୪୦୦ ପାର୍ ପାଇଁ ବିଜେପିର ଚକ୍ରବ୍ୟୁହ: ଭାଇ-ଭାଇ, ଦିଅର-ଭାଉଜ, ଦାଦା-ପୁତୁରାଙ୍କୁ କରୁଛି ମୁହାଁମୁହିଁ
ନୂଆଦିଲ୍ଲୀ: ଲୋକସଭା ନିର୍ବାଚନ ପୂର୍ବରୁ ଏନଡିଏ ପରିବାର କ୍ରମାଗତ ଭାବେ ବୃଦ୍ଧି ପାଉଛି। ଏପର୍ଯ୍ୟନ୍ତ ୩୮ଟି ଦଳ ବିଜେପି ନେତୃତ୍ବାଧୀନ ଏନଡିଏରେ ଯୋଗ ଦେଇଛନ୍ତି। ଏହି ପରି ଭାବରେ, ମହାରାଷ୍ଟ୍ରରୁ ବିହାର ପର୍ଯ୍ୟନ୍ତ ୪୦୦ ଟି ସିଟ୍ ଲକ୍ଷ୍ୟ ହାସଲ କରିବାକୁ ଏନଡିଏ ଚେଷ୍ଟା କରୁଛି।
ଲୋକସଭା ନିର୍ବାଚନରେ ଏଥର ବିଜେପି ନେତୃତ୍ୱାଧୀନ ଏନଡିଏ ଏବଂ କଂଗ୍ରେସ ନେତୃତ୍ୱାଧୀନ ଇଣ୍ଡିଆ ମିଳିତ ମେଣ୍ଟ ମଧ୍ୟରେ କଡ଼ା ମୁକାବିଲା ହେବ। ଏଥର ଏନଡିଏ ୪୦୦ ଟି ସିଟ୍ ପାଇବାକୁ ଲକ୍ଷ୍ୟ ରଖିଥିବାବେଳେ ଇଣ୍ଡିଆ ମିଳିତ ମେଣ୍ଟରେ ଥିବା ବିରୋଧୀ ଦଳ ବିଜେପିକୁ ପରାସ୍ତ କରିବାକୁ ସମ୍ପୂର୍ଣ୍ଣ ପ୍ରସ୍ତୁତି ଚଳାଇଛନ୍ତି। ଲୋକସଭା ନିର୍ବାଚନ ଏଥର ଅତ୍ୟନ୍ତ କୌତୁହଳପୂର୍ଣ୍ଣ ହୋଇଛି କାରଣ ଅନେକ ସ୍ଥାନରେ ଗୋଟିଏ ପରିବାରର ବଡ ନେତାମାନେ ପରସ୍ପର ବିରୋଧରେ ଲଢୁଥିବା ଦେଖିବାକୁ ମିଳିବ। ୪୦୦ ପାର୍ ପାଇଁ ବିଜେପି ବିରୋଧୀଙ୍କ ପାଇଁ ଚକ୍ରବ୍ୟୁହ ରଚିଛି। ଦଳ ଯୋଜନାବଦ୍ଧ ଭାବରେ ବହୁ ଆସନରେ ଭାଇ-ଭାଇ, ଦିଅର-ଭାଉଜ, ଦାଦା-ପୁତୁରାଙ୍କୁ ମୁହାଁମୁହିଁ କରିଛି।
Sambad is now on WhatsApp
Join and get latest news updates delivered to you via WhatsApp
ଝାଡ଼ଖଣ୍ଡ ମୁକ୍ତି ମୋର୍ଚ୍ଚା (ଜେଏମଏମ) ନେତା ତଥା ପୂର୍ବତନ ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କ ଭାଉଜ ସୀତା ସୋରେନ ଜେଏମଏମରୁ ଇସ୍ତଫା ଦେଇଛନ୍ତି। ସେ ତାଙ୍କ ଶ୍ୱଶୁର ଶିବୁ ସୋରେନଙ୍କୁ ଏକ ଚିଠି ଲେଖି କହିଛନ୍ତି ଯେ ମୋର ଏବଂ ମୋ ପରିବାର ବିରୋଧରେ ଷଡ଼ଯନ୍ତ୍ର କରାଯାଉଛି । ତେବେ କୁହାଯାଉଛି ଯେ ସୀତା ସୋରେନ ଦୀର୍ଘ ଦିନ ଧରି ବିଜେପି ସହ ଆଲୋଚନା କରୁଥିଲେ। ଏହା ମଧ୍ୟ କୁହାଯାଉଛି ଚମ୍ପାଇ ସୋରେନଙ୍କୁ ଝାଡ଼ଖଣ୍ଡ ସିଏମ କରାଯିବା ନେଇ ସୀତା ସୋରେନ ଅସନ୍ତୁଷ୍ଟ ଥିଲେ। ବର୍ତ୍ତମାନ ବିଜେପି ତାଙ୍କୁ ଯେ କୌଣସି