ଅର୍ପିତା ମୁଖାର୍ଜୀଙ୍କ ଘରୁ ଜବତ ହୋଇଥିବା କଳା ଡାଏରୀରେ କଣ ଅଛି ?
ନୂଆଦିଲ୍ଲୀ : ପଶ୍ଚିମବଙ୍ଗ ମନ୍ତ୍ରୀ ପାର୍ଥ ଚାଟାର୍ଜୀଙ୍କ ସହଯୋଗୀ ତଥା ଅଭିନେତ୍ରୀ ଅର୍ପିତା ମୁଖାର୍ଜୀଙ୍କ ଘରୁ କଳାଟଙ୍କା ଜବତ ହେବା ସହ ଆଉ ଏକ ଗୁରୁତ୍ବପୂର୍ଣ୍ଣ ସାମଗ୍ରୀ ଇଡି ଦ୍ବାରା ଜବତ ହୋଇଛି । ତାହା ହେଉଛି ଏକ କଳା ଡାଏରୀ । ଏହି କଳା ଡାଏରୀରେ ପଶ୍ଚିମବଙ୍ଗରେ ହୋଇଥିବା ସ୍କୁଲ ନିଯୁକ୍ତି ଦୁର୍ନୀତି ସମ୍ପର୍କରେ ଗୁରୁତ୍ବପୂର୍ଣ୍ଣ ତଥ୍ୟ ରହିଥିବା ସଂଦେହ କରାଯାଉଛି ।
Sambad is now on WhatsApp
Join and get latest news updates delivered to you via WhatsApp
ଗତ ସପ୍ତାହରେ ଇଡି ପକ୍ଷରୁ ଅର୍ପିତାଙ୍କ ଡାଇମଣ୍ଡ ସିଟି ସାଉଥ୍ ରେସିଡେଣ୍ଟରେ ଚଢଉ ବେଳେ ପୁଳା ପୁଳା ଟଙ୍କା ସହ ଏହି ଡାଇରୀକୁ ଜବତ କରାଯାଇଥିଲା । ମିଳିଥିବା ସୂଚନା ଅନୁସାରେ ଏହି ଡାଇରୀରେ ପ୍ରାୟ ୪୦ ପୃଷ୍ଠା ଧରି ବେଆଇନ ସ୍କୁଲ ଶିକ୍ଷକ ନିଯୁକ୍ତି ସଂପର୍କିତ ତଥ୍ୟ ରହିଛି । ଏସବୁ ତଥ୍ୟ ସ୍କୁଲ ଦୁର୍ନୀତି ସଂପର୍କରେ ଆହୁରି ଅନେକ ତଥ୍ୟ, ଯେପରିକି ଏଥିରେ ଆଉ କିଏ କିଏ ସଂପୃକ୍ତ, କେତେ ଅର୍ଥ ସଂଗ୍ରହ ହୋଇଥିଲା ଆଜି ପ୍ରଶ୍ନର ଉତ୍ତର ରହିଥିବା କୁହାଯାଉଛି । ଏସବୁ ତଥ୍ୟ ପାର୍ଥଙ୍କ ଦୋଷ ସାବ୍ୟସ୍ତ କରିବାକୁ ଇଡିକୁ ସହାୟକ ହେବ ବୋଲି ମନେକରାଯାଉଛି ।
ଗତ ଶୁକ୍ରବାରଦିନ ଇଡି ଅର୍ପିତା ମୁଖାର୍ଜୀଙ୍କ ଘରୁ ଚଢଉ କରି ନଗଦ ୨୧ କୋଟି ଟଙ୍କା ଜବତ କରିଥିଲା । ଏସବୁ ଟଙ୍କା ପଶ୍ଚିମବଙ୍ଗରେ ପ୍ରାଥମିକ ଶିକ୍ଷକ ନିଯୁକ୍ତିରେ ହୋଇଥିବା ଦୁର୍ନୀତିରୁ ସଂଗ୍ରହ କରାଯାଇଥିବା ସଂଦେହ କରାଯାଉଛି । ପଶ୍ଚିମ ବଙ୍ଗ ସ୍କୁଲ ସର୍ଭିସ କମିଶନ ଓ ପ୍ରାଥମିକ ଶିକ୍ଷା ବୋର୍ଡ ରେ ହୋଇଥିବା କୋଟି କୋଟି ଟଙ୍କାର ଦୁର୍ନୀତି ଅଭିଯୋଗରେ ଇଡି ପାର୍ଥଙ୍କ ଅଫିସ, ଘର ସମେତ ମୋଟ ୧୩ଟି ସ୍ଥାନରେ ଚଢଉ କରାଯାଇଥିଲା । ଏହା ପରେ ଶନିବାରଦିନ ତାଙ୍କୁ ଗିରଫ କରାଯାଇଥିଲା ।