ମହାମାରୀର ଭୟଙ୍କର ରୂପ, ଗଙ୍ଗା ନଦୀରେ ଭାସୁଛି କରୋନା ପୀଡ଼ିତଙ୍କ ମୃତଦେହ
ବକ୍ସର : କରୋନା ମହାମାରୀର ଏକ ଭୟଙ୍କର ରୂପ ଦେଖିବାକୁ ମିଳିଛି ଗଙ୍ଗା କୂଳରେ ଥିବା ବିହାରର ବକ୍ସର ଜିଲ୍ଲାରେ । ଜିଲ୍ଲାରେ ଥିବା ବିଭିନ୍ନ ଗଙ୍ଗା ଘାଟରେ ଅନେକ ମୃତଦେହ ଭାସୁଥିବା ଦେଖିବାକୁ ମିଳିଛି । ଏହା ପରେ ସ୍ଥାନୀୟ ଅଞ୍ଚଳରେ ଆତଙ୍କ ଖେଳିଯ଼ାଇଛି ।
Sambad is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ଅନୁସାରେ ବକ୍ସରର ଚୌସା ଟାଉନରେ ଥିବା ଗଙ୍ଗାନଦୀ କୂଳରେ ଆଜି ସକାଳୁ ଅନେକ ଗଳିତ ମୃତଦେହ ଭାସୁଥିବାରୁ ସ୍ଥାନୀୟ ଲୋକେ ଦେଖିବା ପରେ ପ୍ରଶାସନକୁ ଖବର ଦେଇଥିଲେ । ମୃତଦେହଗୁଡ଼ିକର ସଂଖ୍ୟା ୧୦୦ରୁ ଅଧିକ ହେବ ବୋଲି କୁହାଯ଼ାଉଛି । ଏହାପରେ ପ୍ରଶାସନ ପକ୍ଷରୁ ଘଟଣାସ୍ଥଳରେ ପହଞ୍ଚିବା ପରେ ତଦନ୍ତ ଆରମ୍ଭ ହୋଇଛି । ଏହି ମୃତଦେହଗୁଡ଼ିକ ସ୍ଥାନୀୟ ଲୋକଙ୍କର ନୁହେଁ ବୋଲି ଜଣାପଡ଼ିଛି । ଏଗୁଡ଼ିକ ମୁଖ୍ୟତଃ ଉତ୍ତରପ୍ରଦେଶରୁ ଭାସିଆସିଥିବା ସଂଦେହ କରାଯ଼ାଉଛି । କରୋନା ମହାମାରୀଯ଼ୋଗୁଁ ଶ୍ମଶାନରେ ଲୋକମାନଙ୍କ ଶବ ସତ୍କାର କରିବା କଷ୍ଟକର ହେଉଥିବାରୁ ଲୋକମାନେ ମୃତଦେହଗୁଡ଼ିକୁ ଗଙ୍ଗାରେ ଫିଙ୍ଗିଦେଇଥିବା ଅନୁମାନକରାଯ଼ାଉଛି । ତେବେ ଏ ନେଇ ଅଧିକ ତଦନ୍ତ ଜାରି ରହିଛି ବୋଲି ଚୌସାର ଜଣେ ପ୍ରଶାସନିକ ଅଧିକାରୀ ଅଶୋକ କୁମାର କହିଛନ୍ତି । ତେବେ ପ୍ରାୟ ୪୦ରୁ ୫୦ଟି ମୃତଦେହ ଥିବା ସେ କହିଛନ୍ତି । ଏହି ମୃତଦେହଗୁଡ଼ିକ ଗତ କିଛି ଦିନ ହେଲା ଭାସୁଥିବାରୁ ଗଳିତ ହୋଇଯ଼ାଇଥିବା କୁହାଯ଼ାଉଛି । ଏହି ଘଟଣା ସମଗ୍ର ଅଞ୍ଚଳରେ ଆତଙ୍କ ଖେଳାଇଦେଇଛି ।