ତାମିଲନାଡ଼ୁ : ବାଣ ଗୋଦାମରେ ବିସ୍ଫୋରଣ, ୭ ମୃତ
ଚେନ୍ନାଇ : ତାମିଲନାଡ଼ୁରେ ଆଜି ଏକ ବଡ଼ ଧରଣର ଦୁର୍ଘଟଣା ଘଟିଛି । ରାଜ୍ୟର କୁଡ୍ଡାଲୋର ଜିଲ୍ଲାରେ ଥିବା ଏକ ବାଣ କାରଖାନାର ଗୋଦାମରେ ବିସ୍ଫୋରଣ ହେବାରୁ ୭ ଜଣ ବ୍ୟକ୍ତି ପ୍ରାଣ ହରାଇବା ସହ ତିନିଜଣ ଲୋକ ଆହତ ହୋଇଛନ୍ତି । ଆହତଙ୍କ ଅବସ୍ଥା ଗୁରୁତର ଥିବାରୁ ମୃତ୍ୟୁସଂଖ୍ୟା ବଢିବାର ଆଶଙ୍କା ରହିଛି । ବିସ୍ଫୋରଣର ତୀବ୍ରତା ଏତେ ଭୟଙ୍କର ଥିଲା ଯେ ଏକ କଂକ୍ରିଟ କୋଠା ସଂପୂର୍ଣ୍ଣ ଧ୍ୱଂସ ପାଇଯାଇଛି ।
Sambad is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ଅନୁସାରେ ତାମିଲନାଡ଼ୁର କୁଡ୍ଡାଲୋର ଜିଲ୍ଲାରେ ଥିବା କଟ୍ଟୁମାନାରକୋଲିଠାରେ ଥିବା ଏହି ବାଣ କାରଖାନାରେ ବାଣ ତିଆରି କରାଯାଉଥିଲା । ଆସନ୍ତା ଦଶହରା ଓ ଦୀପାବଳୀକୁ ଦୃଷ୍ଟିରେ ରଖି କାରଖାନାରେ ଅଧିକ ବାଣ ଉତ୍ପାଦନ କରାଯାଉଥିଲା । କାରଖାନା ପରିସରରେ ଥିବା ଗୋଦାମରେ ବିପୁଳ ପରିମାଣରେ ବିସ୍ଫୋରକ ଓବାଣ ରଖାଯାଇଥିଲା । ବାଣ ତିଆରିବେଳେ ନିଆଁ ଲାଗିବାକୁ ବିସ୍ଫୋରଣ ହୋଇଥିଲା । ତେବେ ନିଆଁର କାରଣ ଜଣାପଡ଼ିନାହିଁ । ଘଟଣାସ୍ଥଳରେ ପୁଲିସ, ସ୍ଥାନୀୟ ପ୍ରଶାସନ ଓ ଦମକଳ ବାହିନୀ ପହଞ୍ଚିଛନ୍ତି । ଦମକଳ ବାହିନୀ ପକ୍ଷରୁ ନିଆଁ ଲିଭାଯାଉଛି । ପ୍ରଶାସନ ପକ୍ଷରୁ ଘଟଣାର ତଦନ୍ତ ନିର୍ଦ୍ଦେଶ ଦିଆଯାଇଛି । ଏହି ବାଣ କାରଖାନାଟି ଚେନ୍ନାଇଠାରୁ ୧୯୦ କିଲୋମିଟର ଦୂରରେ ଅବସ୍ଥିତ ବୋଲି ଜଣାପଡ଼ିଛି ।