ନଦୀରେ ବାଜପେୟୀଙ୍କ ଚିତାଭସ୍ମ ବିସର୍ଜନ ବେଳେ ଓଲଟି ପଡିଲା ଡଙ୍ଗା, ପାଣିରେ ଖସିପଡିଲେ ବିଜେପି ନେତା
ଲକ୍ଷ୍ନୌ : ଉତ୍ତରପ୍ରଦେଶରେ ପୂର୍ବତନ ପ୍ରଧାନମନ୍ତ୍ରୀ ଅଟଳ ବିହାରୀ ବାଜପେୟୀଙ୍କ ଚିତାଭସ୍ମ ବିସର୍ଜନ ବେଳେ ଏକ ଅଘଟଣ ଘଟିଛି । ତେବେ ସୌଭାଗ୍ୟବସତଃ ଏଥିରେ କେହି ମୃତ୍ୟୁବରଣ କରିନାହାନ୍ତି । ମିଳିଥିବା ସୂଚନା ଅନୁସାରେ ଲକ୍ଷ୍ନୌ ନିକଟବର୍ତ୍ତି କୁଆନୋ ନଦୀରେ ଅଟଳଜୀଙ୍କ ଚିତାଭସ୍ମ ବିଜେପି ପକ୍ଷରୁ ବିସର୍ଜନ କରିବାର କାର୍ଯ୍ୟକ୍ରମ ଥିଲା । ଏହି ସମାରୋହରେ ସାମିଲ ହୋଇଥିଲେ ଜଣେ ସାଂସଦ, ୪ଜଣ ବିଧାୟକ, ଆଉ କିଛି ସ୍ଥାନୀୟ ନେତା, ଜିଲ୍ଲାର ଏସପି, କଲେକ୍ଟର ପ୍ରମୁଖ ।
Sambad is now on WhatsApp
Join and get latest news updates delivered to you via WhatsApp
ତେବେ ଏତେ ଜଣ ଲୋକ ଡଙ୍ଗା ଉପରେ ଚଢିଗଲେ ଯେ ତାହା ଭାରସାମ୍ୟ ହରାଇ ଗୋଟିଏ ପଟକୁ ଢଳିପଡି ଓଲଟିଗଲା । ଫଳରେ ଡଙ୍ଗାରେ ସବାର ଲୋକମାନେ ପାଣିରେ ଖସିପଡିଲେ । ତେବେ ଡଙ୍ଗାଟି କୂଳଠାରୁ ଅଳ୍ପ ଦୂରରେ ଥିବାରୁ ଏହି ଘଟଣାରେ କେହି ମୃତାହତ ହୋଇନଥିବା ଜଣାଯାଇଛି । ସମସ୍ତଙ୍କୁ ତୁରନ୍ତ ଉଦ୍ଧାର କରାଯାଇ କୂଳକୁ ଅଣାଯାଇଥିଲା । ସୂଚନାଯୋଗ୍ୟ ଯେ ଗତ ୧୬ ତାରିଖରେ ପୂର୍ବତନ ପ୍ରଧାନମନ୍ତ୍ରୀ ଅଟଳବିହାରୀ ବାଜପେୟୀଙ୍କ ଦେହାନ୍ତ ହୋଇଥିଲା । ତାଙ୍କର ଚିତାଭସ୍ମ ଏବେ ଦେଶର ସବୁ ନଦୀରେ ବିସର୍ଜନ କରାଯାଉଛି ।