ଭିଣ୍ଡ(ମଧ୍ୟପ୍ରଦେଶ): ଦେଖୁ ଦେଖୁ ନଈରେ ବୁଡ଼ିଗଲା ଡଙ୍ଗା। ମଧ୍ୟପ୍ରଦେଶରେ ଭିଣ୍ଡରେ ଥିବା ସିନ୍ଧ ନଦୀରେ ୧୦ଜଣଙ୍କୁ ନେଇ ଯାଉଥିବା ଏକ ଡଙ୍ଗା ଓଲଟିପଡ଼ିଥିବା ଜଣାପଡ଼ିଛି। କ୍ୟାମେରାରେ ଏହି ଛାତିଥରା ଘଟଣାର ଦୃଶ୍ୟ କଏଦ ହୋଇଥିବା ବେଳେ ୧୦ଜଣଙ୍କ ମଧ୍ୟରୁ ୮ଜଣଙ୍କୁ ଉଦ୍ଧାର କରାଯାଇଥିବା ଜଣାପଡ଼ିଛି। ଏହା ସହ ଏବେ ବି ୨ଜଣ ନିଖୋଜ ଅଛନ୍ତି।

Advertisment

ଡଙ୍ଗାରେ ବସିଥିବା ଲୋକମାନେ ଏକ ଧାର୍ମିକ ଭୋଜିରେ ଯୋଗଦେବାକୁ ଯାଇଥିଲେ। ସେଠାରୁ ଫେରୁଥିବା ସମୟରେ ଏହି ଦୁର୍ଘଟଣା ଘଟିଥିଲା ​। ଏହି ଦୁର୍ଘଟଣାର ଏକ ଭିଡିଓ ଏବେ ସାମ୍ନାକୁ ଆସିଛି। ଭିଡିଓରେ ଦେଖାଯାଇଛି ଯେ କିଛି ଲୋକ ଡଙ୍ଗାରେ ବସିଛନ୍ତି। ତା’ପରେ ଡଙ୍ଗା ଗୋଟିଏ ପାର୍ଶ୍ୱରୁ ବୁଡ଼ିବାକୁ ଲାଗୁଛି ଏବଂ କିଛି ସମୟ ପରେ ଡଙ୍ଗାଟି ପାଣିରେ ସମ୍ପୂର୍ଣ୍ଣ ବୁଡ଼ିଯାଉଛି। ଏହା ପରେ ଏଥିରେ ବସିଥିବା ଲୋକେ ପାଣି ଭିତରକୁ ଚାଲିଯିବା ସହ ବଞ୍ଚିବା ପାଇଁ ଛଟପଟ ହେଉଛନ୍ତି। ଏହା ଦେଖି ନଦୀ କୂଳରେ ଠିଆ ହୋଇଥିବା ଲୋକମାନେ ସାହାଯ୍ୟ ପାଇଁ ନିବେଦନ କରୁଥିବା ଦେଖାଯାଉଛି। କିଛି ଲୋକ ବୁଡ଼ିଯାଉଥିବା ଲୋକଙ୍କୁ ସାହାଯ୍ୟ କରିବା ପାଇଁ ନଦୀକୁ ଡେଇଁପଡୁଥିବା ମଧ୍ୟ ଦେଖାଯାଉଛି।