ଫେବ୍ରୁଆରି ୨୫ ପର୍ଯ୍ୟନ୍ତ ପୁଲିସ ହେପାଜତକୁ ଗଲେ କୋକେନ ସହ ଧରାପଡ଼ିଥିବା ବିଜେପି ଯୁବନେତ୍ରୀ ପାମେଲା ଗୋସ୍ୱାମୀ
କୋଲକାତା: କୋଲକାତାର ଏକ ଏନଡିପିଏସ୍ କୋର୍ଟ ଯୁବ ବିଜେପି ନେତ୍ରୀ ପାମେଲା ଗୋସ୍ୱାମୀଙ୍କୁ ଡ୍ରଗ୍ସ ମାମଲାରେ ଫେବ୍ରୁଆରି ୨୫ ପର୍ଯ୍ୟନ୍ତ ପୁଲିସ ହେପାଜତକୁ ପଠାଇଛନ୍ତି। ଭାରତୀୟ ଜନତା ଯୁବ ମୋର୍ଚ୍ଚା ପର୍ଯ୍ୟବେକ୍ଷକ ଓ ପଶ୍ଚିମବଙ୍ଗ ହୁଗୁଳି ଜିଲ୍ଲା ବିଜେପି ମହାସଚିବ ପାମେଲା ଗୋସ୍ବାମୀଙ୍କ ଗାଡ଼ିରୁ ଶୁକ୍ରବାର ଦିନ କୋକେନ ଜବତ କରାଯାଇଥିଲା। ପରେ ଏ ନେଇ ତାଙ୍କୁ ଗିରଫ କରାଯିବା ସହ ଆଜି କୋର୍ଟରେ ହାଜର କରାଯାଇଥିଲା। କୋର୍ଟରେ ହାଜର ପରେ ଏବେ ତାଙ୍କୁ ଫେବ୍ରୁଆରି ୨୫ପର୍ଯ୍ୟନ୍ତ ପୁଲିସ ହେପାଜତକୁ ପଠାଯାଇଛି।
Sambad is now on WhatsApp
Join and get latest news updates delivered to you via WhatsApp
ଶନିବାର ଦିନ ଶୁଣାଣି ପରେ ତାଙ୍କୁ କୋର୍ଟରୁ ବାହାରକୁ ନିଆଯାଉଥିବା ବେଳେ ପାମେଲା ଗୋସ୍ୱାମୀ ଏହି ଘଟଣାରେ ସିଆଇଡି ଯାଞ୍ଚ ପାଇଁ ଦାବି କରିଛନ୍ତି। କୋର୍ଟରେ ପାମେଲା ଗୋସ୍ୱାମୀ ଅଭିଯୋଗ କରିଛନ୍ତି ଯେ, ତାଙ୍କୁ ଫସାଇଦିଆଯାଇଛି। ଏ ନେଇ ଏକ ବଡ଼ ଷଡ଼ଯନ୍ତ୍ର କରାଯାଇଛି। ଏପରିକି ତାଙ୍କ ଗାଡ଼ିରୁ ଜବତ ହୋଇଥିବା କୋକେନର ପାଉଚ ବିଜେପି ସାଂସଦ ରାକେଶ ସିଂ ନିଜ ଲୋକ ପଠାଇ ତାଙ୍କ ଗାଡ଼ିରେ ରଖିଥିବା ଅଭିଯୋଗ କରିଛନ୍ତି ପାମେଲା।
ମଧ୍ୟପ୍ରଦେଶର ଜବଲପୁରର ଲୋକସଭା ସାଂସଦ ରାକେଶ ସିଂ ପାମେଲାଙ୍କ ଅଭିଯୋଗକୁ ନେଇ କହିଛନ୍ତି ଯେ, ମୋତେ ଅସମ୍ମାନ କରିବା ପାଇଁ ମୋ ନାମ ନିଆଯାଉଛି। ପାମେଲା ଗୋସ୍ୱାମୀ ବିଗତ ସପ୍ତାହରେ ବିଜେପିର ବରିଷ୍ଠ ନେତାଙ୍କ ବିରୋଧରେ ପୁଲିସ ନିକଟକୁ ଯାଇଥିଲେ। ଏମିତିକି ତାଙ୍କ ନିଜ ବାପା ପାମେଲା ଡ୍ରଗ୍ସ ସେବନ କରୁଥିବା ନେଇ ଅଭିଯୋଗ କରିଥିଲେ।
ଉଲ୍ଲେଖଯୋଗ୍ୟ, ଗତକାଲି ଗାଡ଼ି ତନଖି ବେଳେ ପୁଲିସ ହାତରେ ଏହି ଯୁବନେତ୍ରୀ ଧରା ପଡ଼ିଥିଲେ। ପୁଲିସ ପାମେଲା ଗୋସ୍ବାମୀଙ୍କ କାରରୁ ୧୦୦ ଗ୍ରାମର କୋକେନ ଜବତ କରିଥିଲା। ଜବତ ହୋଇଥିବା କୋକେନର ମୂଲ୍ୟ ବଜାରରେ ଲକ୍ଷାଧିକ ଟଙ୍କା ହେବ ବୋଲି ଅନୁମାନ କରାଯାଉଛି। ତାଙ୍କ ସହିତ କେନ୍ଦ୍ରୀୟ ସୁରକ୍ଷା ବଳର ଜଣେ ଯବାନ ବି ଥିଲେ, ଯିଏକି ତାଙ୍କ ସୁରକ୍ଷା ପାଇଁ ନିୟୋଜିତ ରହିଥିଲେ। ପୁଲିସ ପୂରା ଘଟଣାର ଛାନଭିନ ଆରମ୍ଭ କରିଛି।