ଅମିତ ଶାହାଙ୍କ ପଶ୍ଚିମବଙ୍ଗ ଗସ୍ତ ସମୟରେ ମିଳିଲା ବିଜେପି କର୍ମୀଙ୍କ ଝୁଲନ୍ତା ମୃତଦେହ, ମୃତକଙ୍କ ପରିବାରକୁ ଭେଟିବାକୁ ଯିବେ କେନ୍ଦ୍ର ଗୃହମନ୍ତ୍ରୀ

କୋଲକାତା: ପଶ୍ଚିମବଙ୍ଗର ଉତ୍ତର କୋଲକାତାର କାଶୀପୁର ଅଞ୍ଚଳରେ ଶୁକ୍ରବାର ସକାଳେ ଭାରତୀୟ ଜନତା ପାର୍ଟିର ଜଣେ କର୍ମୀଙ୍କର ମୃତଦେହ ଉଦ୍ଧାର ହୋଇଛି | ରହସ୍ୟମୟ ପରିସ୍ଥିତିରେ ଏକ କୋଠା ଭିତରେ କର୍ମୀଙ୍କ ମୃତଦେହ ଝୁଲୁଥିବାର ଦେଖିବାକୁ ମିଳିଥିଲା। ଏହି ଘଟଣା ପରେ ଏହି ଅଞ୍ଚଳରେ ଉତ୍ତେଜନା ପରିସ୍ଥିତି ସୃଷ୍ଟି ହୋଇଛି | ମୃତକଙ୍କ ନାମ ଅର୍ଜୁନ ଚୌରାସିଆ ବୋଲି ଜଣାପଡିଥିବାବେଳେ ସେ ବିଜେପି ଯୁବାମୋର୍ଚ୍ଚାର ଜଣେ ବରିଷ୍ଠ ସଦସ୍ୟ ଥିଲେ। ମୃତଦେହ ନିକଟରେ ପୁଲିସ କୌଣସି ସୂଈସାଇଡ ନୋଟ୍ ପାଇ ନ ଥିବାରୁ ମୃତ୍ୟୁର କାରଣ ହତ୍ୟାକାଣ୍ଡ ନା ଆତ୍ମହତ୍ୟା ତାହା ସ୍ପଷ୍ଟ ହୋଇନାହିଁ |

ଅନ୍ୟପକ୍ଷରେ ପଶ୍ଚିମବଙ୍ଗକୁ ଦୁଇ ଦିନିଆ ଗସ୍ତରେ ଆସିଥିବା କେନ୍ଦ୍ର ଗୃହମନ୍ତ୍ରୀ ଅମିତ ଶାହା ଆଜି ଅପରାହ୍ନରେ ଅର୍ଜୁନଙ୍କ ଘରକୁ ଯାଇ ପରିବାର ଲୋକଙ୍କୁ ଭେଟିବେ। ରାଜ୍ୟ ବିଜେପି ମୁଖପାତ୍ର ସମିକ ଭଟ୍ଟାଚାର୍ଯ୍ୟ କହିଛନ୍ତି ଯେ ଅର୍ଜୁନ ଦଳର ଜଣେ ଦକ୍ଷ କର୍ମୀ ଥିଲେ ଓ ଆଜି ସକାଳେ ତାଙ୍କୁ ମୃତଦେହ ମିଳିଥିଲା। ସେହିପରି ଅମିତ ଶାହା ବିମାନବନ୍ଦରରେ ପହଞ୍ଚିବା ପରେ ସ୍ୱାଗତ କାର୍ଯ୍ୟକ୍ରମ ବାତିଲ କରିବାକୁ କହିଥିଲେ।

ଆଉ ଆଜି ଶାହା ମୃତକଙ୍କ ଘରକୁ ଯିବେ | ଅନ୍ୟପଟେ ବିଜେପି ଅଭିଯୋଗ କରିଛି ଯେ ଶାସକ ତୃଣମୂଳ କଂଗ୍ରେସ (ଟିଏମସି) ଉକ୍ତ କର୍ମୀଙ୍କୁ ହତ୍ୟା କରିଛି, ଯଦିଓ ଦଳ(ଟିଏମସି) ଏହି ଅଭିଯୋଗକୁ ଅସ୍ୱୀକାର କରିଛି। ବିଜେପିର ଅଭିଯୋଗକୁ ଖଣ୍ଡନ କରି ଟିଏମସି ସାଂସଦ ଶାନ୍ତନୁ ସେନ କହିଛନ୍ତି ଯେ ଆମ ବିରୋଧରେ ଆସିଥିବା ଅଭିଯୋଗ ଭିତ୍ତିହୀନ। ପୁଲିସକୁ ଘଟଣାର ତଦନ୍ତ କରିବାକୁ ଦିଅନ୍ତୁ। ”