ମସ୍କୋରେ ପ୍ରଚଣ୍ଡ ଧମାକା, ବିସ୍ଫୋରଣରେ ରୁଷୀୟ ସେନାଧିକାରୀ ମୃତ

ମସ୍କୋ: ରୁଷର ରାଜଧାନୀ ମସ୍କୋରେ ଏକ କାର ବିସ୍ଫୋରଣ ହୋଇଛି। ଏହି ବିସ୍ଫୋରଣରେ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ଜଣେ ବରିଷ୍ଠ ଜେନେରାଲଙ୍କ ମୃତ୍ୟୁ ହୋଇଥିବା ଜଣାପଡ଼ିଛି। କାରରେ ବିସ୍ଫୋରଣ ହେବା ସମୟରେ ୫୯ ବର୍ଷୀୟ ରୁଷୀୟ ଲେଫ୍ଟନାଣ୍ଟ ଜେନେରାଲ ୟାରୋସ୍ଲାଭ ମୋସ୍କାଲିକ୍ ସେହି ରାସ୍ତା ଦେଇ ଯାଉଥିଲେ। ବିସ୍ଫୋରଣ ଯୋଗୁଁ କାରଟି ଆକାଶରେ କିଛି ମିଟର ଉପରକୁ ଉଠିଯାଇଥିଲା। ବିସ୍ଫୋରଣ ପରେ, ଘଟଣାସ୍ଥଳରୁ ଆଇଇଡି ବ୍ୟବହାରର ପ୍ରମାଣ ମିଳିଛି।

ରୁଷର ଜରୁରୀକାଳୀନ ସେବା କହିଛି ଯେ ଉଦ୍ଧାର ହୋଇଥିବା ବିସ୍ଫୋରକଗୁଡ଼ିକର କ୍ଷମତା ୩୦୦ ଗ୍ରାମରୁ ଅଧିକ ଟିଏନଟି ସହିତ ସମାନ ଥିଲା। ବିସ୍ଫୋରଣରେ ଦୁଇଜଣ ଗୁରୁତର ଆହତ ମଧ୍ୟ ହୋଇଛନ୍ତି। ରୁଷ ଗଣମାଧ୍ୟମ କହିଛି ଯେ ସ୍ଥାନୀୟ ଲୋକମାନେ ଆହୁରି ଅନେକ ବିସ୍ଫୋରଣର ଶବ୍ଦ ମଧ୍ୟ ଶୁଣିଛନ୍ତି। ମୋସକାଲିକ୍ ସଶସ୍ତ୍ର ବାହିନୀର ଜେନେରାଲ ଷ୍ଟାଫଙ୍କ ମୁଖ୍ୟ ଅପରେସନ୍ ନିର୍ଦ୍ଦେଶାଳୟର ଉପମୁଖ୍ୟ ଥିଲେ।

ବିସ୍ଫୋରଣ କିଏ କରିଛି ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ। ସ୍ଥାନୀୟ ଲୋକମାନେ କହିଛନ୍ତି ଯେ ବିସ୍ଫୋରଣ ଏତେ ଶକ୍ତିଶାଳୀ ଥିଲା ଯେ ପାଖରେ ଥିବା କୋଠାଗୁଡ଼ିକର ଝରକା ମଧ୍ୟ ଭାଙ୍ଗି ଯାଇଥିଲା। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ସ୍ୱତନ୍ତ୍ର ପ୍ରତିନିଧି ଷ୍ଟିଭ୍ ୱିଟକଫ ପୁଟିନଙ୍କୁ ଭେଟିବାର କାର୍ଯ୍ୟକ୍ରମ ସ୍ଥିର ହେବାର କିଛି ଦିନ ପରେ ଏହି ଘାତକ ଆକ୍ରମଣ ହୋଇଛି। ୟୁକ୍ରେନ ଯୁଦ୍ଧ ସମାପ୍ତ କରିବା ପାଇଁ ରୁଷ ସହିତ ଦ୍ୱିତୀୟ ପର୍ଯ୍ୟାୟ ଆଲୋଚନା ପାଇଁ ୱିଟକଫ ମସ୍କୋରେ ଅଛନ୍ତି।