ବେଆଇନ ତୈଳ ବିଶୋଧନାଗାରରେ ବିସ୍ଫୋରଣରେ ୫୦ରୁ ଅଧିକ ଲୋକଙ୍କର ମୃତ୍ୟୁ!
ଅବୁଜା: ଦକ୍ଷିଣ ପୂର୍ବ ନାଇଜେରିଆର ଏକ ବେଆଇନ ତୈଳ ବିଶୋଧନାଗାରରେ ବିସ୍ଫୋରଣ ଘଟି ୫୦ରୁ ଅଧିକ ଲୋକଙ୍କର ମୃତ୍ୟୁ ଘଟିଛି ଏବଂ ଅନେକ ଲୋକ ଆହତ ହୋଇଛନ୍ତି। ସରକାରୀ ତଥ୍ୟ ମୁତାବକ ମୃତକଙ୍କ ସଂଖ୍ୟା ୫୦ରେ ପହଞ୍ଚିଥିବାବେଳେ ଅସମର୍ଥିତ ସୂତ୍ରରୁ ମିଳିଥିବା ସୂଚନା ମୁତାବକ ଏହି ବିସ୍ଫୋରଣରେ ମୃତକଙ୍କ ସଂଖ୍ୟା ୧୦୦ରୁ ଅଧିକ ହୋଇପାରେ | କୁହାଯାଉଛି ଯେ ବିସ୍ଫୋରଣ ହେତୁ ନିଆଁ ଲାଗି କୋଟି କୋଟି ଟଙ୍କାର ସମ୍ପତ୍ତି ନଷ୍ଟ ହୋଇଛି ।
Sambad is now on WhatsApp
Join and get latest news updates delivered to you via WhatsApp
ଆଏମୋ ରାଜ୍ୟ ସୂଚନା କମିଶନର ଡିକ୍ଲାନ ଆମେଲୁମ୍ବା କହିଛନ୍ତି ଯେ ଦୁଇଟି ବେଆଇନ ତୈଳ ବିଶୋଧାନାଗାରରେ ବିସ୍ଫୋରଣ ହୋଇଛି | ବିସ୍ଫୋରଣର କାରଣ ଜଣାପଡ଼ିନଥିବାବେଳେ ଏବେ ଏହାର ତଦନ୍ତ ଚାଲିଛି | ସୂଚନା କମିଶନର ଆମେଲୁମ୍ବା କହିଛନ୍ତି ଯେ ଯେଉଁଠାରେ ବିସ୍ଫୋରଣ ଘଟିଥିଲା ସେହି ରିଫାଇନାରୀ ବେଆଇନ ହୋଇଥିବାବେଳେ ଏହି ଘଟଣାରେ ନିହତ ହୋଇଥିବା ସମସ୍ତ ବ୍ୟକ୍ତି ଅପରେଟର ବୋଲି ଜଣାପଡିଛି | ପୁଲିସ ପକ୍ଷରୁ କୁହାଯାଇଛି ଯେ ବିସ୍ଫୋରଣ ପରେ ରିଫାଇନାରୀର ମାଲିକଙ୍କୁ ଏବେ ଖୋଜାଯାଉଛି |
ସୂଚନା ଅନୁଯାୟୀ, ନାଇଜେରିଆରେ ବେଆଇନ ରିଫାଇନାରୀ କିଛି ନୂଆ ନୁହେଁ। ନାଇଜେରିଆ ଆଫ୍ରିକାରେ ସର୍ବାଧିକ ଅଶୋଧିତ ତୈଳ ଉତ୍ପାଦନ କରୁଥିଲେ ବି ଏଠାରେ ଖୁବ୍ କମ୍ ବିଶୋଧନାଗାର ଅଛି | ଏହି କାରଣରୁ ପେଟ୍ରୋଲ ଏବଂ ଅନ୍ୟାନ୍ୟ ଇନ୍ଧନ ଆମଦାନୀ ହୋଇଥାଏ | ବେଆଇନ ବ୍ୟବସାୟୀମାନେ ଏହାର ଫାଇଦା ଉଠାନ୍ତି ଏହି ବ୍ୟବସାୟୀମାନେ ପ୍ରାୟତଃ ଦୁର୍ଗମ ଅଞ୍ଚଳରେ ରିଫାଇନାରୀ ସ୍ଥାପନ କରନ୍ତି, ଯେଉଁସ୍ଥାନକୁ ପୁଲିସ ଏବଂ ଅଧିକାରୀମାନେ ଯାଇପାରିନଥାନ୍ତି | ଏଭଳି ବେଆଇନ ବିଶୋଧନାଗାର ପାଇଁ ନାଇଜେରିଆରେ ଅଶୋଧିତ ତୈଳ ଉତ୍ପାଦନରେ ବଡ କ୍ଷତି ହୋଇଥାଏ |