ଆସନରୁ ପ୍ରାର୍ଥୀ କରିବ। ଜେଏମଏମର କିଛି ବିଧାୟକ ମଧ୍ୟ ବିଜେପିରେ ଯୋଗ ଦେବାର କାର୍ଯ୍ୟକ୍ରମ ରହିଛି। ବିଜେପି ଝାଡଖଣ୍ଡର ଭାଉଜ ଏବଂ ଦିଅରଙ୍କ ମଧ୍ୟରେ କଡ଼ା ମୁକାବିଲା କରିବାକୁ ଯାଉଛି। ଗତ ଲୋକସଭା ନିର୍ବାଚନରେ ବିଜେପି ରାଜ୍ୟର ୧୪ ଟି ସିଟ୍ ମଧ୍ୟରୁ ୧୧ ଟି ଜିତିଥିଲା। ଏଥର ସମସ୍ତ ୧୪ ଟି ସିଟ୍ ଜିତିବାକୁ ଲକ୍ଷ୍ୟ ଧାର୍ଯ୍ୟ କରାଯାଇଛି।
ଅନ୍ୟପକ୍ଷରେ ବିହାରରେ ପ୍ରତିଯୋଗିତା ମଧ୍ୟ ଆକର୍ଷଣୀୟ ହେବାକୁ ଯାଉଛି। ଲୋକ ଜନଶକ୍ତି ପାର୍ଟି (ରାମ ବିଳାସ) ନେତା ଚିରାଗ ପାସୱାନ ଏବଂ ତାଙ୍କ ଦାଦା ତଥା ଲୋକ ଜନଶକ୍ତି ପାର୍ଟି ନେତା ପଶୁପତି ପାରସ ମୁହାଁମୁହିଁ ହେବେ। ତାଙ୍କ ଦଳକୁ ଗୋଟିଏ ବି ଆସନ ମିଳି ନ ଥିବାରୁ ଅସନ୍ତୋଷ ପ୍ରକାଶ କରି କେନ୍ଦ୍ର ମନ୍ତ୍ରୀ ପଦରୁ ପଶୁପତି ଇସ୍ତଫା ଦେଇଛନ୍ତି। କୁହାଯାଉଛି ଯେ ଦାଦା ଏବଂ ପୁତୁରା ଗୋଟିଏ ଆସନରୁ ମୁହାଁମୁହିଁ ହୋଇପାରନ୍ତି। ଆରଜେଡି ନେତା ତେଜସ୍ୱୀ ଯାଦବଙ୍କ ଦ୍ୱାରା ପଶୁପତିଙ୍କୁ ତିନିଟି ଆସନର ଅଫର ଦେଇଛନ୍ତି। ଏହା ମଧ୍ୟ କୁହାଯାଉଛି ହାଜିପୁର ଆସନରେ ଚିରାଗ ଏବଂ ପଶୁପତି ମୁହାଁମୁହିଁ ହୋଇପାରନ୍ତି। ଗତଥର ଏନଡିଏ ବିହାରର ୪୦ ଟି ସିଟ୍ ମଧ୍ୟରୁ ୩୯ ଟି ଜିତିଥିଲା।
ଏଥର ସବୁ ସିଟ୍ ଜିତିବା ପାଇଁ ବିଜେପି ଯୋଜନା କରିଛି।
ମହାରାଷ୍ଟ୍ରରେ ବିଜେପି ଭଙ୍ଗାଗଢ଼ା ରାଜନୀତି ଜାରି ରଖିଛି। ମହାରାଷ୍ଟ୍ର ନବନିର୍ମାଣ ସେନା(ଏମଏନଏସ) ମୁଖ୍ୟ ରାଜ ଠାକରେ ଯେକୌଣସି ସମୟରେ ଏନଡିଏରେ ଯୋଗ ଦେଇ ପାରନ୍ତି ବୋଲି କୁହାଯାଉଛି। ଏହା ମଧ୍ୟ ସାମ୍ନାକୁ ଆସିଛି ଯେ ଏମଏନଏସ ମୁମ୍ବାଇ ଦକ୍ଷିଣ ଲୋକସଭା ଆସନ ପାଇବାର ସମ୍ଭାବନା ରହିଛି। ଏମଏନଏସ ତିନୋଟି ଲୋକସଭା ଆସନ ଦାବି କରିଛି। ବିଶେଷ କଥା ହେଉଛି ୨୦୧୯ଲୋକସଭା ନିର୍ବାଚନରେ ରାଜ ଠାକରେ ବିଜେପି ବିରୋଧରେ ପ୍ରଚାର କରିଥିଲେ। ତେବେ ସେ କୌଣସି ଆସନରୁ ପ୍ରାର୍ଥୀ ଦେଇ ନ ଥିଲେ। ଗତଥର ମହାରାଷ୍ଟ୍ରରେ ବିଜେପି ୨୩ ଟି ଆସନ ଜିତିଥିଲା। ଏଥର ବିଜେପି ରାଜ୍ୟର ୪୮ ଟି ସିଟ୍ ମଧ୍ୟରୁ ୪୫ ଟି ଜିତିବାର ଲକ୍ଷ୍ୟ ରଖିଛି।