ବିଜେପିର ‘ପ୍ଲାନ-୨୦୦’ ପାଇଁ ମେଣ୍ଟ ଭାଙ୍ଗିଦେଲେ କି ନୀତୀଶ କୁମାର
ପାଟନା: ପ୍ରାୟ ୫ ବର୍ଷ ପରେ ନୀତୀଶ କୁମାର ପୁଣି ଥରେ ବିଜେପି ଛାଡି ଆରଜେଡି ସହିତ ସରକାର ଗଠନ କରିବାକୁ ଯାଉଛନ୍ତି | ଦିନେ ଆରଜେଡି ସରକାରକୁ ଜଙ୍ଗଲରାଜ ବୋଲି କହିଥିବା ନୀତୀଶ କୁମାର ବର୍ତ୍ତମାନ ବିଜେପିକୁ ଛାଡି ସରକାର ଗଢିବା ପାଇଁ ଲାଲୁଙ୍କ ହାତ ଧରିଛନ୍ତି | ତେବେ ବିଜେପି ଛାଡିବା ପଛରେ ଥିବା କିଛି କାରଣ ମଧ୍ୟରୁ ବିଜେପିର ‘ପ୍ଲାନ ୨୦୦’ ବି ଅଛି ବୋଲି କୁହାଯାଉଛି । ବାସ୍ତବରେ ବିଜେପି ଜୁଲାଇ ୩୦ ଏବଂ ୩୧ ରେ ପାଟନାରେ ଦୁଇ ଦିନିଆ ସମ୍ମିଳନୀ ଆୟୋଜନ କରିଥିଲା। ଏଥିରେ ଦଳ ୨୦୨୫ ବିଧାନସଭା ନିର୍ବାଚନ ପାଇଁ ପ୍ରବାସ କାର୍ଯ୍ୟକ୍ରମ ଘୋଷଣା କରିଥିଲା। ଏହା ଅଧୀନରେ ଦଳର ନେତାମାନେ ୨୦୦ଟି ବିଧାନସଭା କ୍ଷେତ୍ରକୁ ଯିବେ ଏବଂ ସେଠାରେ ରହି ବିଜେପିକୁ ମଜବୁତ କରିବାକୁ ଉଦ୍ୟମ କରିବେ ବୋଲି କୁହାଯାଇଥିଲା | ବିହାର ବିଜେପି ସହପ୍ରଭାରୀ ଥିବା ହରିଶ ଦ୍ୱିବେଦୀ ମଧ୍ୟ ଏହି ଯୋଜନା ବିଷୟରେ କହିଥିଲେ। ଭବିଷ୍ୟତରେ ଦଳର ସମସ୍ତ ୨୪୩ଟି ଆସନରେ ଦଳର ନେତାମାନେ ପ୍ରବାସ କାର୍ଯ୍ୟକ୍ରମ କରିବେ ବୋଲି ସେ କହିଥିଲେ । ତେବେ ବିଜେପିର ଏହି ପ୍ରସ୍ତୁତିକୁ ଜେଡିୟୁ ଚେତାବନୀ ଭାବରେ ଦେଖିଥିଲା।
Sambad is now on WhatsApp
Join and get latest news updates delivered to you via WhatsApp
ବାସ୍ତବରେ, ବିଗତ କିଛି ବର୍ଷ ମଧ୍ୟରେ ବିହାରରେ ଯେଉଁଭଳି ଭାବେ ବିଜେପି ମଜବୁତ ହୋଇଛି, ଏହା ଜେଡିୟୁର ଚିନ୍ତା ବଢ଼ାଇ ଦେଇଥିଲା | ୨୦୨୦ ବିଧାନସଭା ନିର୍ବାଚନ ପରେ ଜେଡିୟୁ ପାଇଁ ଚିନ୍ତା ବଢିଯାଇଥିଲା | ଏହି ନିର୍ବାଚନରେ ବିଜେପି ୧୨୧ ଟି ଆସନରେ ପ୍ରତିଦ୍ୱନ୍ଦ୍ୱିତା କରି ୭୪ଟି ଆସନ ଜିତିଥିବାବେଳେ ୧୨୨ଟି ଆସନରେ ଲଢ଼ି ଜେଡିୟୁ ମାତ୍ର ୪୩ଟି ଜିତିଥିଲା । ସେହିପରି ନୀତୀଶ କୁମାରଙ୍କ ନିକଟତର କୁହାଯାଉଥିବା ସୁଶୀଲ ମୋଦୀଙ୍କୁ ବିଜେପି ହଟାଇ ଦେଇ ଅମିତ ଶାହାଙ୍କ ନିକଟତର ବୋଲି କୁହାଯାଉଥିବା ନେତା/ନେତ୍ରୀଙ୍କୁ ଉପମୁଖ୍ୟମନ୍ତ୍ରୀ କରାଯାଇଥିଲା | ଆଉ ଏହି ନେତା/ନେତ୍ରୀମାନେ ନୀତୀଶ କୁମାରଙ୍କ ବିରୋଧରେ ଅନେକ ସମୟରେ ବିବୃତ୍ତି ଦେଇଥିଲେ ।
କୁହାଯାଉଛି ଯେ ଏଭଳି ପରିସ୍ଥିତିରେ ନୀତୀଶ କୁମାର ବୋଧହୁଏ ଚିନ୍ତିତ ଥିଲେ ଯେ ଯଦି ବିଜେପି ୨୦୦ଟି ଆସନ ପାଇଁ ପ୍ରସ୍ତୁତ ହୁଏ, ତେବେ ଆଗାମୀ ନିର୍ବାଚନରେ ଅଧିକ ଆସନ ଦାବି କରିବ। କେବଳ ଏତିକି ନୁହେଁ, ଯଦି ଅଧିକ ଆସନରେ ବିଜେପି ଜିତିଯାଏ, ତେବେ ଜେଡିୟୁକୁ ହଟାଇଦେଇପାରେ | କୁହାଯାଉଛି ଯେ ନୀତୀଶଙ୍କ ଏହି ଭୟ ତାଙ୍କୁ ବିଜେପିରୁ ଦୂରେଇ ଯିବାକୁ ବାଧ୍ୟ କରିଛି |