ପଣଜୀ: ଗୋଆର ପାନଜୀରେ ଭାରତୀୟ ଜନତା ପାର୍ଟି କାର୍ଯ୍ୟକାରିଣୀ ବୈଠକରେ କେନ୍ଦ୍ର ମନ୍ତ୍ରୀ ନିତିନ ଗଡକରୀ ବିଜେପି ସମ୍ପର୍କରେ ଏକ ଗୁରୁତ୍ୱପୂର୍ଣ୍ଣ ମନ୍ତବ୍ୟ ଦେଇଛନ୍ତି। ସେ କହିଛନ୍ତି ଯେ ଭାରତୀୟ ଜନତା ପାର୍ଟି କଂଗ୍ରେସର ଭୁଲକୁ ପୁନରାବୃତ୍ତି କରିବା ଉଚିତ୍ ନୁହେଁ। ଗଡକରୀ କହିଛନ୍ତି ଭାରତୀୟ ଜନତା ପାର୍ଟି ଏକ ଭିନ୍ନ ଚିନ୍ତାଧାରାର ଦଳ। ସେଥିପାଇଁ ଏହା ବାରମ୍ବାର ଜନସାଧାରଣଙ୍କ ବିଶ୍ୱାସ ଜିତୁଛି।
ଯଦି ଆମେ କଂଗ୍ରେସ ଯାହା କରିଥିଲା ତାହା ଜାରି ରଖିବା, ତା’ହେଲେ ସେମାନଙ୍କଠାରୁ କ୍ଷମତା ଯିବା ଏବଂ ଆମେ କ୍ଷମତାକୁ ଆସିବାରେ କୌଣସି ଅର୍ଥ ରହିବ ନାହିଁ।
ଗଡକରୀ ଆହୁରି ମଧ୍ୟ କହିଛନ୍ତି ଯେ ଭାରତୀୟ ଜନତା ପାର୍ଟି କଂଗ୍ରେସ ଭଳି ସମାନ ଭୁଲ କରିବା ଉଚିତ ନୁହେଁ, ଯେଉଁଥିପାଇଁ ଏହା କ୍ଷମତାରୁ ଯାଇଥିଲା। କଂଗ୍ରେସର ଭୁଲ କାରଣରୁ ଲୋକମାନେ ଭାରତୀୟ ଜନତା ପାର୍ଟିକୁ ବାଛିଛନ୍ତି।
ଦୁର୍ନୀତିମୁକ୍ତ ଦେଶ ଗଠନ ପାଇଁ ଭାରତୀୟ ଜନତା ପାର୍ଟିର ଏକ ସ୍ପଷ୍ଟ ଯୋଜନା ରହିବା ଉଚିତ୍। ଗଡକରୀ ଗୁରୁତ୍ୱାରୋପ କରିଛନ୍ତି ସାମାଜିକ ତଥା ଅର୍ଥନୈତିକ ସଂସ୍କାର ଆଣିବା ବିଜେପି ରାଜନୀତିର ମୁଖ୍ୟ ଉଦ୍ଦେଶ୍ୟ।
ତାଙ୍କର ୪୦ ମିନିଟର ଦୀର୍ଘ ଅଭିଭାଷଣରେ ଗଡକରୀ ଭାରତୀୟ ଜନତା ପାର୍ଟିର ବରିଷ୍ଠ ନେତା ଏଲ.କେ ଆଡଭାନୀଙ୍କ ମନ୍ତବ୍ୟକୁ ଉଲ୍ଲେଖ କରି କହିଥିଲେ ଭାରତୀୟ ଜନତା ପାର୍ଟି ଏକ ଭିନ୍ନ ଚିନ୍ତାଧାରା ବିଶିଷ୍ଟ ଦଳ ଭାବେ ନିଜର କାର୍ଯ୍ୟ ଧାରା ଜାରି ରଖିଛି।
ଗଡକରୀ କହିଛନ୍ତି ଯେ ଆଡଭାନୀ ଜୀ କହୁଥିଲେ ଆମେ ଏକ ଭିନ୍ନ ଚିନ୍ତାଧାରା ସହିତ ଏକ ଭିନ୍ନ ଦଳ। ଆମକୁ ବୁଝିବାକୁ ପଡିବ ଯେ ଆମେ ଅନ୍ୟ ଦଳଠାରୁ କେତେ ଭିନ୍ନ ଅଟୁ । ଏହା ମନେ ରଖିଲେ କଂଗ୍ରେସର ଅବସ୍ଥା ଆମକୁ ଭୋଗୀବାକୁ ପଡ଼ିବ ନାହିଁ।