ବାଲୁଚିସ୍ତାନରେ ବିସ୍ଫୋରଣ, ୪ ମୃତ

ଇସଲାମାବାଦ : ପାକିସ୍ତାନର ବାଲୁଚିସ୍ତାନ ପ୍ରଦେଶରେ ଆଜି ଏକ ବଡ଼ ଧରଣର ବିସ୍ଫୋରଣ ହୋଇଛି। ଏଥିରେ ଅତିକମ୍‌ରେ ୪ ଜଣଙ୍କର ମୃତ୍ୟୁ ହୋଇଥିବାବେଳେ ୧୪ ଜଣ ଆହତ ହୋଇଛନ୍ତି। ବାଲୁଚିସ୍ତାନର ବରଖାନଠାରେ ଗୋଟିଏ ମୋଟର ସାଇକଲରେ ଖଞ୍ଜାଯାଇଥିବା ଆଇଇଡି ବିସ୍ଫୋରଣ ହୋଇଛି ବୋଲି ସେଠାକାର ଡେପୁଟି କମିସନର ଅବଦୁଲ୍ଲା ଖୋସୋ କହିଛନ୍ତି।

ବାଲୁଚିସ୍ତାନ ମୁଖ୍ୟମନ୍ତ୍ରୀ ମିର୍‌ ଅବଦୁଲ କୁଡୋସ ବିଜେଞ୍ଜୋ ଏହି ଘଟଣାକୁ ନିନ୍ଦା କରିଛନ୍ତି। ଏହା ଆତଙ୍କବାଦୀଙ୍କ କାର୍ଯ୍ୟ ବୋଲି ‌ଜଣାପଡ଼ିଛି। ତେହରିକ ଏ ତାଲିବାନ ଆତଙ୍କବାଦୀ ଏହି ଅଂଚଳରେ କାୟାବିସ୍ତାର କରୁଥିବା ଜଣାପଡ଼ିଛି । ଶନିବାର ମଧ୍ୟ ଖୁଜଦାର ଜିଲ୍ଲାରେ ଏକ ରିମୋଟ କଣ୍ଟ୍ରୋଲ ବିସ୍ଫୋରଣରେ ଦୁଇଜଣ ପୁଲିସ ନିହତ ହୋଇଥିବାବେଳେ ଦୁଇଜଣ ଆହତ ହୋଇଥିଲେ। ଆତଙ୍କବାଦୀମାନେ ପୁଲିସକୁ ଟାର୍ଗେଟ୍‌ କରି ଗୋଟିଏ ପରେ ଗୋଟିଏ ବିସ୍ଫୋରଣ ଘଟାଉଛନ୍ତି।