ପଶ୍ଚିମବଙ୍ଗ ନିର୍ବାଚନ ଭିତରେ ଆଖି ବୁଜିଲେ ଶୋଭା ମଜୁମଦାର, କିଛି ଦିନ ପୂର୍ବେ ହୋଇଥିଲା ଅତର୍କିତ ଆକ୍ରମଣ
କୋଲକାତା: ପଶ୍ଚିମବଙ୍ଗ ନିର୍ବାଚନରେ ଯେଉଁ ବୃଦ୍ଧ ମହିଳାଙ୍କୁ ନେଇ ବିଜେପି-ଟିଏମସି ମଧ୍ୟରେ ଖଣ୍ଡଯୁଦ୍ଧ ଲାଗିଥିଲା, ଏବେ ସେ ମୃତ୍ୟୁବରଣ କରିଛନ୍ତି । ଏନେଇ ବିଜେପିର ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା ଏବଂ କେନ୍ଦ୍ରୀୟ ଗୃହମନ୍ତ୍ରୀ ଅମିତ ଶାହା ଟୁଇଟ୍ କରି ସୂଚନା ଦେବା ସହିତ ଦୁଃଖ ପ୍ରକାଶ କରିଛନ୍ତି । ଅନ୍ୟପଟେ ଏହି ଘଟଣାରେ ବିଜେପି ନେତାମାନେ ପଶ୍ଚିମବଙ୍ଗର ଟିଏମସି ସରକାରକୁ ଦାୟୀ କରିବା ସହିତ ଜୋରଦାର ଟାର୍ଗେଟ କରିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଗୃହମନ୍ତ୍ରୀ ଅମିତ ଶାହା ଟୁଇଟ୍ କରି ଦୁଃଖ ପ୍ରକାଶ କରିବା ସହ ଲେଖିଛନ୍ତି, ବେଙ୍ଗଲର ଝିଅ ଶୋଭା ମଜୁମଦାରଙ୍କ ମୃତ୍ୟୁ ହୋଇଛି । ଟିଏମସି ଗୁଣ୍ଡାମାନେ ତାଙ୍କୁ ଏତେ ମାଡ଼ ମାରିଥିଲେ ଯେ, ଆଜି ସେ ପ୍ରାଣ ହରାଇଛନ୍ତି ବୋଲି ଶାହା ଲେଖିଛନ୍ତି । ଏଥିସହ ବେଙ୍ଗଲ ଏବେ ହିଂସାମୁକ୍ତ ଆସନ୍ତାକାଲି ପାଇଁ ଲଢେଇ ଜାରି ରଖିବ ବୋଲି ସେ କହିଛନ୍ତି । ଶାହାଙ୍କ ପରି ନଡ୍ଡା ମଧ୍ୟ ଏହି ଘଟଣାକୁ ନେଇ ଟୁଇଟ୍ କରିବା ସହିତ ଗଭୀର ଦୁଃଖ ପ୍ରକାଶ କରିଛନ୍ତି ।
କିଛି ଦିନ ତଳେ ଉତ୍ତର ୨୪ ପରଗନା ଜିଲ୍ଲାର ନିମଟା ଅଞ୍ଚଳରେ ବିଜେପି କର୍ମୀ ଗୋପାଳ ମଜୁମଦାର ଓ ତାଙ୍କ ୮୫ ବର୍ଷୀୟ ବୃଦ୍ଧା ମା’ଙ୍କ ଉପରକୁ କିଛି ଦୁର୍ବୃତ୍ତ ଆକ୍ରମଣ କରିବା ସହିତ ତାଙ୍କୁ ବହୁତ ମାରିଥିଲେ । ଏହା ପଛରେ ଟିଏମସି କର୍ମୀଙ୍କ ହାତ ଥିବା ବିଜେପି ଅଭିଯୋଗ କରିଥିଲା । ଏହି ଘଟଣାରେ ଶୋଭା ମଜୁମଦାର ଗୁରୁତର ଭାବେ ଆହତ ହୋଇଥିବା ବେଳେ ଆଜି ସେ ମୃତ୍ୟୁବରଣ କରିଛନ୍ତି ।