ନୂଆଦିଲ୍ଲୀ : ଗୁଜରାଟରେ ସବୁ ସରକାର ବିରୋଧୀ ହାଓ୍ବାକୁ ଭୁଲ ପ୍ରମାଣିତ କରି ବିଜେପି ପୁଣି ପାଇଁ ସରକାର ଗଢିବାର ସଂକେତ ଦେଉଛି ଏକଜିଟ ପୋଲ୍ । ବିଜେପି ୧୯୯୫ରୁ ଗୁଜରାଟରେ ସରକାରରେ ଥିବାବେଳେ ଲୋକମାନେ ଏବେ ବି ଏହି ଦଳ ଉପରେ ସନ୍ତୁଷ୍ଟ ଥିବା ସଂକେତ ମିଳୁଛି । ଯଦି ଏକଜିଟ ପୋଲ ପୂର୍ବାନୁମାନ ସତ ପ୍ରମାଣିତ ହୁଏ, ତେବେ ବିଜେପି ନିଜ ଦୁର୍ଗକୁ ଆହୁରି ଅଭେଦ୍ୟ କରିବାରେ ସଫଳ ହେବ ।
Sambad is now on WhatsApp
Join and get latest news updates delivered to you via WhatsApp
ଆଜି ବିଭିନ୍ନ ସଂସ୍ଥାମାନଙ୍କ ପକ୍ଷରୁ ପ୍ରକାଶିତ ଏକଜିଟ ପୋଲ ଅନୁସାରେ ବିଜେପି ପୂର୍ଣ୍ଣ ବହୁମତ ହାସଲ କରିବ, କଂଗ୍ରେସ ୨ୟ ସ୍ଥାନରେ ରହିବ ଓ ଆପ ଗୁଜରାଟରେ ଖାତା ଖୋଲିବ । ସବୁ ଏକଜିଟ ପୋଲର ହାରାହାରି ହିସାବ କଲେ ବିଜେପିକୁ ୧୩୧ଟି ଆସନ ମିଳିବାର ସମ୍ଭାବନା ଥିବାବେଳେ କଂଗ୍ରେସକୁ ୪୧ଟି ଓ ଆପକୁ ୭ଟି ଆସନ ମିଳିବାର ସମ୍ଭାବନା ରହିଛି । ଏପରି ହେଲେ ବିଜେପି ୨୦୦୨ର ( ୧୨୭ଟି ଆସନ) ସଫଳତାକୁ ଟପିବାର ସମ୍ଭାବନା ରହିଛି ।
ନ୍ୟୁଜ୍ ଏକ୍ସର ପୂର୍ବାନୁମାନ ଅନୁସାରେ ଗୁଜରାଟରେ ବିଜେପିକୁ ୧୧୭ରୁ ୧୪୦ଟି ଆସନ ମିଳିବାର ସମ୍ଭାବନା ରହିଥିବାବେଳେ କଂଗ୍ରେସକୁ ୩୪ରୁ ୫୧ଟି ଓ ଆପକୁ ୬-୧୩ଟି ଆସନ ମିଳିବାର ସମ୍ଭାବନା ରହିଛି ।
ଟିଭି-୯ର ପୂର୍ବାନୁମାନ ଅନୁସାରେ ବିଜେପିକୁ ୧୨୫ରୁ ୧୩୦ଟି ଆସନ ମିଳିବାର ସମ୍ଭାବନା ରହିଥିବାବେଳେ କଂଗ୍ରେସକୁ ୪୦ରୁ ୫୦ଟି ଓ ଆପକୁ ୪ଟି ଆସନ ମିଳିବାର ସମ୍ଭାବନା ରହିଛି ।
ଆଜତକ୍-ଆକ୍ସିସ ମାଇ ଇଣ୍ଡିଆର ପୂର୍ବାନୁମାନ ଅନୁସାରେ ବିଜେପି ୧୨୯-୧୫୧, କଂଗ୍ରେସକୁ ୧୬-୩୦ ଓ ଆପକୁ ୯-୨୧ଟି ଆସନ ମିଳିବ ।
ତେବେ ଗୁଜରାଟ ନିର୍ବାଚନରେ ଏକ ନୂଆ ଟ୍ରେଣ୍ଡ୍ ଦେଖିବାକୁ ମିଳିପାରେ । ତାହା ହେଉଛି ଆପ ଖାତା ଖୋଲିବ । କେତେକ ରିପୋର୍ଟ ଅନୁସାରେ ମୁସଲିମ ଭୋଟ କଂଗ୍ରେସରୁ ଆପକୁ ଯିବା ଆରମ୍ଭ ହୋଇଛି । ଏପରି ହୋଇଥିଲେ ତାହା କଂଗ୍ରେସ ପାଇଁ ଚିନ୍ତାର କାରଣ ହେବ ।