ପଶ୍ଚିମବଙ୍ଗ ହାତେଇବାକୁ ବିଜେପିର ଯୋଜନା: ୧୫୦୦ରୁ ଅଧିକ ସଭା କରିବାକୁ ଲକ୍ଷ୍ୟ
ନୂଆଦିଲ୍ଲୀ/କୋଲକାତା: ପଶ୍ଚିମବଙ୍ଗ ମିଶନରେ ଏବେ ବାହାରିଛି ବିଜେପି | ତୃଣମୂଳ କଂଗ୍ରେସକୁ ଶାସନ ଗାଦିରୁ ହଟାଇ କିଭଳି ପଶ୍ଚିମବଙ୍ଗ ଦଖଲ କରିହେବ ଏବେ ସେଥିପାଇଁ ବିଜେପି ଯୋଜନା ପ୍ରସ୍ତୁତ କରିଛି | ପଶ୍ଚିମବଙ୍ଗ ବିଧାନସଭାର ୨୯୪ଟି ଆସନ ପାଇଁ ନିର୍ବାଚନ ଏପ୍ରିଲ-ମେ ମାସରେ ହେବାକୁ ଥିବାବେଳେ ବିଜେପି ପାଖାପାଖି ୧୫୦୦ରୁ ଅଧିକ ରାଲି ଆୟୋଜନ କରିବାର ଲକ୍ଷ୍ୟ ରଖିଛି | ବିଧାନସଭା ସ୍ତରୀୟ ଏହି ରାଲିରେ ପ୍ରତ୍ୟେକ ବୁଥର କାର୍ଯ୍ୟକର୍ତ୍ତା ଯୋଗ ଦେବେ |
Sambad is now on WhatsApp
Join and get latest news updates delivered to you via WhatsApp
ପଶ୍ଚିମବଙ୍ଗର ବିଧାନସଭା ନିର୍ବାଚନ ଦାୟିତ୍ୱରେ ଥିବା ଜଣେ ବରିଷ୍ଠ ନେତା କହିଛନ୍ତି ଯେ ପ୍ରତିଟି ବିଧାନସଭା କ୍ଷେତ୍ରରେ ପାଞ୍ଚରୁ ଛଅଟି ରାଲି କରାଯିବ | ଏଥିରେ ବରିଷ୍ଠ ବିଜେପି ନେତାଙ୍କ ସହ, କେନ୍ଦ୍ର ମନ୍ତ୍ରୀ, ଅନ୍ୟ ବିଜେପି ଶାସିତ ରାଜ୍ୟର ମୁଖ୍ୟମନ୍ତ୍ରୀ ଯୋଗ ଦେବେ | ସେହିପରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କିଛି ପ୍ରମୁଖ ଆସନ ବା ଟିଏମସିର ଦବଦବା ରହୁଥିବା ଅଂଚଳରେ ଜନସଭାକୁ ସମ୍ବୋଧିତ କରିବେ | ବଡ ଜନସଭା ଛଡା ଭୋଟରଙ୍କ ପାଖରେ ପହଂଚିବାକୁ ଛୋଟ ଛୋଟ ଜନସଭାର ମଧ୍ୟ ଆୟୋଜନ କରାଯିବ |
ବୁଥ ସ୍ତରୀୟ କର୍ମୀମାନେ କିଭଳି ପ୍ରତିଟି ଭୋଟର ପାଖରେ ପହଂଚିବେ ସେ ନେଇ ଯୋଜନା ପ୍ରସ୍ତୁତ କରାଯାଇଛି | ସୂଚନା ଥାଉ କି ୨୦୧୯ରେ ପଶ୍ଚିମବଙ୍ଗରେ ହୋଇଥିବା ଲୋକସଭା ନିର୍ବାଚନରେ ୪୨ଟି ଆସନରୁ ବିଜେପି ୧୮ଟିରେ ବିଜୟ ହୋଇଥିଲା | ଆଉ ବର୍ତ୍ତମାନ ୨୯୪ ଆସନରୁ ୨୦୦ରୁ ଅଧିକ ଆସନରେ ଜିତିବାକୁ ବିଜେପି ଲକ୍ଷ୍ୟ ରଖିଛି |