼ଙ୍ଗୀ ଓ ମୁକେଶ ରାଜପୁତ ଆହତ ହୋଇଛନ୍ତି। ଏବେ ଏହାକୁ ନେଇ ଦୁଇ ଦଳ ମଧ୍ୟରେ ରାଜନୈତିକ ଯୁଦ୍ଧ ମଧ୍ୟ ଆରମ୍ଭ ହୋଇଛି। ମାମଲା ବଢିବା ପରେ ବିଜେପି ଓ କଂଗ୍ରେସ ପରସ୍ପର ବିରୋଧରେ ଆସିଥିବା ଅଭିଯୋଗକୁ ପ୍ରମାଣିତ କରିବା ପାଇଁ ଭିଡିଓ ସେୟାର କରିବା ଆରମ୍ଭ କରିଥିଲେ । ଏହି ସମୟରେ ମହିଳା ସାଂସଦ ମଧ୍ୟ ରାହୁଲଙ୍କ ଉପରେ ଅଭିଯୋଗ ଆଣିଛନ୍ତି।

ରାଜ୍ୟସଭା ସଭାପତି ଜଗଦୀପ ଧନଖଡ଼ଙ୍କୁ ନିଜର ଅଭିଯୋଗ ପତ୍ରରେ କୋନୟାକ ଲେଖିଛନ୍ତି, “ମୁଁ ରାଜ୍ୟସଭା ସାଂସଦ ଏସ୍ ଫାଗ୍ନୋନ୍ କୋନୟାକ୍ ମାନ୍ୟବର ଡ. ବାବାସାହେବ ଆମ୍ବେଦକରଙ୍କ ଉପରେ କଂଗ୍ରେସ ପାର୍ଟି କରିଥିବା ଅତ୍ୟାଚାର ବିରୋଧରେ ଏକ ଶାନ୍ତିପୂର୍ଣ୍ଣ ବିକ୍ଷୋଭରେ ଅଂଶଗ୍ରହଣ କରିଥିଲି । ମୁଁ ହାତରେ ପ୍ଲାକାର୍ଡ ଧରି ମକର ଦ୍ୱାରର ସିଡି ତଳେ ଠିଆ ହୋଇଥିଲି । ସୁରକ୍ଷା କର୍ମୀମାନେ ଅନ୍ୟ ଦଳର ମାନ୍ୟବର ସାଂସଦଙ୍କ ପ୍ରବେଶ ପାଇଁ ପ୍ରବେଶ ପଥରେ ରାସ୍ତା ପ୍ରସ୍ତୁତ କରିଥିଲେ। ହଠାତ୍ ବିରୋଧୀ ଦଳ ନେତା ରାହୁଲ ଗାନ୍ଧି ଦଳର ଅନ୍ୟ ସଦସ୍ୟଙ୍କ ସହ ମୋ ସାମ୍ନାକୁ ଆସିଥିଲେ, ଯଦିଓ ସେମାନଙ୍କ ପାଇଁ ରାସ୍ତା ଖୋଲିଯାଇଥିଲା। ସେମାନେ ମୋତେ ଉଚ୍ଚ ସ୍ୱରରେ ଗାଳିଗୁଲଜ କରିଥିଲେ ଏବଂ ସେ ଏତେ ନିକଟକୁ ଆସିଥିଲେ ଯେ ମୁଁ ଜଣେ ମହିଳା ସଦସ୍ୟ ହୋଇ ଅତ୍ୟନ୍ତ ଅସହଜ ଅନୁଭବ କଲି | ମୁଁ ଗୋଟିଏ ପଟକୁ ଘୁଞ୍ଚିଗଲି, କିନ୍ତୁ ମୁଁ ଅନୁଭବ କଲି ଯେ କୌଣସି ସଂସଦ ସଦସ୍ୟ ଏପରି ଆଚରଣ କରିବା ଉଚିତ୍ ନୁହେଁ ।“